Festa e 7-Marsit, politika shqiptare uron “Ditën e mësuesit”

Në kuadër të 7-marsit, "Ditës së mësuesit", politikanët shqiptarë kanë zgjedhur mënyra të ndryshme për të uruar këta të fundit.

Presidenti i Republikës Ilir Meta, ditën e sotme ka marrë pjesë në ceremoninë e vlerësimit në Korçë, në kuadër të “Ditës së mësuesit”.

Meta falënderoi mësuesit për profesionalizmin dhe misionin e tyre, në këtë vit të vështirë për shkak të pandemisë së Covid.

“Për mua ishte një detyrim që sot të isha pikërisht këtu, në Korçë, në djepin e rilindjes sonë kombëtare të arsimit dhe kulturës. Ne sot kujtojmë me nderim të jashtëzakonshëm Pandeli Sotirin, Jeronim De Radën, Pashko Vason, Gjergj Fishtën, e shumë personalitete të tjera, që me vizionin e tyre, por dhe sakrificat e tyre, na dhanë gjuhën shqipe dhe arsimin tonë.

Jemi sot t’ju shprehim mirënjohjen e thellë të gjithë mësuesve, edukatorëve, që punojnë sot edhe pse në kushte të vështira, për të pasur një të ardhme më të ndritur. Kujtojmë plejadën e mësuesve në pension, që ja kushtuan jetën e tyre të ardhmes së ndritur të brezit të ri”, u shpreh presidenti.

Kryeministri Edi Rama, përmes një videoje me pamje nga shkollat e ndërtuara apo të rindërtuara së fundmi, ka uruar të gjithë mësuesit për festën e 7-Marsit, ndërsa premton se më e mira është ende përpara.

"Dhe me një urim nga zemra për të gjithë mësuesit e Shqipërisë, ata në pension e ata që në krye të detyrës po kalojnë një vit tejet të vështirë, duke i siguruar krejt ata se më e mira është ende përpara nesh, ju uroj të gjithëve një ditë të bukur", shkruan Rama.

Në këtë 7-Mars, kryetari i PD, Lulzim Basha, ka zgjedhur të urojë të gjithë mësuesit përmes një fotoje me vajzën e tij Viktorian. Në foto Basha dhe vajza e tij mbajnë një pankartë ku shkruhet urimi për mësuesit.

"Nga zemra ju urojmë bashkë me Viktorian të gjithë mësuesve të Shqipërisë (edhe nëna Zikut) Gëzuar 7 Marsin", shkruan Basha.

Nëpërmjet një postimi në rrjetet sociale, edhe drejtuesja e LSI, Monika Kryemadhi i shpreh mirënjohjen mësuesve që merren me edukimin dhe mësimin e fëmijëve.

“Mbetemi gjithmonë nxënës…!

Jemi gjithmonë nxënës, ndaj dhe në 7 Mars nuk mund të harrojmë kurrë se kush kanë qenë ata, që na mësuan, na futën në botën e madhe të librit, të dijes dhe të edukatës së mirë.
Mirënjohja është gjithmonë një fjalë e pamjaftueshme për të përmbledhur atë gjithçka të madhe, që mësuesit bënë me ne.

Misionarët e të mirës, që kanë festën e tyre sot më 7 Mars, na mësuan të mbetemi nxënës përjetë, të jemi modest, të jemi të duruar siç kanë qenë ata të duruar me ne, për të na mësuar dhe për të kuptuar se të mësuarit nuk ndalet, siç nuk ndalet jeta.
I përulem mësuesve të mi, i përulem misionit tuaj të shenjtë dhe mbetem gjithmonë nxënësja juaj”, shkruan Kryemadhi në Facebook.

Ministrja e Arsimit, Sportit dhe Rinisë Evis Kushi ka zgjedhur të urojë Ditën e mësuesit nëpërmjet një videoje të veçantë, ku ajo vetë i është bashkuar një kolazhi urimesh e falënderimesh nga nxënës të shkollave të ndryshme të vendit.

"Sot është 7 Marsi, Festa e Mësuesit. Një 7 Mars ndryshe nga çdo herë tjetër. Një 7 Mars kur çdo nxënës e prind po ndjen sakrificën madhore të mësuesve tanë që do të mbahet mend shumë gjatë. Çdo 7 Mars në të ardhmen të mos i ngjajë këtij të sotmit, por të vijë i mbarë, dhe ne të mund të dhurojmë lule e përqafime me njëri-tjetrin".

