Firmosi peticionin, humbi vendin e punës/ Shkarkohet nëndrejtori i Kadastrës Vlorë pasi mbështeti protestën e punonjësve

Struktura e Drejtorisë Vendore të Agjencisë Shtetërore të Kadastrës në Vlorë është transferuar zyrtarisht drejt Tiranës, duke sjellë mbylljen e institucionit në qytetin bregdetar.

Vendimi, i datës 23 janar 2026, është firmosur nga drejtoresha e përgjithshme e Kadastrës, Lorena Goxhobelli, dhe parashikon hyrjen në fuqi më 1 shkurt, datë nga e cila Vlora do të mbetet pa zyrë vendore të Kadastrës.

Ky vendim ka shkaktuar reagime të forta brenda institucionit. Punonjësit e Kadastrës së Vlorës kanë dalë në protestë dhe kanë dorëzuar një peticion, ku shprehen kundër zhvendosjes së institucionit në Tiranë, duke e cilësuar vendimin të padrejtë dhe të dëmshëm për qytetin.

Sipas burimeve brenda stafit të Hipotekës Vlorë, pas dorëzimit të peticionit, punonjësit kanë gjetur mbështetje nga zëvendësdrejtori i ASHK Vlorë, Sokol Shehaj. Megjithatë, po sipas këtyre burimeve, pas kësaj mbështetjeje ai është shkarkuar nga detyra.

Ndërkohë, raportohet se ndaj 55 punonjësve të institucionit po ushtrohet presion për përgatitjen dhe transferimin e dokumentacionit drejt Tiranës. Punonjësit shprehen se situata ka krijuar pasiguri dhe tension të lartë, duke vënë në rrezik vazhdimësinë e punës dhe stabilitetin e tyre në Vlorë.

Në shenjë reagimi, punonjësit kanë kërkuar ndërhyrjen dhe mbështetjen e përfaqësuesve të zgjedhur, ndërsa kanë vendosur të pezullojnë përkohësisht punën, deri në sqarimin e plotë të situatës dhe gjetjen e një zgjidhjeje të drejtë.

Drejtuesi politik i Ramës s’di gjë: Kur u mor vendimi?

Mbyllja e Kadastrës në Vlorë ka nxjerrë në pah kaosin dhe mungesën e përgjegjësisë së qeverisë në raport me shërbimet publike.

Drejtuesi politik i PS në Vlorë, Bledi Çuçi, deklaroi sot se nuk kishte dijeni për vendimin, duke ngritur pikëpyetje serioze mbi informimin e strukturave politike në terren.

I pyetur nga gazetarët për mbylljen e zyrës së Kadastrës, Çuçi u shpreh: “Kur ka dalë vendimi? Sot ka dalë? Nuk e di”.

Ndërkohë, i pyetur nëse do të këmbëngulë që Kadastra të mbetet në Vlorë, Çuçi u shpreh se “edhe qeveria duhet të vijë në Vlorë”, një deklaratë që duket se shmang thelbin e problemit.

Zhupa denoncon skemën e mbylljes së Kadastrës në Vlorë

Deputetja e Partisë Demokratike, Ina Zhupa, ka reaguar ashpër ndaj vendimit për mbylljen e Zyrës së Agjencisë Shtetërore të Kadastrës në Vlorë dhe transferimin e saj në Tiranë, duke e cilësuar atë si arbitrar, të paligjshëm dhe thellësisht antikushtetues.

Zhupa thekson se ky akt synon centralizimin abuziv të shërbimeve publike, cenon parimet e dekoncentrimit dhe decentralizimit, dëmton aksesin e qytetarëve në informacion dhe detyron punonjësit të heqin dorë nga marrëdhëniet e punës, ndërsa kërkon shfuqizimin e menjëhershëm të vendimit dhe vendosjen e përgjegjësisë ligjore për autorët e tij.

Reagimi i plotë i Ina Zhupës:

Mbyllja e Zyrës së Kadastrës në Vlorë dhe transferimi i saj në Tiranë është një vendim arbitrar, i paligjshëm dhe thellësisht antikushtetues. Një akt i pabazuar në ligj që shkel çdo parim të funksionimit të administratës publike.

Kjo mbyllje e menjëhershme synon centralizimin abuziv të shërbimeve, duke krijuar terren për korrupsion, vonesa të qëllimshme dhe pengesa artificiale për qytetarët e Vlorës.

Ky vendim:

largon shërbimet nga qytetarët

cënon parimin e dekoncentrimit dhe decentralizimit

dëmton rëndë aksesin në informacion

detyron punonjësit të dorëzojnë marrëdhëniet e punës për shkak se nuk do udhëtojnë çdo ditë nga Vlora në Tiranë dhe anasjelltas.

Ligji nr. 90/2012 e thotë qartë: shërbimet publike duhet të jenë pranë qytetarëve, jo të mbyllen me urdhra okulte nga Tirana.

Ky akt përbën një precedent të rrezikshëm dhe një goditje të drejtpërdrejtë ndaj qytetarëve të Vlorës. Ai duhet të shfuqizohet menjëherë, ndërsa firmëtarët duhet të mbajnë përgjegjësi ligjore dhe administrative për këtë vendim të paligjshëm dhe të dëmshëm.

Shërbimet publike nuk janë pronë private e askujt. Ato janë detyrim kushtetues ndaj qytetarëve./POLITIKO.AL