Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Kokainë mes bananeve/ Media ekuadoriane zbardh rrjetin shqiptar: Nga Rexhepi te Murataj

Politiko 27 Qershor 2025, 16:49

Kokainë mes bananeve/ Media ekuadoriane zbardh rrjetin shqiptar: Nga

Një investigim i publikuar nga media ekuadoriane Infobae.com, bazuar në një raport të organizatës hulumtuese amerikane C4ADS, hedh dritë mbi një rrjet të sofistikuar kompanish shqiptare që kanë përdorur importin e bananeve nga Ekuadori për të trafikuar drogë drejt Europës, përfshirë Shqipërinë.

Sipas raportit, gjashtë kompani shqiptare janë përfshirë në raste sekuestrimesh droge që nga viti 2014. Mes tyre përmendet “Masabi Fruit”, e cila vazhdoi aktivitetin edhe pas një sekuestrimi kokaine në prill 2021, duke ndërruar administratorin por jo modus operandi-n. Emra si Erjon Peti dhe Klajdi Xibrau u arrestuan, por kompania vijoi aktivitetin nën drejtimin e Shyqyri Xibrajt.

Një rast i ngjashëm është ai i kompanisë “Zico Sha”, e njohur edhe si “Bana King LLC”, që u përfshi në një sekuestrim droge në nëntor 2022. Aksioneri Trifon Murataj u hoq nga regjistrat zyrtarë përkohësisht, por u rikthye më vonë, ndërkohë që kompania rifilloi importet e bananeve dhe tregtinë me mish të ngrirë nga Brazili.

Sipas C4ADS, përveç një kompanie të vetme, të gjitha firmat shqiptare që importuan banane nga Ekuadori në vitet e fundit rezultojnë të lidhura me dërgesa të kontaminuara me kokainë. Një model i përsëritur përfshin “riciklimin” e administratorëve: largim nga dokumentet zyrtare për shkak të hetimeve dhe më pas rikthim, sapo të bjerë vëmendja publike.

Trifon Murataj, një figurë kyçe në këto skema, ka qenë subjekt i një urdhër-arresti pas një dërgese kokaine nga Puerto Bolívar. Edhe pse u përjashtua përkohësisht nga aktivitetet, ai rezulton të jetë aktiv sërish nga New Jersey në SHBA, ku zotëron kompani dhe prona, përfshirë “Vision 22 LLC”.

Raporti përmend edhe emra të tjerë të përfshirë në rrjetet shqiptare të trafikut në Ekuador. Një nga ta është Dritan Rexhepi, i arratisur nga burgje në disa vende të Europës dhe i arrestuar në Ekuador në vitin 2014 për trafik droge. Edhe nga burgu ai vazhdoi të drejtonte operacione kriminale, deri sa në 2021 iu dha arrest shtëpie, nga i cili u arratis. Ai u shpall zyrtarisht i arratisur në vitin 2023 dhe u kap në Turqi po atë vit.

Një tjetër figurë kyçe është Dritan Gjika, i cili sipas raportit të GI-TOC, ka drejtuar një strukturë që dërgonte deri në katër tonë kokainë çdo muaj nga Kolumbia përmes Ekuadorit në Europë. Ai operonte përmes kompanive të ligjshme, sidomos në sektorin e pasurive të paluajtshme dhe të frutave, në bashkëpunim me ekuadorianin Rubén Cherres i vrarë në vitin 2023.

Zbulimet hedhin dritë mbi një rrjet ndërkombëtar që përdor tregtinë e ligjshme si mbulesë për aktivitet kriminal, ndërsa autoritetet shqiptare nuk kanë reaguar ende zyrtarisht për këto akuza.