Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

I lidhur edhe me mafien shqiptare, ekstradohet në SHBA bosi i drogës 'Fito'

Politiko 21 Korrik 2025, 08:43

Adolfo Macías Villamar, i njohur me nofkën “Fito” dhe udhëheqës i fuqishëm i bandës ekuadoriane Los Choneros, është ekstraduar në Shtetet e Bashkuara për t’u përballur me akuza ndërkombëtare për trafik droge dhe armësh. Ai pritet të paraqitet të hënën në një gjykatë federale në Bruklin, ku sipas avokatit të tij do të deklarohet i pafajshëm, shkruan apnews.

Ekstradimi i Macías vjen pas arrestimit të tij në qershor, afro një vit pas arratisjes nga një burg i sigurisë së lartë në Ekuador, ku po vuante një dënim me 34 vjet për një sërë krimesh të rënda. Policia e gjeti atë të fshehur në një bunker nëntokësor nën një vilë luksoze në qytetin bregdetar të Mantës, dhe më pas e transferoi në burgun famëkeq të sigurisë maksimale “La Roca”.

Banda e tij, Los Choneros, ka lidhje të fuqishme me kartelet meksikane dhe grupet kriminale nga Ballkani, dhe akuzohet për shndërrimin e Ekuadorit nga një destinacion turistik në një nga vendet me nivelet më të larta të vrasjeve në rajon. Fito dyshohet gjithashtu si urdhëruesi i vrasjes së kandidatit presidencial Fernando Villavicencio në vitin 2023.

Sipas një raporti investigativ të publikuar nga mediat lokale, autoritetet ekuadoriane kanë identifikuar një organizatë kriminale që operonte në Guajakali, e udhëhequr nga "Fito" dhe Samir Maestre, alias "Samir". Në këtë strukturë, ishin përfshirë edhe biznesmenë shqiptarë si Dritan Gjika, të cilët luanin rol në eksportin e drogës drejt Evropës, duke përdorur kompani të eksportit si mbulesë për aktivitetet e tyre ilegale.

Në një intervistë para disa kohësh, gazetari investigativ Artan Hoxha ka treguar se shqiptarët kanë një rol të rëndësishëm në trafikun e kokainës në Ekuador, duke bashkëpunuar me figura si "Fito" për të organizuar rrjetet e trafikut drejt tregjeve evropiane.

Autoritetet ekuadoriane konfirmuan se Macías u dorëzua të dielën në mëngjes autoriteteve amerikane. Presidenti i Ekuadorit, Daniel Noboa, e përshëndeti ekstradimin si një fitore në përballjen me krimin e organizuar dhe nënvizoi se lufta ndaj bandave do të vijojë pa kompromis.

Më shumë se 70% e kokainës që prodhohet globalisht kalon aktualisht nëpër portet e Ekuadorit, vend që gjendet mes dy eksportuesve më të mëdhenj të saj, Kolumbisë dhe Perusë. Në një intervistë për BBC në mars, Presidenti Noboa tha se dëshiron të angazhojë aleatë ndërkombëtarë, përfshirë SHBA-në, BE-në dhe Brazilin, në përpjekjen për të shkatërruar rrjetet kriminale që po destabilizojnë vendin.

Avokati i Macías, Alexei Schacht, deklaroi se klienti i tij do të mbahet në një burg federal të caktuar më pas, për një kohë të pacaktuar, ndërsa procedurat gjyqësore do të zhvillohen në SHBA. Referendumi i prillit, në të cilin qytetarët ekuadorianë miratuan ekstradimin e shtetasve të tyre, i hapi rrugën këtij zhvillimi të rëndësishëm në betejën kundër krimit të organizuar në vend.