Harry Bajraktari: Jepini fund dominimit të PS, votoni kandidatët e 'Bashkë Fitojmë'

Harry Bajraktari, themeluesi dhe botuesi i gazetës “Ilyria” dhe udhëheqësi filantropist shqiptaro-amerikan i ka bërë thirrje qytetarëve që në zgjedhjet vendore të 14 majit t’i japin fund dominimit të jetës politike të Partisë Socialiste në Shqipëri.

Në një opinion, Bajraktari shkruan se ka ardhur koha pas 8 vitesh që shqiptarët të mos humbasin shansin për të votuar partinë politike dhe kandidatin e preferuar. Mënyra më e mirë për t’i dhënë fund dominimit të PS, siç thotë Bajraktari, është vota për koalicionin “Bashkë Fitojmë”.

Bajraktari shkruan se kandidatët e koalicionit "Bashkë Fitojmë" kanë dalë nga primaret zgjedhje të stilit amerikan, ndryshe nga të tjerat që janë caktuar nga kryetarët e partive.

Postimi:

Zgjedhjet e ardhshme vendore të 14 majit në Shqipëri, janë ndër më të rëndësishmet në historinë e pluralizmit shqiptar.

Pas tetë vitesh më në fund shqiptarët do të kenë mundësinë të zgjedhin mes një morie kandidatësh për kryetarë bashkie dhe këshilla bashkiakë.

Kjo është një kthesë e rëndësishme demokratike dhe shqiptarët nuk duhet të humbasin shansin për të votuar për kandidatët dhe partitë e tyre të preferuara. Ky është një shans për njerëzit që t’u dëgjohet zëri. U bëj thirrje të gjithë shqiptarëve që të ushtrojnë të drejtën e tyre të shenjtë për të votuar.

Ky është gjithashtu një shans i mirë për t’i dhënë fund dominimit të jetës politike dhe publike në Shqipëri nga Partia Socialiste. PS ka pasur mjaft kohë për të zbatuar vizionin e saj dhe arritjet thjesht lënë për të dëshiruar.

Socialistët e kanë kthyer vendin praktikisht me një sistem njëpartiak. Ata sunduan pothuajse të gjitha bashkitë dhe tani po përdorin burimet shtetërore për fushatën zgjedhore.

Nuk mund të ketë ekonomi të suksesshme, drejtësi të vërtetë, të ardhme të garantuar nën një regjim autokratik. Nuk mund të presësh që t’i bashkohesh familjes së demokracive perëndimore si një sistem njëpartiak.

Pluralizmi dhe rotacioni i pushtetit është thelbësor për një demokraci dhe socialistët e kanë qendruar tashmë mjaft gjatë në fuqi. Tepër pushtet politik dhe shtetëror është grumbulluar vetëm në duart e një njeriu. Tani, vendi ka nevojë për një sinjal të fortë ndryshimi.

Mënyra më e mirë për ta arritur këtë është vota për grupimin më të madh të opozitës: Koalicionin 'Bashkë Fitojmë', me në krye ish-Kryeministrin Dr. Sali Berisha dhe ish-Presidentin Ilir Meta. Edhe partitë e tjera opozitare kanë kandidatë të mirë, por ato nuk kanë mundësi që të fitojnë dhe druhem se vota për ta do të shkojë dëm dhe do të ndihmojë socialistët që të fitojnë sërish.

Më e rëndësishmja, kandidatët e koalicionit 'Bashkë Fitojmë' kanë dalë nga zgjedhje primare të stilit amerikan, ndryshe nga të tjerët që janë caktuar nga kryetarët e partive. Ky është një shembull demokracie.

Në 14 maj votoni për kandidatët e popullit, jo për të emëruarit e kryetarëve. Votoni për të ardhmen e fëmijëve dhe nipërve tuaj! Votoni për të ardhmen e Shqipërisë. Riktheni demokracinë dhe bëhuni si shembull për mbarë kombin shqiptar.

Më 14 maj votoni për ndryshim! Jepini demokracisë një shans!