Flash News

Tiranë/ I riu dhunohet brutalisht dhe merret peng

E-TJERA

Italia përgatit transferimin e emigrantëve në Gjadër, mes tyre edhe shqiptarë

Politiko 8 Prill 2025, 16:20

Italia përgatit transferimin e emigrantëve në Gjadër, mes
Ministria e Brendshme e Italisë është në fazat përfundimtare të hartimit të listës së emigrantëve që do të transferohen në kampin e Gjadrit, në Shqipëri. Mediat italiane raportojnë se, ndryshe nga grupet e mëparshme, këtë herë bëhet fjalë për persona që ndodhen tashmë në qendrat e riatdhesimit në Itali dhe janë në pritje të dëbimit.

Sipas informacioneve të publikuara, Departamenti i Lirive Civile dhe Imigracionit, i drejtuar nga prefektja Rosanna Rabuano, është duke përzgjedhur emigrantët që konsiderohen më të përshtatshëm për t’u dërguar në Shqipëri. Në listë përfshihen shtetas tunizianë, egjiptianë, marokenë, por edhe shqiptarë.

Nëse qeveria në Tiranë jep dritën jeshile, edhe emigrantët e parregullt shqiptarë mund të transferohen në Gjadër. Për ta, procesi i riatdhesimit do të ishte më i thjeshtë dhe më pak i kushtueshëm, pasi ata mund të lirohen direkt në territorin shqiptar, ndryshe nga shtetasit e tjerë të cilët, sipas marrëveshjes në fuqi, duhet të rikthehen në Itali përpara se të nisen drejt vendeve të origjinës.

Grupi që mbërriti në janar të vitit 2025 përbën kontingjentin e tretë dhe më të madh deri më tani që është vendosur në qendrën e pritjes në Shëngjin. Dy grupet e mëparshme, të dërguara në tetor dhe nëntor të vitit të kaluar, u kthyen pas për shkak të vendimeve gjyqësore që nuk konfirmuan ndalimin e ligjshëm të azilkërkuesve.

Pengesat ligjore që shoqëruan dërgimin e emigrantëve në Shqipëri lidhen me listat e vendeve të origjinës. Gjyqtarët italianë kundërshtuan idenë e një liste të unifikuar për të gjithë Bashkimin Evropian, duke kërkuar që çdo shtet të ketë vlerësime të pavarura. Më 30 dhjetor 2024, Gjykata e Kasacionit i dha të drejtë qeverisë italiane, duke theksuar se përcaktimi i vendeve të sigurta është kompetencë e Ministrisë së Jashtme dhe institucioneve ekzekutive, dhe jo e gjyqësorit.

Marrëveshja për ndërtimin e dy qendrave për pritjen e emigrantëve në Gjadër dhe Shëngjin u firmos në vitin 2023 mes kryeministres italiane Giorgia Meloni dhe kryeministrit shqiptar Edi Rama. Qëllimi kryesor ishte menaxhimi i fluksit migrator jashtë territorit të Italisë, por projekti ka ngjallur kritika të shumta nga organizatat ndërkombëtare për të drejtat e njeriut, të cilat e shohin këtë nismë si një zhvendosje të barrës në vende me sisteme më të dobëta ligjore dhe burime të kufizuara.

Ndërkohë, opozita italiane ka denoncuar marrëveshjen si të paefektshme dhe tepër të kushtueshme, me një faturë që arrin në 800 milionë euro për pesë vjet. Megjithatë, Komisioni Evropian dhe disa liderë të BE-së janë shprehur të interesuar për ta përdorur këtë model si një precedent për menaxhimin e emigrantëve jashtë kufijve të unionit.

Të fundit