Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

KPA lë në fuqi shkarkimin e prokurorit Çlirim Sino

Politiko 23 Qershor 2025, 18:26

Kolegji i Posaçëm i Apelimit, KPA shpalli të hënën më 23 qershor vendimin për lënien në fuqi të largimit nga detyra të prokurorit të Fierit, Çlirim Sino. Vendimi u mor nga trupi gjykues i KPA-së, i kryesuar nga Albana Shtylla, me relatore Rezarta Schuetz dhe anëtarë Sokol Çomo, Ina Rama e Mimoza Tasi, pas shqyrtimit të ankimit të Sinos ndaj vendimarrjes së Komisionit.

Prokurori Çlirim Sino u shkarkua më 6 korrik 2022, nga Komisioni i Pavarur i Kualifikimit, KPK me arsyetimin se nuk arriti të justifikojë burimin e ligjshëm për një pjesë të pasurive që zotëron familja e tij. Sino e ankimoi si të pabazuar vendimmarrjen e KPK dhe i kërkoi Kolegjit ndryshimin e vendimit të shkarkimit dhe konfirmimin e tij. Çështja u kalua në seancë publike, me qëllim që t’i drejtoheshin disa pyetje subjektit.

Në përfundim, Kolegji pasi dëgjoi edhe parashtrimet e Sinos ndaj analizës financiare të KPK, vlerësoi se vendimi për shkarkimin e tij është i bazuar në fakte dhe në ligj. Gjatë shpalljes së vendimit të hënën, kryesuesja Shtylla deklaroi ndër të tjera se, nga kontrolli i analizës financiare për vitin 2015 konfirmohet minimalisht balanca negative e konstatuar nga Komisioni për mbulimin e shpenzimeve dhe krijimin e kursimeve të pretenduara

Po ashtu, sikurse në Komision, edhe në Kolegj konfirmohet mungesa e logjikës ekonomike për shitjen e tre automjeteve në vlerë shumë më të lartë se blerja, pas përdorimit të tyre që varjon nga katër muaj e deri në 14 vjet. Sipas KPA, shpjegimet e subjektit se vlera e automjeteve është rritur si pasojë e shërbimeve dhe mirëmbajtjes nga ana e tij, mbeten në nivel deklarativ.

KPA vlerëson se dhe pas korrektimit të analizës së Komisionit, subjekti dhe familja e tij gjenden në pamundësi për një depozitë 43 mijë euro të deklaruar në emër të bashkëshortes. Gjatë shpalljes së vendimit, u evidentua se dhe vetë subjekti e pranoi pamundësinë financiare për këtë pasuri.

Sipas Kolegjit, subjekti nuk arriti të shpjegojë bindshëm vlerat financiare respektive për të cilat interesat privatë të bashkëshortes të likujditeteve në llogaritë private si individ dhe ato si person fizik, janë ndërthurur në mënyrë të vazhdueshme. Trupi gjykues konstaton se Sino dhe bashkëshortja janë sjellë me këto depozita si ti kishin pasuri personale të ekonomisë familjare, ndërsa formalisht ato janë emërtuar si pronë e personit fizik në emër të bashkëshortes. Gjatë shpalljes së vendimit u evidentua se blerja e një apartamenti në Vlorë është kryer me fonde tërësisht nga kjo depozitë.

Kolegji vëren se subjekti ka treguar mungesë transparence në shpjegimin e pasurive e të ardhurave gjatë procesit të rivlerësimit duke pamundësuar identifikimin e saktë të vijës ndarëse mes këtyre zërave pasurorë.

Për një apartament në Vlorë, dhuruar bashkëshortes nga prindërit, u konstatua dhe në Kolegj pamundësi financiare e personave të lidhur për krijimin e kësaj pasurie.

Në disa raste, KPA konstatoi qëndrime kontadiktore të Komisionit në arsyetimin dhe kryerjen e analizës, ndërkohë që dhe nga korrektimet e kryera është çmuar se në rastin më të mirë mbetet balancë negative në tre vjet në vlerën totale prej 1.6 milionë lekësh.

Së bashku me problemet e tjera të konstatuara në drejtim të pasaktësive në deklarime, është arritur të përfundimin se nuk mund të aplikohet parimi proporcionalitetit dhe për rrjedhojë u la në fuqi vendimi i shkarkimit për prokurorin Çlirim Sino. Reporter.al