Iranianët përplasen me policinë, zëdhënësi i MEK: Një vdekur dhe disa të plagosur në kamp

Një person ka humbur jetën dhe disa të tjerë janë plagosur pas përplasjeve me Policinë e Shtetit mëngjesin e sotëm brenda kampit MEK në Manzë të Durrësit, pretendon zëdhënësi i MEK, i cili deklaron se viktimë ka mbetur një banor i kampit ASHRAF.

“Një banor i Ashrafit u vra nga sulmi i policisë. Ky veprim është vetëm për të qetësuar mullahët iranianë që po bien. Ky aksion është i ngjashëm me atë të 17 qershorit që u zhvillua në Paris, por ky është në kufirin e Shqipërisë.

Kjo është një nga ditët më të zeza në Shqipëri. Ajo që ju shkrova nuk është qëndrimi zyrtar i autoriteteve të Ashrafit, por ajo që thonë banorët e Ashrafit”, deklaron zëdhënësi.

Përleshja mes tyre mësohet se ka nisur pasi anëtarët e kampit kanë bërë rezistencë dhe nuk kanë lejuar policinë që të kryejnë kontrolle.

Kujtojmë se Policia rrethoi që prej orëve të para ambientet në territorin e kampit Muxhahedinëve në Manzë të Durrësit, pas një urdhri nga Gjykata e Posaçme.

Pas një urdhri të lëshuar nga Gjykata e Tiranës, policia nisi kontrollet në kuadër të luftës kundër terrorizmit dhe parandalimin e sulmeve kibernetike, në kampin ku gjendet i strehuar një numër i lartë pjesëtarësh të lëvizjes opozitare iraniane, Mojahedin-e-Khalq (MEK). 

Sqarimi i policisë:

Policia sqaroi pas aksionit se po zbaton vendimin e Gjykatës së Posaçme kundër Korrupsionit dhe Krimit të Organizuar dhe urdhrin e ekzekutimit të Prokurorisë pranë kësaj Gjykate.

“Në zbatim të vendimit të Gjykatës së Posaçme kundër Korrupsionit dhe Krimit të Organizuar dhe të urdhrit të ekzekutimit të Prokurorisë pranë kësaj Gjykate, për kontrollin e të gjitha ambienteve dhe zyrave ku  banojnë për qëllime humanitare, Policia e Shtetit, në kuadër të një plani operacional, ka filluar kontrollin e të gjitha ambienteve dhe zyrave në kampin MEK, në Manëz, Durrës.

Në zbatim të urdhër-kontrolleve të nxjerra nga Gjykata, Policia e Shtetit ka marrë masa për zbatimin e tyre, me planin e kontrollit të ambienteve në territorin e kampit MEK, duke zbatuar me rigorozitet etikën dhe komunikimin e duke respektuar të drejtat dhe liritë themelore të të gjithë qytetarëve dhe komunitetit që banon në këtë kamp.

Grupet e kontrollit të Policisë po vijojnë kontrollet në territorin e kampit MEK dhe në ambientet e brendshme të tij.

Në përfundim të kontrolleve do të ketë njoftim më të detajuar”, njofton policia në deklaratën për mediat.