Katër prokurorët e ‘dosjeve të nxehta’ në garë, kush do ta pasojë Altin Dumanin në SPAK?

Katër kandidatë dorëzuanprogramin e tyre në garën për kreun e SPAK. Këshilli i Lartë i Prokurorisë do të vendosë nesër mes Klodian Brahos, Doloreza Musabelliut, Adnan Xholit dhe Elvin Gokajt.

Ambasada britanike ka dërguar një mesazh të qartë për KLP-në duke kërkuar një proces të lirë, të drejtë dhe transparent duke e vlerësuar si një hap në forcimin e shtetit të së drejtës dhe luftën kundër korrupsionit.

Edhe ambasadori i Bashkimit Evropian, Silvio Gonzato, kërkoi nga anëtarët e Këshillit të Lartë të Prokurorisë të zgjidhet një person “me integritet të padiskutueshëm, i pavarur, profesionist dhe i përkushtuar ndaj standardeve më të mira të BE-së”.

Por, cilët janë kandidatët në garë për kreun e SPAK?

Klodian Braho

Braho ishte i pari që dorëzoi programin e tij si kandidat për kreun e SPAK. Ai është emëruar prokuror i SPAK më 19 dhjetor 2019, pasi u konfirmua në detyrë nga Komisioni i Pavarur i Kualifikimit (Vettingu). Fillimisht ka punuar si prokuror në Berat (2007–2012), pastaj në Vlorë, ku ka qenë edhe zëvendësdrejtues, e më pas në Prokurorinë për Krime të Rënda në Tiranë.

Klodian Braho ka hetuar dosjen e ish-kryeprokurorit Adriatik Llalla, për akuza si: mosdeklarim të të hollave, pastrim parash, shpërdorim detyre dhe fshehje të pasurisë.

Ai është përfshirë në hetimin për inceneratorët, ku në mars 2024 dha dorëheqje nga një pjesë e çështjes pasi palë të përfshira ngritën pretendime për mungesë transparence.

Doloreza Musabelliu

Është prokurore në Prokurorinë e Posaçme kundër Korrupsionit dhe Krimit të Organizuar (SPAK). Ka qenë prokurore e Krimeve të Rënda para reformës, dhe pas formimit të SPAK-ut kaloi në strukturat e reja.

Ka hetuar çështje të rëndësishme: trafik droge/armësh, çështje korrupsioni, dhe ajo që quhet “Masakra e Lushnjes”, dosje kjo që vuri në rrezik jetën e saj.

Sipas dëshmive të bashkëpunëtorit të drejtësisë Artan Tafani, grupi kriminal i Laert Haxhiut kishte planifikuar eliminimin e prokurores Doloreza Musabelliu. Ky plan kishte si qëllim ndëshkimin e saj për hetimin e çështjes së masakrës së Lushnjës, ku Haxhiu ishte i dyshuar si autor. Sipas Tafanit, Laert Haxhiu kishte urdhëruar ndjekjen e Musabelliut dhe të familjarëve të saj, duke përfshirë edhe fëmijët, për të identifikuar mundësitë për eliminimin e saj ose të të afërmve të saj.

Adnan Xholi

Është prokuror në SPAK. Fillimisht Xholi e nisi karrierën në prokurori bazë, më pas drejtues në disa prokurori lokale si Gjirokastër, dhe më pas ka punuar në çështje që lidhen me krim të organizuar.

Ka hetuar së bashku me Altin Dumanin goditjen e rrjetit ndërkombëtar të kokainës, një ndër rrjetet më të organizuara të trafikimit të drogës me origjinë nga Amerika Latine.

Ka urdhëruar arrestimin e dy deputetëve, Tom Doshi dhe Mark Frroku. Ka konfiskuar pasuri të bandave, përfshirë pronat e Aldo Bares, si dhe ka udhëhequr hetime kundër grupimeve të trafikut dhe pastrimit të parave

Elvin Gokaj

Është një prokuror shqiptar që ka qenë pjesë e strukturave të rëndësishme të drejtësisë, përfshirë Prokurorinë e Apelit në Shkodër dhe më pas SPAK-un.

Gokaj ka kaluar një periudhë të vështirë në sistemin e drejtësisë për shkak të procesit të vettingut. Në vitin 2019, Komisioni i Pavarur i Kualifikimit (KPK) e ka shpallur të paaftë profesionalisht, duke e pezulluar nga detyra për një vit dhe duke e detyruar të rikthehej në Shkollën e Magjistraturës për trajnime shtesë. Megjithatë, pas një periudhe trajnimi dhe kalimit të ankimit në Kolegjin e Posaçëm të Apelimit, ai është konfirmuar në detyrë në vitin 2020.

Gokaj është angazhuar në hetime të rëndësishme, përfshirë çështje të korrupsionit dhe krimit të organizuar. Një nga çështjet më të njohura ku ai ka qenë i përfshirë është dosja e ish-ministrit Arben Ahmetaj, e njohur si "Dosja Buka". Në këtë çështje, Gokaj ka dorëzuar prova të reja në Gjykatën e Posaçme të Shkallës së Parë për Korrupsionin dhe Krimin e Organizuar (GJKKO) në korrik 2025

Në vitin 2025, Gokaj ka kandiduar për pozitat e drejtorit të SPAK, duke u bërë një nga kandidatët e mundshëm për këtë detyrë.