"Pas humbjes, drejt ringritjes", Hapet GoFundMe për të rindërtuar shtëpinë e shembur nga shteti në Theth

Fushata e fundit e qeverisë për të çliruar “tokat e zaptuara”, ka prerë në mes mundin e shumë qytetarëve shqiptarë duke i lënë dhe pa një çati mbi krye.

Në një akt që i ka zënë të gjithë të papërgatitur, autoritetet kanë shembur dhe shtëpinë e Arjanit dhe Besnikut në Theth, duke i lënë ata në qiell të hapur.

Banesa e tyre, ndërtuar në pronën familjare dhe në pritje të procesit të legalizimit, u rrëzua nga fadromat e IKMT-së.

Sipas familjarëve, shtëpia ndodhej në tokë të trashëguar brez pas brezi, dhe procesi gjyqësor për legalizimin ishte ende i hapur.

Megjithatë, nuk u dhanë as paralajmërime zyrtare, as afate për mbrojtje ligjore.

Me qëllimin për të mbledhur fonde për të rindërtuar shtëpinë në tokën e tyre dhe për të rifilluar jetën aty ku ajo u ndërpre, është hapur një GoFund Me.

Për të kontribuar apo për të shpërndarë fushatën, ndiqni këtë link:https:GOFUNDME

Postimi i plotë

Të dashur miq, familjarë dhe njerëz të mirë,

Jemi duke nisur këtë fushatë për të ndihmuar Arjanin dhe Besnikun, të cilëve u është shkatërruar shtëpia padrejtësisht gjatë fushatës së fundit të qeverisë për të çliruar "tokat e zaptuara”.

Vetëm javën e kaluar, shtëpia e tyre u shemb nga autoritetet, bashkë me banesa të tjera në zonë, pavarësisht se ata ishin në një proces gjyqësor të hapur për legalizimin e banesës së tyre.

Ata nuk morën asnjë paralajmërim real apo dokument zyrtar, dhe nuk iu dha asnjë afat apo mundësi për të mbrojtur pronën dhe të drejtën e tyre përmes rrugëve ligjore.

Shtëpia, e ngritur me shumë mund dhe përkushtim, ndodhej në pronën e tyre familjare, në Theth. Ajo nuk ishte thjesht një ndërtesë, ishte një ëndërr që po merrte formë, një strehë e sigurt për familjen e tyre, e ndërtuar me vite kursimesh, djersë dhe sakrifica.

Me një vendim të menjëhershëm dhe të padrejtë, ata humbën gjithçka: strehimin, sigurinë dhe punën e një jete të tërë.

Për këtë arsye po hapim këtë GoFundMe, me qëllimin që t’i ndihmojmë të rindërtojnë jetën aty ku ajo u ndërpre padrejtësisht, në pronën e trashëguar nga të parët e tyre brez pas brezi. Me ndihmën tuaj, ata mund të ringrihen në tokën që u përket me të drejtë, për të vazhduar jetën me dinjitet, për të pasur strehë, siguri dhe shpresë.

Çdo kontribut, sado i vogël, është një ndihmë e madhe. Nëse nuk mund të kontribuoni financiarisht, ju lutemi ndajeni këtë fushatë me rrjetin tuaj. Solidariteti juaj në këto momente është i paçmueshëm. Ju falënderojmë nga zemra për mbështetjen tuaj.