Gazetarja: Ministri Manja volum transaksionesh për pasuri të paluajtshme, vila dhe tokë në Farkë

Gazetarja Ola Xama deklaron se ministri i Drejtësisë Ulsi Manja në tre vitet e fundit ka një volum shumë të lartë transaksionesh, shit-blerjesh të pasurive të patundshme, ndërkohë që në muajin shtator u bë ministër.

Nga studio e MCN Live, Xama tha se në deklaratat e pasurisë së ministrit Manja, rezultoi se kishte blerë 1 mijë metër katrorë sipërfaqe toke në zonën e Farkës së Vogël, për 30 mijë euro, por çmimi i blerjes rezulton thuajse sa gjysma e vlerës së tregut.

"Farka ofron komplekse vilash të cilat ndjekin tipologjinë e Lundrës, për familjet e pasura që duan të jetojnë në qetësi në periferi të Tiranës.

Nëse shohim çmimet që ofrojnë kompanitë e ndërtimit të vilave, janë shumë të larta, mund të shkojnë në 500-600 mijë euro nga bisedat që kam patur me agjencitë imobiliare.

Zoti Manja e ka blerë tokën për 30 mijë euro në maj të vitit 2021. Pyeta Agjencinë e Kadastrës, për çmimin mesatar të shitjes së tokës në atë zonë kadastrale.

Ishte afro 55 euro metër katrorë nga 30 euro për metër që e kishte blerë zoti Manja.

Personi që ia kishte shitur tokën ishte ish-administratori i njësisë Zall Herr, Arben Maloku, i cili e kishte blerë tokën në 2017 nga një person që e kishte përfituar përmes një akti të marrjes së tokës në pronësi.

Maloku kishte blerë një tjetër tokë po në zonën kadastrale, por jo me çmimin që ia ka shitur zotit Manja, me çmimin 130 euro metri katror.

Gati katër herë më të lartë nga sa ia ka shitur zotit Manja.

A është real transaksioni që ia ka shitur zotit Manja? Dukshëm kuptohet që toka që ka blerë zoti Manja ka qenë ndjeshëm më lartë në vlerë.

Në Farkë nuk gjendet asnjë tokë me vlerën 100 euro metri katror.

Ndërsa zoti Manja e ka blerë në një zonë pranë liqenit të Farkës pranë vijës së parë dhe është blerë shumë më lirë nga vlera reale e tregut.

Që prej vitit 2020 agjencitë imobiliare thonë se Farka e ka pasur çmimin për metër katrorë nga 100 euro e lartë.

Ministri i Drejtësisë nuk mund të mashtrojë se e ka blerë më shtrenjtë dhe ta deklarojë më lirë. Ka ose lidhje nderi, ose lidhje që mbeten për tu hulumtuar.

Lidhja që dihet është se si Arben Maloku dhe zoti Manja, janë nga e njëjta parti.

Dukshëm është që transaksioni është nën vlerën e tregut dhe nën interesin e palës shitëse.

Një pjesë e madhe e pasurisë së zotit Manja vjen nga pasuritë e paluajtshme dhe rritja e vlerës së pasurive të paluajtshme.

Rezultoi se zoti Manja bashkë me kompaninë Brunes, ka aplikuar për leje ndërtimi.

Fqinjë që kanë blerë tokën në Farkë janë pronarë të kompanisë Brunes.

Me 30 mijë euro ti bëhesh pronar i një vile që mund të ketë 500 mijë euro vlerë.

Manja ka lidhur marrëveshje me kompaninë Brunes që i jep tokën dhe do të marrë një vilë me vlerë 500 mijë euro.

Leja është në proces shqyrtimi sipas Bashkisë Tiranë.

Ajo që duket është nëse ka ose jo një konflikt interesi, se zoti Manja në vitin 2021 para se të lidhte akt-marrëveshje me kompaninë Brunes a pasur postin e ministrit të Drejtësisë, ku qeveria ka marrë vendimin për t’i kaluar tokë me 1 euro disa mijëra metra në portin e Marina Vlorës dhe po ashtu kontratën koncensionare “Brunes”.

Ministria e Drejtësisë është ministria e linjës që jep dhe bën analizën ligjore për çdo projekt-akt nëse është në përputhje me Kushtetutën, kodet dhe ligjet e vendit.

Është ministria që duhet të thotë po ose jo, nëse një projekt-akt kalon dhe vazhdon për miratim në Këshillin e Ministrave ose jo.

Këtu ka pikëpyetje që duhen parë nëse ka konflikt të mundshëm interesi ose jo", tha ajo.