Atentati në Vlorë/ Pasagjeri që shoqëronte Birçajn polic anti-droge, viktimës i gjendet pistoletë në brez

Detaje të reja janë zbardhur nga atentai i mirëorganizuar i regjistruar mesditën e djeshme në Vlorë, ku ekzekutua me breshëri kallashnikovi biznesmemi Bledar Birçaj.

Pasagjeri i cili ishte në makinë me Birçajn, në momentet kur ky i fundit u qëllua për vdekje me armë zjarri mësohet se është punonjës i policisë së Vlorës. Ai është me detyrë polic antidroge dhe është identifikuar si shtetasi me iniciale G.Ç. Nga pamjet e një kamera sigurie, ai duket teksa largohet pasi autorët qëllojnë ndaj drejtuesit të automjetit tip BMW X5, Bledar Birçaj. Nga video e qarkulluar në media, në një moment ai tenton të nxjerrë dhe një send nga çanta e tij e cila dyshohet se ishte pistoletë.

"Ishim të papërgatitur, na bënë pritë. Ramë direkt pre e breshërisë së kallashnikovit. Pashë dy veta me maska, por nuk i njoha dot. Ishin të kamufluar. Nuk jam në dijeni të ndonjë konflikti të fundit. Jam i tronditur, mendova se më kapën edhe mua plumbat." - mësohet të ketë thënë shoqëruesi i Bledar Birçajt para grupit hetimor.

Gjithashtu mësohet se edhe viktima Bledar Birçaj qarkullonte i armatosur. Pas krimit, viktimës i është gjetur në brez një pistoletë "Beretta" e mbushur me krehër.

Dinamika e ngjarjes:

Krimi ndodhi ditën e djeshme në lagjen “Hajro Çakërri”, Vlorë. Viktimës i ishte zënë pritë nga dy persona të maskuar dhe të armatosur, në zonën e quajtur ‘Bishti i Kalldrëmit’ në qytetin bregdetar. Autorët dolën nga një makinë ngjyrë e bardhë dhe qëlluan me breshëri në drejtim të shoferit dhe më pas u larguan me shpejtësi nga vendi i ngjarjes me të njëjtin mjet. Në makinë e autorit ndodhej dhe një person tjetër në sediljen e parë, me detyrë polic antidroge, të cilin fatmirësisht nuk e kapi asnjë plumb. Ai del nga makina dhe largohet me shpejtësi pas krimit.

Në vendin e ngjarjes u gjetën mbi 30 gëzhoja. Makina e autorëve mund të jetë strehuar edhe në ndonjë garazh pasi nuk ka asnjë gjurmë deri tani.

Hetimet

Dyshimet e grupit hetimor janë se kemi të bëjmë me një atentat të mirëmenduar dhe se autorët janë vrasës me pagesë. Dyshimet janë se ngjarja mund të ketë lidhje me një hakmarrje të mundshme. Raportohet se Bledar Birçaj kishte tre javë që ishte kthyer nga Spanja.

Viktima me precedent penal

Pistë kryesore e grupit të hetimit është e shkuara e viktimës në Spanjë. Ai rezulton i dyshuar si i përfshirë në një tjetër ngjarje në vitin 2011, por hetimet në lidhje me këtë çështje u pushuan për mungesë provash.

Së fundmi ai kishte qëndruar më shumë kohë në Spanjë prej nga bënte shpesh vajtje ardhje nga Shqipëria. Në Vlorë nuk njihej si person problematik por si biznesmen pasi ishte pronar i një lokali të quajtur “The Boss” të njohur në zonën e Lungomares.