Atentati në Tiranë, gruaja e Roan Brahimit thyen heshtjen: S'kam konflikte me askënd

Një seri atentatesh tronditën vendin brenda pak orësh, ku një person mbeti i vrarë dhe katër të tjerë të plagosur. Ndërkohë raportohet se dinamika e atentatit në Tiranë ka marrë një kthesë të re, me dyshime të forta se autorët kanë ngatërruar shënjestrën.

Sipas hetimeve paraprake, dyshohet se objektiv i atentatit të ndodhur në zonën e Lundrës ka qenë bashkëshortja e Roan Brahimit (emër i njohur edhe si Sidorel Prendi), ndërkohë që katër personat e plagosur mendohet të jenë qëlluar gabimisht.

Burime për mediat bëjnë të ditur se autorët mund të kenë patur informacion se gruaja e Roan Brahimit ndodhej në Tiranë në momentin e atentatit. Ajo vetë, në dëshminë e dhënë para hetuesve, ka deklaruar se nuk e di kush mund të jenë autorët dhe nuk e di nëse ka lidhje ngjarja në Tiranë me ekzekutimin e vjehrrit të saj, Gjovalin Prendi, në Lezhë.

Atentati në Tiranë – Plagosja e katër të pafajshmëve

Ngjarja ndodhi rreth orës 21:30, kur një automjet tip “G-Class” u bë shënjestër e një breshërie plumbash nga persona të armatosur ende të paidentifikuar. Brenda mjetit ndodheshin katër persona: Arenc Stafa, 34 vjeç (shoferi), Kian Mullahi, 19 vjeç, dhe dy të miturit Dior Demiraj, 11 vjeç, dhe Marko Demiraj, 17 vjeç. Ata ishin nisur për të festuar ditëlindjen e 11-vjeçarit dhe ishin në kthim për në shtëpi.

Autorët kanë nisur ndjekjen dhe qëllimet me armë që nga rrethrrotullimi i Shkozës deri te zona e TEG-ut, për të vijuar më tej drejt Lundrës. Për t’iu shmangur atentatit, shoferi ka tentuar të largohet me shpejtësi, por pas disa kilometrash mjeti është përplasur dhe është ndalur.

Të katër pasagjerët u plagosën si pasojë e të shtënave. Arenc Stafa dhe Kian Mullahi ndodhen jashtë rrezikut për jetën. Marko Demiraj është gjithashtu në gjendje stabile, ndërsa Dior Demiraj mbetet në gjendje më të rëndë shëndetësore. Familjarët e të plagosurve janë lajmëruar nga policia një orë pas atentatit. Të gjithë të rinjtë e plagosur dhe shoferi nuk kanë precedent penal dhe nuk rezulton të kenë pasur konflikte.

Ekzekutimi në Lezhë – Hakmarrje apo paralajmërim?

Vetëm disa orë para atentatit në Tiranë, në fshatin Pllanë të Lezhës u ekzekutua me armë zjarri 65-vjeçari Gjovalin Prendi, vjehrri i Roan Brahimit. Ai u qëllua me breshëri nga tre persona të armatosur teksa ndodhej në lokalin e tij. Dy prej autorëve, të maskuar, zbritën nga një fuoristradë dhe qëlluan në drejtim të viktimës, duke e plagosur rëndë në kraharor. Ai u dërgua me urgjencë në spital, por nuk mundi t’i mbijetojë plagëve.

Ky është sulmi i tretë ndaj lokalit të familjes Prendi, i cili më herët është goditur me armë dhe me lëndë plasëse. Dyshohet se vrasja ka lidhje me hakmarrje për shkak të përfshirjes së djalit të tij, Roan Brahimi, në çështje kriminale. Megjithatë, vetë 65-vjeçari njihej si njeri i respektuar në zonë dhe përpiqej të ndalte ciklin e dhunës dhe gjakmarrjes.

Hetimet – Asnjë pistë e qartë për momentin

Policia dhe prokuroria janë duke hetuar në disa pista. Edhe pse ende nuk ka një pistë zyrtare për asnjërën nga ngjarjet, dyshohet se vrasja në Lezhë dhe atentati në Tiranë mund të jenë të lidhura. Grupi hetimor është duke analizuar lëvizjet e personave të përfshirë dhe të afërmve të tyre, ndërsa po hetohet mundësia që autorët të kenë ngatërruar objektivin, duke qëlluar katër të pafajshëm në Tiranë, ndërkohë që shënjestra e tyre e vërtetë mund të ketë qenë dikush tjetër.

Ngjarjet kanë ngritur alarmin për një përshkallëzim të rrezikshëm të dhunës kriminale, ku përfshihen edhe persona të pafajshëm. Policia është vënë në ndjekje të autorëve dhe ka sekuestruar pamjet e kamerave të sigurisë përgjatë rrugës së ndjekjes për të identifikuar mjetin dhe autorët.