Flash News

Plagosja e djeshme në Durrës, 36-vjeçari ishte me dy të mitur në makinë kur u qëllua

AMP arreston në flagrancë dy punonjës policie dhe pezullon nga detyra një tjetër

Alarmi për bombë në një hotel në Tiranë, çfarë zbuloi policia

Video/ Alarmi për bombë në parkingun e një hoteli në Tiranë, reagon policia

Të shtëna me armë zjarri në Durrës, një i plagosur

E-TJERA

I ati u ekzekutua mbrëmjen e sotme në Lezhë/ Kush ishte Roan Brahimi, i dyshuari për atentate dhe rival i Ervis Martinajt

Politiko 17 Prill 2025, 20:49

I ati u ekzekutua mbrëmjen e sotme në Lezhë/ Kush ishte Roan

Mbrëmjen e sotme është regjistruar një tjetër atentat me armë zjarri në fshatin Pllanë të Lezhës, ku ka mbetur i vrarë Gjovalin Prendi, babai i Roan Brahimit, i njohur ndryshe si Sidorel Prendi.

Sipas të dhënave paraprake, viktima është qëlluar me armë zjarri nga persona ende të paidentifikuar. Autorët janë larguar menjëherë nga vendngjarja dhe aktualisht janë në kërkim nga policia. Zona është rrethuar, ndërsa hetimet janë në fazë të parë dhe po shqyrtohen të gjitha pistat, përfshirë edhe hakmarrjen.

Ngjarja ndodh gati një vit pas vrasjes së Roan Brahimit, i cili u ekzekutua më 9 maj 2024 në një atentat mafioz në Athinë, Greqi. Në atë sulm mbeti e plagosur edhe bashkëshortja e tij, Katerina Beqo.

Kush ishte Roan Brahimi?
Roan Brahimi ishte një emër i njohur për drejtësinë shqiptare dhe policinë. Ai ishte i dyshuar për përfshirje në disa ngjarje të rënda kriminale, përfshirë atentatin ndaj Ylli Ibrahimit në vitin 2021 në Zejmen të Lezhës, ku mbeti i vrarë Klisman Preçi. Në atë ngjarje të dhunshme, autorët kishin hyrë të armatosur me kallashnikovë në një lokal duke kërkuar pronarin.

Për të njëjtën ngjarje janë shpallur në kërkim edhe Ramazan Rraja, nipi i deputetit të PS Rrahman Rraja, dhe Alesio Dobrozi.

Në atentatin ndaj Ibrahimit, janë qëlluar 108 plumba blindshpues mbi mjetin e tyre të blinduar. Preçi u vra menjëherë sapo doli nga makina, ndërsa Ibrahimi mbijetoi, por refuzoi të bashkëpunonte me prokurorinë.

Roan Brahimi përflitet gjithashtu si i përfshirë në atentatin mafioz ndaj Brilant Martinajt, kushëri i Ervis Martinajt – ish-“mbreti” i botës së krimit në Shqipëri, i zhdukur prej vitesh. Në atë atentat më 17 korrik 2022 në mbikalimin e Fushë-Krujës, u vranë edhe Besmir Hoxha dhe Dikler Vata.

Pista e hakmarrjes?
Ekzekutimi i babait të Roan Brahimit pritet të hetohet edhe në kontekstin e konflikteve të vjetra të djalit të tij. Ngjarja ngre dyshime për një hakmarrje të mundshme ndaj familjes, në një zinxhir të gjatë vrasjesh që prej kohësh ka përfshirë Lezhën dhe zonat përreth.

Autoritetet po hetojnë me prioritet për të zbardhur motivet dhe për të identifikuar autorët e atentatit të sotëm. Pritet një reagim zyrtar nga Policia e Shtetit dhe Prokuroria.

Të fundit