E-TJERA

Denoncimi Bashës për viktimat nga COVID, mjeku për Politiko: Qeveria i fsheh statistikat për propagandë, deklarata e mjekëve për Bashën ishte partizane

Denoncimi Bashës për viktimat nga COVID, mjeku për Politiko:

Mjeku i njohur Ilir Allkja komentoi denoncimin e kredemokratit Lulzim Basha se po fshihet numri i vërtetë i viktimave nga COVID-19. Ai mendon se qeveria po fsheh statistikat për propagandë.

Në një intervistë për Politiko.al mjeku renditi disa nga arsyet pse shifrat janë jashtë realitetit, ndërsa theksoi se menaxhimi i pandemisë është shoqëruar nga mungesa e transparencës.

I pyetur për qëndrimin e mjekëve lidhur me fshehjen e shifrave, Allkja i cilësoi deklaratat e tyre "partizane". Ai shtoi se disa mjekë janë përpjekur të mbrojnë "nderin" e nëpërkëmbur të qeverisë.

Si e komentoni denoncimin e një dite më parë nga kryetari i PD-së, Lulzim Basha, i cili nxori të dhëna se numri i vërtetë i jetëve të humbura nga COVID-19 po fshihet?

Me sa dëgjova Basha nuk akuzoi mjekët për fshehjen e vdekjeve nga Covid-19 por strukturat që përgatisin komunikimet me publikun. Personalisht duke parë angazhimin e fortë të kryeministrit të vendit që ngre në qiell standardet e mjekësisë tonë, që flet për numrin e ulët të infektimeve, fataliteteve dyshoj se qeveria po fsheh statistikat për propagandë. Ne jemi deshmitarë që pika më e fortë e kësaj qeverie eshte propaganda .

Mendoj se shifrat janë jashtë realitetit, për shumë arsye. Së pari shumë shqiptarë e kanë problem të deklarohen të prekur nga COVID-19,  ndjehen të stigmatizuar. Këta vetëmjekohen, mjekohen nga miq mjekë, farmacistë, infermierë.

Së dyti plot qytetarë e kalojnë me shenja minore ose pa shenja, megjithëse janë të infektuar. Së treti ka plot raste që ju mohohet testimi.

A bëhen manipulime?

Kam të drejtën e ligjshme të dyshoj se qeveria manipulon me shifrat, përderisa në gjithë kohështrirjen e pandemisë nuk është treguar transparente.

Përmes një deklarate mjekët e mohuan një fakt të tillë, si do e komentoni deklaratën e tyre?

Deklarata e disa mjekëve për opinionin tim ishte partizane. Mjekët në fjalë janë përpjekur disa herë të mbrojnë "nderin" e nëpërkëmbur të qeverisë. Është e vërtetë e pamohueshme që Shqipëria është një vend i varfër, me një sistem shëndetësor të abuzuar, të nënfinacuar. S'ka përse të mbrojmë një propagandë idiote se gjoja qenkemi para Gjermanisë, apo njësoj si Franca. Ne realisht jemi poshtë standarteve të vendeve fqinjë, s'ka si të jemi më mirë se Evropa.

A mendoni se institucionet e drejtësisë duhet të kishin nisur hetim lidhur me këtë çështje?

Ne jemi mësuar tashmë me institucionet e drejtësisë dhe policisë që hetojnë protestuesit, popullin opozitar, e nuk lëvizin qoftë një gisht për të hetuar pushtetarët. Në Shqipëri është bërë normë të hetohet, lincohet e dënohet i dobëti, jo pushtetari.

/J.S/

 

Ditari politik

Të fundit