Sekuestrohen 114 kg kanabis në Korçë/ 4 të arrestuar, mes tyre edhe një avokat me precedent penal

Dy mjete janë kapur në afërsi të doganës së Goricës, në zonën e Pustecit gjatë një operacioni antidrogë të zhvilluar mbrëmjen e djeshme në qytetin e Korçës.

Nga operacioni është sekuestruar 114 kg ëndë e dyshuar narkotike kanabis, 1 armë sportive, 4 automjete, 1 presë që shërbente për paketimin e lëndës narkotike. Janë vënë në pranga 4 persona, 3 prej tyre me precedentë penalë, mes tyre edhe një avokat. 

Të arrestuarit janë: Ligor Romaçka, 29 vjeç, Joni Mosku, 36 vjeç, banues në Korçë (i dënuar më parë për veprën "Prodhimi dhe shitja e narkotikëve"), Idriz Manej, 66 vjeç, banues në Shkodër, (i dënuar më parë për veprën "Trafikimi i narkotikëve") dhe Albion Çiko, 21 vjeç,

Avokati Joni Mosku u kap në Kapshticë teksa po tentonte të  kalonte kufirin grek. Ndërsa dy makinat e tjera janë kapur në Goricë.

Hetimi ka nisur prej disa muajsh dhe është finalizuar me operacionin. Policia ka ndjekur makinat e të arrestuarve deri në zonën e Goricës ku janë ndaluar më pas në palën shqiptare.

Njoftimi i policisë:

Korçë

Finalizohet operacioni policor i koduar "Restart".

Operacioni pas një hetimi dyjavor, zhvilluar nga Seksioni për Trafiqet e Paligjshme dhe Narkotikët në DVP Korçë, Prokuroria, Policia Kufitare Korçë në bashkëpunim me Forcat e Posaçme Operacionale në Departamentin e Policisë Kriminale në Policinë e Shtetit.

Goditet një grup i strukturuar kriminal, në fushën e trafikimit të lëndëve narkotike në drejtim të shtetit grek.

Vihen në pranga 4 shtetas, 3 prej të cilëve me precedent të mëparshëm penal në fushën prodhimit, shitjes, trafikimit të narkotikëve dhe dhënies së ndihmës për kalim të paligjshëm të kufirit.

Sekuestrohet 114 kg lëndë e dyshuar narkotike kanabis, 1 armë sportive, 4 automjete, 1 presë që shërbente për paketimin e lëndës narkotike.

Specialistët e Seksionit për Hetimin e Trafiqeve të Paligjshme dhe Narkotikëve në Drejtorinë Vendore të Policisë Korçë, nën drejtimin e Prokurorisë së Rrethit Gjyqësor Korçë, në bashkëpunim me Policinë Kufitare Korçë dhe Forcat e Posaçme Operacionale në Departamentin e Policisë Kriminale në Policinë e Shtetit, pas një pune intensive hetimore dyjavore, finalizuan me sukses operacionin e koduar "Restart", si rezultat i të cilit u bë kapja dhe arrestimi në flagrancë i shtetasve:

Ligor Romaçka, 29 vjeç, banues në Korçë.

Joni Mosku, 36 vjeç, banues në Korçë (i dënuar më parë për veprën "Prodhimi dhe shitja e narkotikëve").

Idriz Manej, 66 vjeç, banues në Shkodër, (i dënuar më parë për veprën "Trafikimi i narkotikëve").

Albion Çiko, 21 vjeç, banues në fshatin Vloçisht, Maliq (i cili ishte me masë sigurie "Arrest në shtëpi" për veprat penale "Ndihma për kalim të paligjshëm të kufijve" dhe "Mosbindja ndaj urdhrit të punonjësit të policisë së rendit publik").

Falë një pune të mirëorganizuar nga shërbimet e policisë, në Pikën e Kalimit Kufitar Goricë, në dalje të Republikës së Shqipërisë, u bë kapja e shtetasit Joni Mosku, me mjetin tip "Opel Meriva", brenda të cilit iu gjet e fshehur 66 kg lëndë e dyshuar narkotike kanabis.

Gjithashtu gjatë kontrollit të një magazine në lagjen nr. 1, Korçë, të marrë në përdorim nga shtetasi Ligor Romaçka, në brendësi të një mjeti tip "Opel Meriva", pa targa, pa dokumentacion, u gjet një sasi tjetër prej 48 kg lëndë e dyshuar narkotike kanabis dhe një presë që shërben për paketimin e lëndës narkotike, si dhe gjatë kontrollit të banesës së tij, u gjet një armë sportive tip pistoletë.

Nga veprimet hetimore të kryera, rezulton se bashkëpunëtorë në këtë veprimtari kriminale ishin edhe dy shtetasit Idriz Menaj, në rolin e poseduesit të lëndës narkotike dhe shtetasi Albion Çiko, i cili kishte kryer modifikimin e mjetit, me qëllim fshehjen e sasisë së lëndës narkotike.

Në cilësinë e provës materiale u sekuestruan në total 114 lëndë e dyshuar narkotike kanabis, 1 armë sportive tip pistoletë, 4 automjete, 6 aparate celularë dhe 1 pajisje metalike (presë) e cila shërbente për paketimin e lëndës narkotike.

Materialet i kaluan Prokurorisë së Rrethit Gjyqësor Korçë për veprat penale "Trafikimi i narkotikëve" e kryer në bashkëpunim, mbetur në tentativë dhe "Prodhimi dhe mbajtja pa leje e armëve sportive".