Kalaja e Petrelës me hotele dhe restorante, Tare: Shqipëria në zhvillimin e turizmit po prish autenticitetin

Në një sipërfaqe të stërmadhe prej 210 mijë metra katrorësh në zonën e Petrelës në Tiranë, brenda së cilës ndodhet edhe Kalaja, e cila është monument kulture, pritet të ngrihet i ashtuquajturi Parku i Besimit. Një nismë e qeverisë për harmoninë dhe tolerancën fetare, ku do të ndërtohen “kopje” të disa monumenteve kulturore në të gjithë botën, atë islame, të krishterë, budist apo edhe të besimeve të tjera.

Studiuesi Auron Tare, thotë se i duket projekt qesharak të ngrihet Parku i Besimit, ku dokumentet tregojnë se do të ndërtohen hotele dhe restorante.

Duke folur për MCN Live, ai deklaroi se kalanë e Petrelës e ka privati tashmë dhe se aty ka aktualisht lokal dhe restorant.

Tare ngriti shqetësimin se tashmë shoqëria shqiptare nuk ka asnjë ndjesi për çështjet e trashëgimisë kulturore dhe se Shqipëria në zhvillimin e turizmit po prish autenticitetin.

"Propozohet që në rrethinat, rreth e qark kalasë të bëhen ndërtimet. Ndërkohë kushdo që e ka hartuar, më duket një projekt qesharak.

Askush nuk i kthen kalatë në restorante, vetëm shqiptarët e kanë bërë. kam frikë dhe jam i bindur se nuk është më çështje e Ministrisë së Kulturës, kjo është çështje e shoqërisë shqiptare e cila nuk ka më asnjë lloj ndjesie, përveç ndeshjes së kombëtare.

Për çështjet e trashëgimisë kulturore, shoqëria shqiptare nuk ka asnjë ndjesi. Kemi Kullën mbas Sahatit dhe Xhamisë, në ligjin e trashëgimisë kulturore ka një distancë tampon që i ndalon këto ndërtime.

Nuk kam më besim se do të vlerësohet trashëgimia kulturore. Nuk ka asnjë lloj interesi për çështje të tilla të trashëgimisë kulturore.

Ti shiko Tushemishtin, do bëhen pallate atje. Petrela është një kryevepër, ka një histori të jashtëzakonshme nuk ka nevojë për projekte të tilla.

Nuk është vetëm çështja e qeverisë dhe ndërtuesit, është dhe e atij që ka trashëgiminë që nuk ka ndjesinë të ruajë vilën e gjyshit dhe stërgjyshit.

Kur ti vetë shkatërron trashëgiminë e familjes, kujt do i thuash, atij që vjen nga Tropoja për të ndërtuar?

Shqipëria në zhvillimin e turizmit po prish autenticitetin.

Ata që kanë paratë nuk janë budallenj, por gjithë kjo energji nuk po futet në kanalizimin e duhur.

Qytetet bregdetare tona janë për faqe të zezë, Saranda, Shëngjini, Durrësi dhe deri diku Vlora po thërret turistin e lirë.

Anijet e pasanikëve, janë tërhequr tashmë nga Shqipëria me idenë që është tërheqës për turistët masiv, nuk është më atraksion në të ardhmen.

Nuk ka një vizion, nuk jemi ulur asnjëherë të themi ore ku po shkojmë do bëjmë budizëm në Petrelë, apo diçka autentike?

Çdo gjë po bëhet e paplanifikuar. Në Krujë të zë lebetia, këtej furrat e gëlqeres, këtej pallatet.

Po planifikohet një hotel i madh brenda parkut kombëtar të Butrintit.

Asnjë nga kryetarët e bashkisë Sarandë, nga 1992 e këtej nuk jeton në Sarandë.

Vetë kanë ardhur në Tiranë, fëmijët i kanë dërguar jashtë.

Nja dy që njoh unë me ato kursimet e vogla, kanë blerë nga dy vila në Korfuz", tha Tare.