Komisioni Hetimor i Shëndetësisë, nesër pyetet ish-ministri Ilir Beqaj

Komisioni hetimor për Shëndetësinë do të vijojë edhe nesër (12 nëntor) me pyetjen e dëshmitarëve për të sqaruar çështjen e koncesionit të sterilizimit

Sakaq, mësohet se nesër në orën 10:00 pritet dëshmia e ish-ministrit të Shëndetësisë Ilir Beqaj, i cili aktualisht ndodhet në burg për abuzimin me fondet e BE në SASPAC.

Çfarë ka ndodhur?

Kujtojmë se ndaj Beqajt SPAK ka ngritur akuzat për “Korrupsioni pasiv i funksionarëve të lartë shtetërore”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim” “Mashtrim” si dhe “Shkelja e barazisë së pjesëmarrësve në tendera apo ankande publike”.

SPAK thotë se ka gjetur prova se Ilir Beqaj si drejtues i SASPAC, në bashkëpunim me Ermal Kurtulajn, të cilin vetë e kishte emëruar, urdhëronte procedura fiktive prokurorimi, me vlerë qindra mijëra euro, kompanive të ndryshme për shërbime të pakryera dhe përfitues fundor të ishte pikërisht vetë ish ministri përmes Restorant Gzona në Tiranë, që SPAK thotë se është në pronësi të tij. Mes 8 prokurimeve fiktive të zbuluara, SPAK evidenton pikërisht një të lidhur me “Landëays International”.

SASPAC i dha 125 mijë € kompanisë së biznesmenit Gazmend Haxhia për organizimin e një konference turizmi “Festa”. Por për të njëjtin event, dhe Ministria e Turizmit pagoi 38.5 mln lekë të reja. Pra gjithsej për të njëjtin aktivitet u paguan nga dy institucioneve shtetërore mbi 500 mijë €, ndërsa në fund i vetmi shpenzim i regjistruar është ai i një darke mundësuar nga “Gzona” me vlerë rreth 41 mijë euro.

Ç'ndodhi sot

Sot biznesmeni Ilir Rrapaj mbërriti në Kryesinë e Kuvendit, i prangosur dhe i shoqëruar nga policia ka dhënë dëshminë e tij. 

Ai deklaroi se Klodian Rrjepajn dhe Ilir Beqajn i ka njohur në një aktivitet të qeverisë shqiptare në 2013.

Pas 6 orësh dëshmie të Rrapajt, dëshmoi edhe ministrja Anila Denaj para komisionit hetimor për koncesionet. Ajo ka mbajtur postin e  drejtoreshës së Fondit të Sigurimit të Detyrueshëm të Kujdesit Shëndetësor dhe mësohet se nuk ka qenë dakord për çmimet e larta të sterilizimit teksa ka paraqitur dhe ankesë.

Koncensioni 10 vjeçar me vlerë afro 100 milionë dollarë iu dha kompanisë 'SaniService', një bashkim kompanish ku Ilir Rrapaj me kompaninë e tij 'Investital LLC' është zotëruesi kryesor i aksioneve, krahas kompanive italiane “Servizi Italia”, “Tecnosanimed” dhe “U.Jet S.r.l” të Staccinit.

Rrapaj ndodhet në arrest me burg prej 16 gushtit 2024, ndërsa i arrestuar është edhe ish-zv.ministri i Shëndetësisë Klodian Rjepaj.

Më herët, kryetarja e komisionit, Albana Vokshi lajmëroi në mbledhje se 3 biznesmenët italianë Umbro Staçini, Elisabetta Anzanello dhe Giorgio Tardioli  të thirrur për të dëshmuar kanë refuzuar të paraqiten dhe të japin dëshminë e tyre.