Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Kantierët e ndërtimit pa kushte sigurie, tre aksidente në punë brenda 24 orëve

Politiko 20 Gusht 2025, 20:34

Kantierët e ndërtimit pa kushte sigurie, tre aksidente në

Foto ilustruese

Një aksident me pasojë vdekjen u regjistrua në kantierin e ndërtimit të kanalit për ujëmbledhësin e Bllacës në Bulqizë. Policia njofton se gjatë punës është dëmtuar rëndë mekaniku Azem Picari, 68 vjeç, banues në Tiranë, i cili ndërroi jetë në spital.

Për ngjarjen u procedua penalisht Arjan Hoxha, 70 vjeç, banues në Tiranë, me detyrë drejtues teknik i subjektit që po kryen punimet në kantier. Ai akuzohet për veprën penale “shkelja e rregullave të mbrojtjes në punë”.

Pavarësisht se kanë arritur moshën e daljes në pension, shumë të moshuar në zonat rurale dhe në sektorë si ndërtimi apo ai minerar, detyrohen të vazhdojnë punën. Kjo lidhet si me mungesën e fuqisë punëtore për shkak të emigrimit masiv dhe largimit të të rinjve, ashtu edhe me kushtet e vështira ekonomike që i shtyjnë pensionistët të punojnë për të siguruar të ardhura shtesë.

Projekti ku humbi jetën 68-vjeçari në Bulqizë ka nisur në korrik 2024 dhe parashikon që me një investim prej rreth 2 milionë euro, të mbledhë disa kanaleve ujitëse të zonës për t’i futur në rezervuarin e Bllacës. Ky rezervuar, i ndërtuar para viteve ’90, ka qenë i dëmtuar dhe jashtë funksioni për dekada, ndërsa projekti aktual synon ta rikthejë në përdorim për vaditjen e tokave bujqësore në Maqellarë dhe fshatrat përreth.

Gjatë 24 orëve të fundit, janë shënuar edhe dy aksidente të tjera në vendin e punës, të ndodhura në kantierë ndërtimi pallatesh në Tiranë.

Sipas policisë, në një prej rasteve u procedua penalisht A. Ç., 46 vjeç, administrator i një firme, pasi punëtori me inicialet Q. B., 43 vjeç ra nga lartësia dhe po merr trajtim mjekësor në spital. Në një rast tjetër, nisën hetimet për E. M., 33 vjeç, përgjegjës sigurie, pasi gjatë punës u aksidentua punëtori B. H., 46 vjeç, i cili ndodhet jashtë rrezikut për jetën.

Sipas raportit vjetor të Inspektoratit Shtetëror të Punës dhe Shërbimeve Shoqërore për vitin 2024, në total u regjistruan 177 aksidente të punës, prej të cilave 33 rezultuan me humbje jete. Në vitin 2023 u raportuan 168 aksidente pune me 30 raste fatale. Sektori i ndërtimit është shfaqur si më problematik, duke përbërë 24% të aksidenteve. Kjo lidhet edhe me zhvillimin intensiv të industrisë, ku gjatë vitit u lëshuan 1,019 leje ndërtimi, sipas të dhënave të INSTAT.

Referuar të dhënave zyrtare, pas ndërtimit, sektori i minierave dhe karierave mbetet ndër më të rrezikshmit, duke përbërë rreth 18 % të aksidenteve të raportuara në vitin 2024.

Në investigimet e BIRN për këtë sektor, ka gjetur se në shumicën e aksidenteve në kantieret e ndërtimit, përgjegjësia u lihet shpesh punëtorëve viktima, ndërkohë që kompanitë përgjegjëse për kushtet e pasigurta të punës ndëshkohen kryesisht me gjoba minimale. Kjo duke krijuar një kulturë pandëshkueshmërie dhe rreziku për punëtorët./BIRN