Haxhi 2025/ Gjithçka që duhet të dini rreth pelegrinazhit vjetor në Mekë

Miliona myslimanë në mbarë botën po përgatiten për Haxhin 2025, pelegrinazhin vjetor islamik në Mekë dhe një nga udhëtimet më të rëndësishme shpirtërore në fenë Islame.

Haxhi pritet të zhvillohet nga 4 qershori deri më 9 qershor, në pritje të konfirmimit nga komiteti zyrtar i Arabisë Saudite për vëzhgimin e hënës.

Një shtyllë e Islamit

Haxhi është një nga “Pesë Shtyllat” e Islamit, duke e bërë atë të detyrueshëm për të gjithë myslimanët e aftë fizikisht dhe financiarisht, të paktën një herë në jetën e tyre.

Pelegrinazhi ndodh gjatë Dhu al-Hixhxhes, muajit të dymbëdhjetë të kalendarit islamik, dhe përfshin një sërë ritualesh të kryera gjatë pesë deri në gjashtë ditëve.

Pelegrinazhi i Haxhit përfshin disa rituale të rëndësishme:

Ihram: Pelegrinët fillojnë duke hyrë në një gjendje pastërtie shpirtërore të njohur si ihram. Kjo përfshin veshjen e rrobave të thjeshta e të bardha, dhe abstenimin nga veprime të caktuara, siç janë prerja e flokëve ose e thonjve, grindjet dhe angazhimi në aktivitete seksuale.

Tawaf dhe Sai: Pelegrinët kryejnë shtatë xhiro në kahun e kundërt të akrepave të orës rreth Qabes (tawaf), të ndjekura nga ecja shtatë herë midis kodrave të Safasë dhe Marvasw (sai).

Mina: Pelegrinët udhëtojnë për në Mina, një qytet tendash jashtë Mekës, dhe e kalojnë natën në lutje dhe reflektim.

Arafati: Dita e Arafatit, e cila bie më nëntë të muajit Dhu al-Hixhxhe, konsiderohet si një nga ditët më të rëndësishme, jo vetëm të Haxhit, por të të gjithë kalendarit islamik.

Pasi bëjnë udhëtimin 15 kilometra nga Mina, pelegrinët e kalojnë ditën në Xhebel Arafat, i njohur edhe si Xhebel al-Rahmah - ose Mali i Mëshirës - në një lutje të nderuar të njohur si wuquf.

Vendi nderohet veçanërisht si vendi ku Profeti Muhamed mbajti predikimin e tij të fundit.

Shumë myslimanë në mbarë botën gjithashtu zgjedhin të agjërojnë në këtë ditë.

Muzdalife: Pas perëndimit të diellit, pelegrinët shkojnë në Muzdalife, ku mbledhin guralecë për ritualin e ditës tjetër dhe e kalojnë natën nën qiell të hapur.

Ramy al-Jamarat: Pasi mbërrijnë përsëri në Mina, pelegrinët kryejnë vrasjen simbolike me gurë të djallit, duke hedhur guralecë në tre shtylla, duke përkujtuar refuzimin e Profetit Ibrahim ndaj tundimit të djallit.

Kurban Bajrami: Kurban Bajrami do të mbahet më 10 Dhul-Hixhe. Data e festës ende nuk është përcaktuar.

Sakrifica e kafshëve: Pelegrinët marrin pjesë në therjen rituale të një qengji, duke reflektuar gatishmërinë e Profetit Ibrahim për të sakrifikuar të birin.

Tawaf al-Ifadah: Pelegrinët kthehen në Mekë për të kryer një tjetër rrotullim rreth Qabesë, duke nënkuptuar një pastrim më të thellë.

Tavafi i lamtumirës: Përpara se të nisen nga Meka, pelegrinët kryejnë tavafin e fundit, duke shënuar përfundimin e pelegrinazhit të tyre.

Paralajmërime kundër vizave mashtruese të Haxhit dhe agjentëve të paautorizuar

Përpara sezonit të vitit 2025, Ministria Saudite e Haxhit dhe Umres lëshoi paralajmërime të ashpra kundër bashkëpunimit me agjentë udhëtimesh të paautorizuar dhe fushata mashtruese të Haxhit.

Pelegrinëve u është kërkuar të rezervojnë ekskluzivisht përmes platformës zyrtare Nusuk për të siguruar paketa legjitime të Haxhit.

Ministria e Brendshme njoftoi se individët që gjenden duke ndihmuar ose strehuar mbajtësit e vizave të pavlefshme, siç janë vizat turistike ose të vizitës, gjatë sezonit të Haxhit mund të përballen me gjoba deri në 26,600 dollarë (100,000 SAR).

Përsëritja e shkeljeve mund të çojë në gjoba më të larta.

Për më tepër, janë raportuar reklama mashtruese në mediat sociale që promovojnë shërbime të rreme të Haxhit.

Pelegrinët inkurajohen të verifikojnë vërtetësinë e çdo oferte që lidhet me Haxhin dhe të raportojnë aktivitete të dyshimta tek autoritetet./ Al Arabiya English.