Goditet karteli shqiptar i ko*ainës në Itali, hallka kyçe në trafikun e 3.5 tonëve kokainë të 'Ndranghetës'

Autoritetet italiane kanë goditur një nga rrjetet më të mëdha të trafikut ndërkombëtar të kokainës, ku një rol të rëndësishëm e luanin ndërmjetës dhe furnizues me origjinë shqiptare, shkruajnë mediat italiane.

Operacioni i Guardia di Finanza-s, në bashkëpunim me DDA-në e Milanos, çoi në arrestimin e 28 personave të lidhur me klanin Barbaro të ’Ndranghetës, duke zbuluar një mekanizëm të sofistikuar trafiku që sillte kokainë nga Amerika e Jugut drejt Evropës.

Roli i shqiptarëve: lidhja direkte me furnizuesit në Amerikën e Jugut

Gjatë hetimeve, të zhvilluara përmes pajisjeve të koduara dhe bashkëpunimit me Europol dhe Eurojust, u zbulua se anëtarët e ’Ndranghetës në Lombardi kishin kontakte të drejtpërdrejta me ndërmjetës shqiptarë, të cilët vepronin si ura lidhëse me furnizuesit e kokainës në Kolumbi dhe Brazil. Sipas dosjes hetimore, këta shqiptarë ishin thelbësorë për garantimin e furnizimeve të mëdha dhe për negociatat me kartelët e Amerikës së Jugut.

Hetimi tregon se shqiptarët shfaqeshin si figurat kyçe që siguronin cilësinë, sasinë dhe rrugët e transportit të drogës – duke e bërë grupin e tyre një element strategjik brenda operacionit të klanit Barbaro.

Rrjeti i mesazheve të koduara dhe itineraret e drogës

Kokaina transportohej me anije kontejnerësh dhe fshihej brenda ngarkesave të rregullta tregtare, përmes teknikës së “grabitjes”. Portet kryesore të përdorura ishin Livorno, Rotterdam, Gioia Tauro dhe Le Havre. Pikërisht në këtë hallkë, sipas hetuesve, ndërmjetësit shqiptarë garantonin kontaktin me furnizuesit dhe koordinimin e dërgesave.

Pastrimi i parave dhe pagesat e trafikut

Organizata përdorte edhe shërbime të errëta financiare, ku një shtetas kinez siguronte kalimin e parave përmes sistemit informal “Fei Ch’ien”. Por pagesat kryesore për furnizuesit e kokainës, sipas hetimit, kalonin përmes kanaleve të siguruara nga ndërmjetës shqiptarë që kishin rrjetet e veta financiare dhe kriminale në Evropë.

Autoritetet italiane kanë dokumentuar më shumë se 3.5 tonë kokainë të importuar nga rrjeti, ndërsa 400 kilogramë u sekuestruan në operacionet e fundit. Vetëm ngarkesa e fundit e kapur do të vlente mbi 27 milionë euro në treg.

Sipas DDA-së së Milanos, struktura kriminale ishte ndërtuar si një bosht Italo-Shqiptar, ku ’Ndrangheta garantonte logjistikën dhe territorin, ndërsa elementët shqiptarë ruanin lidhjet me burimin, çmimet dhe itineraret e trafikimit.

Operacioni konsiderohet si një prej goditjeve më të rëndësishme ndaj bashkëpunimit ndërmjet krimit të organizuar shqiptar dhe atij kalabrez, një aleancë që për vite ka kontrolluar pjesën më të madhe të kokainës që qarkullon në Europë.