Flash News

I rrëmbyeri në Lezhë me precedentë penalë! Kërcënoi një biznesmen për 25 mijë euro,

Merret peng një person në autostradën Lezhë-Tiranë, policia identifikon dy autorët

I vranë djalin një vit më parë, gjendet e pajetë në banesë 66-vjeçarja

Sëmuret Ilir Beqaj, shtyhet seanca gjyqësore

SPAK pranon vjedhjen e dosjeve të prokurorëve: Tentuan të ndërhyjnë edhe në e-mailin e Dumanit

E-TJERA

KLGJ ‘ndëshkon’ me masa disiplinore dy gjyqtare

Politiko 2 Prill 2025, 19:38

KLGJ ‘ndëshkon’ me masa disiplinore dy gjyqtare

Këshilli i Lartë Gjyqësor, KLGJ caktoi të mërkurën më 2 prill masa disiplinore ndaj gjyqtares së Shkodrës, Arta Llazari dhe gjyqtares së Kukësit, Ajshe Xhafa.

Inspektori i Lartë i drejtësisë, ILD e filloi hetimin disiplinor ndaj gjyqtares Llazari bazuar në 11 ankesa për mospërmbushje të rregullt të detyrës, e shkelje të afateve procedurale civile e penale. Sipas ILD-së, gjatë hetimit administrativ janë evidentuar edhe fakte të tjera, konkretisht shkelje të afateve procedurale civile dhe penale të arsyetimit të vendimit gjyqësor, si dhe mosvënie në lëvizje të çështjeve civile, duke tejkaluar afatet tej çdo logjike e në mënyrë të vazhdueshme. Kjo situatë sipas ILD është thuajse e barabartë me mungesën e drejtësisë dhe u kërkua në përfundim shkarkimi nga detyra e gjyqtares Arta Llazari.

Gjyqtarja Llazari pretendoi se ka pasur ngarkesë të lartë në punë. Po ashtu, ajo parashtroi në seancat dëgjimore të mëparshme se kishte paraqitur, prova të reja duke këmbëngulur se mbështesnin pretendimet e saj.

Kërkesa e ILD u pranua pjesërisht nga Këshilli i Lartë Gjyqësor, që vendosi të mërkurën të rrëzojë kërkimin për shkarkimin nga detyra të gjyqtares Arta Llazari, duke caktuar masën disiplinore të pezullimit nga detyra për gjashtë muaj.

Gjyqtarja Arta Llazari u konfirmua në detyrë nga Komisioni i Pavarur i Kualifikimit më 13 shkurt 2023, ndërsa dy çështje të gjykuara prej saj u dërguan për verifikime të mëtejshme pranë Inspektorit të Lartë të Drejtësisë. Llazari përfundoi studimet në Shkollën e Magjistraturës në vitin 2001 dhe e ushtron funksionin prej më shumë se dy dekadash në Gjykatën e Rrethit Gjyqësor Shkodër. Ajo ka punuar edhe si këshilltare ligjore pranë Gjykatës Kushtetuese.

Hetimi disiplinor ndaj gjyqtares së Kukësit, Ajshe Xhafa është filluar me iniciativë prej ILD-së, bazuar në informacionin e pasqyruar në procesverbalin e një mbledhje të përgjithshme të gjyqtarëve të shtatorit 2024, kur janë zhvilluar debate mbi disa procese pune në gjykatë.

Përfaqësuesit e ILD parashtruan në seancat dëgjimore të mëparshme, se prej analizës së fakteve ka rezultuar se gjyqtarja Xhafa, në cilësinë e anëtares së trupit gjykues gjatë zhvillimit të një seance publike, ka shkelur rregullat e sjelljes me koleget e saj. Sjellja e Xhafës që ka vijuar gjatë gjithë seancës, vlerësohet prej ILD se ka cënuar besimin e palëve të pranishme në seancë tek drejtësia, se ka diskretituar pozitën dhe figurën e magjistratit, si dhe ka cënuar integritetin dhe reputacionin e gjykatës. Në përfundim, ILD konkludoi se sjellja dhe veprimet e gjyqtares Xhafa vlerësohen si shkelje e lehtë disiplinore dhe kërkoi që ti jepet “Vërejtje publike”.

Kur gjyqtarja Xhafa paraqiti parashtrimet e saj në seancat e mëparshme në KLGJ, evidentoi ndër të tjera dhe mungesën e eksperiencës, pasi është e re në detyrë. E pyetur nga anëtarët e Këshillit lidhur me rrethanat e debatit me koleget, nëse kishte kërkuar ose jo të tërhiqeshin në dhomë këshillimi, Xhafa konstatoi se ajo kishte qenë anëtare dhe se ishte kryesuesja e trupës që kishte përgjegjësi për të zbatuar procedurën. Xhafa deklaroi se kishte kërkuar kohë të njihej me dosjen dhe të caktohej një seancë tjetër, duke vlerësuar që të shqyrtonte legjislacionin dhe faktet ligjore të çështjes.

KLGJ e gjeti të drejtë kërkimin e ILD-së dhe vendosi të mërkurën në mënyrë unanime, të caktojë ndaj gjyqtares Xhafa masën disiplinore “Vërejtje publike”. Reporter.al

Të fundit