"Të dashur mësues! Falënderimet dhe mirënjohja për ju, asnjëherë nuk mjaftojnë! Sepse çdo mësues është një hero! Një hero që të merr për dore, të ndriçon e bëhet udhërrëfyesi yt!", mbyll mesazhin e saj ministrja Kushi.

Edhe kryetari i Kuvendit, Gramoz Ruçi, ka uruar sot mësueset dhe mësuesit e Shqipërisë, me rastin e 7-Marsit.

Ne letrën e tij drejtuar mësuesve, ai shkruan se sot është një ditë e shënuar, duke theksuar se kjo është një ndër festat më të bukura të një kombi.

Letra e plotë e Gramoz Ruçit:

“Sot është 7 Mars. Për të gjithë ne, kjo është një ditë e shënuar, madje ndër festat më të bukura të një kombi. Është Festa e Mësuesit.

Është i dyti 7 Mars që e kremtojmë jo siç do të dëshironim. Mësueseve dhe mësuesve të Shqipërisë do t’u mungojë edhe sot melodia e zërave të gëzueshëm dhe përqafimet me nxënësit e tyre të dashur. Por pandemia nuk mund të ndajë ndjenjat, zemrat dhe dashurinë  njerëzore.

Në këtë 7 Mars të kësaj pranvere të vështirë për të gjithë planetin, të gjithë ne shqiptarët, urojmë nga thellësia e shpirtit mësueset dhe mësuesit e fëmijëve,  mbesave e nipërve tanë: Gëzuar këtë festë të bukur, edhe pse në një kohë anormale!

Bashkë me urimet, sot është dita të shprehim mirënjohjen për punën vetmohuese të mësuesve të Shqipërisë gjatë dy viteve të fundit shkollorë, të cilat do të jenë më të vështirat e karrierës së tyre.

Sot është dita të reflektojmë e të rikujtojmë se progresi i vendit varet nga progresi i arsimit dhe progresi i arsimit është në duart e sigurta të mësueseve dhe mësuesve të Shqipërisë.

Në dorën tuaj, që e kini zgjedhur këtë profesion jo për lehtësi, por si  një mision për të pasuruar e zbukuruar jetën e vajzave e djemve të Shqipërisë.
Mësuesi është  profesioni më  i ëndërruar dhe me më shumë ndikim në jetën e një vendi. Një komb merr fytyrën e mësuesve dhe të shkollave.

Mësuesit janë jo vetëm edukatorët, por lidershipi i vërtetë i kombit dhe i shoqërisë.
Nëse dëshirojmë t’u japim  një shans fëmijëve tanë, le t’u japim më parë një shans mësuesve të Shqipërisë.
Për gjithkënd  që e konsideron veten të suksesshëm, çelësi i suksesit  është mësuesi.

Prandaj asnjëherë nuk duhet të rreshtim t’u japim mësuesve kushte më të mira, pagë më të mirë dhe mirënjohjen më të thellë!”

Në festën e 7-Marsit,  edhe ministrja e Jashtme Olta Xhaçka ka shprehur mirënjohjen e saj ndaj mesuesve.

Ajo i ka shprehur mirënjohjen veçanërisht mësuese Adriana Fishta Bejkos si dhe 1 mijë mësuesve që kontribuojnë për mësimin e gjuhës shqipe në 21 vende të botës, duke shprehur edhe falënderime për përkushtimin dhe sakrificën e tyre.

“Mirënjohje për mësuese Adriana Fishta Bejko, Ambasadores së Kombit dhe mbi 1 mijë mësuesve që kontribuojnë për mësimin e gjuhës shqipe në 21 vende të botës.
Faleminderit për përkushtimin dhe sakrificën për të mbajtur gjallë gjuhën amtare tek brezi i ri.
Janë mbi 300 shkolla e kurse të gjuhës shqipe në diasporë, ku japin mësim mësues nga Shqipëria, Kosova dhe Maqedonia e Veriut, të cilët sfidojnë kufijtë dhe bashkojnë në një gjuhë brezin e ri.
Gëzuar 7 marsin”, shkruan Xhaçka.

Si sot, 134 vite më parë në qytetin e Korçës u hap Mësonjëtorja e Parë Shqipe, një ngjarje me rëndësi madhore në përpjekjet e popullit shqiptar për të krijuar shkollën e vet kombëtare.