KESH ‘zbraz’ buxhetin në kohë krize, 250 mijë € fushatë ndërgjegjësuese për kursimin e energjisë

Kursimi i energjisë elektrike u kthye shumë shpejt në detyrën e re të qeverisë, në kushtet e një rize globale. Detyrë kjo e përkthyer në fushata ndërgjegjësuese për qytetarët duke shpenzuar para për të ‘edukuar’ shqiptarët me mënyra kursimi.

Faktoje.al ka bërë një analizë të shpenzimeve që janë derdhur për realizimin e spoteve dhe reklamave me qëllim ndërgjegjësimin e qytetarëve. Referuar të dhënave, spoti kushtuar KESH-it i kushtoi qeverisë rreth 250 mijë euro, në një kohë kur qytetarët janë ende në pritje të një vendimi përfundimtar për vendosjen apo jo të fashës 800 kWh.

Fillimisht, ministrja e Infrastrukturës dhe Energjetikës Belinda Balluku, njoftoi gjatë prezantimit të Paketës së re të Rezistencës Sociale se bashkë me një grup punonjësish nga OSHEE do të dilte në fushata ndërgjegjësimi në shkollat e Tiranës.

“Së bashku me Ministren e Arsimit unë do të nis në datë 14 nga shkollat e Tiranës me një grup të rinjsh dhe të rejash, punonjës të OSHEE-së, të KESH-it, të OST-së, të cilët janë ofruar në mënyrë vullnetare për të dalë në çdo klasë dhe për të ndarë me fëmijët sesi duhet kursyer energjia dhe pse është e rëndësishme sot të kujdesemi për kursimin e energjisë”, deklaroi Balluku.

Por, paralelisht me këtë nismë, qeveria ka ndërmarrë edhe hapa të tjerë në kuadër të kursimit të energjisë. Mediat dhe rrjetet sociale janë përdorur si mjete për të transmetuar rregullat e kursimit, të cilat i kanë kushtuar buxhetit të KESH-it.

Përmes një procedure prokurimi me negociim, Korporata Elektroenergjitike Shqiptare ka paguar 29.144.400 lekë (me tvsh) për një fushatë informuese dhe edukuese të qytetarëve/familjeve mbi përdorimin apo kursimin e energjisë elektrike në kushtet e krizës.

Në dokumentacionin e siguruar nga Faktoje, KESH sqaron se “Informacioni i kësaj fushate do të hyjë në çdo familje shqiptare për të kthyer në vëmendjen e duhur, në përdorimin sa më efiçent të energjisë elektrike në familje apo dhe në ambientet e punës së përditshme.”

Referuar kontratës, spoti dhe materialet e tjera ndërgjegjësuese do të transmetohen në televizione, radio dhe rrjetet sociale në periudhën tetor-dhjetor, kohë e cila përkon me diskutimet mbi rritjen e çmimit të energjisë për familjarët që konsumojnë mbi 800 këh në muaj. Dhe pjesa e luanit, prej 67.9% e faturës totale shkon për të paktën tre televizionet kryesore në vend, si dhe disa kanale informative.

Fatura financiare e kësaj fushate nuk është i vetmi problem. Për të zhvilluar fushatën ndërgjegjësuese të kursimit të energjisë, KESH ka ndjekur procedurë me negociim pa shpallje të njoftimit të kontratës, bazuar mbi një vendim të Këshillit të Ministravë nr 1195, datë 05.08.2008.

Nga verfikimi që ne i bëmë bazës ligjore rezulton se Korporata ka shkelur një pikë të procedurës, që lidhet me transparencën. Konkretisht, pika 9 e VKM-së citon se ftesa për negociata duhet të shpallet edhe në faqen e internetit të institucionit. Por në faqen zyrtare të KESH nuk është publikuar ende ftesa për negociimin.

Një tjetër hap në kuadër të kursimit, qeveria e ka ndërmarrë me anë të aktit normativ, i cili parashikon ndër të tjera uljen me 15% të konsumit të energjisë nga institucionet publike. Po ashtu, me hyrjen në fuqi të këtij akti normativ, do të nisë ndërprerja e ndriçimit në çdo rrugë ndërqytetase kryesore dhe dytësore pas orës 22:00.

Gjithashtu do të ndërpritet ndriçimi i jashtëm i godinave publike, i objekteve të kulturës, monumenteve, shesheve dhe shatërvaneve. Institucioneve shtetërore iu ndalohet përdorimi i ajrit të kondicionuar në temperaturë më të ulët se 27 gradë gjatë verës dhe më të lartë se 21 gradë gjatë dimrit. Akti Normativ nuk do të jetë i zbatueshëm per institucionet e ofrimit të shërbimeve shëndetësore, shkollat, kopshtet, komisariatet e policisë dhe institucionet e ekzekutimit të vendimeve penale.