“Firmosnim si delet, lekët i merrnin ata”, përgjimet që fundosin skemën korruptive të Jonaid Myzyrit

Lindita Skeja, anëtare e pandehur e Komisionit të Prokurorimeve Publike, ka implikuar drejtpërdrejt kreun e KPP tashmë nën hetim, Jonid Myzyri, për abuzim me tenderin për mirëmbajtjen e një segmenti rrugor prej 58.7 kilometrash: “Rrëshen (Ura e Fanit) – Shpal, Shpal – Ura e Repsit”, me vlerë 2.3 milionë euro.

Abuzimi me tenderin në fjalë çoi Myzyrin në dyert e SPAK, të cilin Prokuroria e Posaçme e mori të pandehur për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim.

Nga përgjimet e Skejës del se Myzyri i ka kërkuar të hedhë firma duke e siguruar se do të jetë e mbrojtur nga titullari i institucionit ku ajo punonte. Skeja deklaron se nga firmat që hidhte, drejtuesit e institucionit merrnin para në këmbim.

Përgjimi i SPAK:

Speaker A (Lindita): Ai na majti kshu… që krijum besim që ne jemi miqtë e atij…ene rrimë të qetë. N’a ofroi mori informacione. Unë vajta dhe i shërbeva si qeni.

Speaker B: Hej zot!

Speaker A (Lindita): Vajta i shërbeva si qeni. I shërbeva me sy mbyll… e du edhe pikë. E du kshtu…firmos ne, të gjith si delet. Ime veme ku të n’a thërrasin. Rresht. Firmën ne e lekët ata.

Speaker B: A mos i hongert o Zot.

Speaker A (Lindita): Bojna se e dini ju se ç’ju boj unë, bojna… Më pas

Speaker A (Lindita): Amin…ata hop mrap ere… hop mrapa… hop mrapa me e çoi mu në KPP… më çoi mu në KPP, përballem atje me lloj lloj pislliku…

Speaker B: Pi hiç ere un sve po ene tha Dashi motrës tha mos shko…

Në dosjen hetimore, Prokuroria e Posaçme thekson se “nga rezultati i përgjimeve ngrihen dyshime të arsyeshme që në vendimmarrjen e KPP për shqyrtimin e ankesës me objekt: “Mirëmbajtje rutinë me performancë rruga Rrëshen (Ura e Fanit) – Shpal, Shpal-Q.Bene – Hadroj, Shpal – Ura e Repsit”, me fond limit 219.866.693 lekë pa TVSH si dhe në vendimmarrje të tjera, ekzistojnë elementë të veprimeve të kundraligjshme që mund të kenë ndikuar në këto vendime”.

Në kërkesën drejtuar GJKKO-së për masën ndaj Myzyrit, prokurori i SPAK, Elvin Gogaj ka argumentuar se “masa e sigurimit duhet të caktohet pasi ekziston rreziku i cenimit të provave, ai i ikjes, si dhe ai i kryerjes së veprave të tjera penale nga personi nën hetim Jonaid Myzyri”. “Ka dyshime të arsyeshme që ai mund të vërë në rrezik marrjen e provës apo vërtetësinë e saj, duke ndërhyrë tek personat që kanë dijeni për kryerjen e veprës penale dhe që nukj janë pyetur deri në këto momente, megjithëse veprimet po kryhen në dinamikë nga ana e Prokurorisë së Posaçme”.

Jonaid Myzyri ka filluar karrierën e tij në Komisionin e Prokurimeve Publike në vitin 2014. Megjithatë, rritja e tij profesionale është vënë re pas vitit 2019, kur Belinda Balluku mori drejtimin e Ministrisë së Infrastrukturës dhe Energjisë. Nga dhjetori 2019 deri në korrik 2020, Myzyri ka shërbyer si përgjegjës i Komisionit të Prokurimit Publik pranë kësaj ministrie, dhe më pas është emëruar si kryetar i Komisionit të Prokurimeve Publike në korrik 2020. Ky kalim i shpejtë në pozita të larta ka ngritur dyshime për ndikimin e mundshëm të Ballukut në karrierën e Myzyrit.