Garda nuk lejon median në ceremoninë e 29 nëntorit, gazetari: Tallje dhe fyerje! Na thonë është me regji

Duket se tashmë është bërë rrugë që gazetarët nuk lejohen të marrin pjesë në aktivitete të ndryshme të organizuara nga qeveria, ndonëse nuk janë partiake.

Gazetari Osman Stafa ka denoncuar sot në rrjetet sociale se media nuk është lejuar të hyjë në ceremoni përkujtimore ku nderohen të rënët çdo 29 nëntor tek Varrezat e Dëshmorëve.

Sipas tij, Garda i ka ndaluar me pretekstin se aktiviteti do të jetë me regji.

“Sot më 29 nëntor tek Varrezat e Dëshmorëve, si çdo vit, mbahet ceremoni përkujtimore ku nderohen të rënët.

Por ndryshe nga çdo vit tjetër këtë vit MEDIA nuk lejohet të futet brenda dhe të filmojë.

Nuk ka ndodhur asnjë vit tjetër. Po ndodh për herë të parë!

Unë kam nevojë që të zhvilloj lidhje të drejtpërdrejta për TV-në që punoj, nga Varrezat e Dëshmorëve. Sepse ky nuk është një aktivitet partiak, që të mos lejohemi. Garda e Republikës thotë vetëm që nuk lejohet media, se është me regji qëndrore. Nuk të thotë kush e ka dhënë urdhërin.

Shkon tek hyrja kryesore, të thonë, kalimi për mediat, është nga mbrapa. Shkon tek hyrja tjetër, aty të thonë që s'lejoheni.

Tallje dhe fyerje për mediat.

Nëse në këtë aktivitet, ka një ndodhi, "regjia" e institucionit që e organizon, ka interes ta fshehë.

Tashmë është bërë bajate, ideja që, nuk lejohen gazetarët se e kemi me regji.

Gazetarët duhet të lejohen. Kjo është puna jonë. Nuk mund të na e diktojë axhendën tonë të planeve, teksteve, pamjeve, politika. Ajo që ne kemi për subjekt të lajmeve tona.

Gazetarët duhet të hyjnë në çdo aktivitet, qofte me ose pa regji. Dhe ky duhet të jetë standard.

Unë dua të filmoj vetë, të marr planet që dua, të intervistoj kë unë mendoj se duhet.

Tjetra është censurë!!!”, shkruan gazetari.