Kraja drejt largimit/ Hapet gara për kreun e ri të SPAK-ut, kush janë 3 kandidatët e dosjeve 'të nxehta'

Sot hapet gara për drejtuesin e ri të SPAK. Arben Kraja është drejt largimit nga detyra si shefi i SPAK-ut. Mandati i tij 3-vjeçar përfundon më 18 dhjetor, por rregulli parashikon që Këshilli i Lartë i Prokurorisë duhet ta hapë garën 3 muaj para.

Edvin Kondili, Klodian Braho, Andand Xholi janë kandidatët që kanë shfaqur interes për të drejtuar organin e akuzës më të rëndësishëm në vend.

Kush janë kandidatët për drejtimin e SPAK

KLODIAN BRAHO

Klodian Braho ka mbaruar shkollën e Magjistraturës në vitet 2005-2008 dhe më pas është emëruar prokuror në Berat. Në vitin 2012, Braho u transferua në Prokurorinë e Vlorës ku mbajti edhe postin e zv.drejtuesit, ndërsa në vitin 2015 u dekretua në Prokurorinë e Krimeve të Rënda.

Më pas, ai iu bashkua ekiptit të SPAK. Braho njihet edhe si prokurori që hetoi ish-kryeprokurorin Adriatik Llalla, që ishte eprori i tij. Gjithashtu firmosi arrestimin e ish-ministrit të Mjedisit Lefter Koka për çështjen e inceneratorëve. Braho ka çuar për gjykim çështjen në ngarkim të ish-kryetarit të Bashkisë së Vlorës, Shpëtim Gjika.

EDVIN KONDILI

Edvin Kondili kandidon për të dytën herë për drejtimin e SPAK-ut.  Kondili ka qenë prokuror i Krimeve të Rënda, që ka pasur gjithashtu në dorë dosje të rëndësishme. Kondili është mes prokurorëve që refuzuan shortin për dosjen Shullazi.

Kondili ka hetuar më parë dosjen e vendosjes së tritolit në farmacinë e babait të ish-ministrit të Brendshëm, Saimir Tahiri. Gjithashtu, Kondili është prokurori që ka bërë veprimet e para për sekuestrimin e 613 kg kokainë në Portin e Durrësit. Kondili ka një sërë çështjesh të trafikimit të kanabisit, por edhe dosje të tilla si “Lazarati”, por edhe dosjen e Alket Hatijas.

ADNAN XHOLI

Adnan Xholi ka mbajtur poste drejtuese në prokurori lokale, si edhe për shumë vite pranë Krimeve të Rënda. Ai njihet si prokuror që gëzon mbështetjen dhe besimin e amerikanëve. Edhe Xholi ka hetuar çështje të rëndësishme si atentati i supozuar ndaj ish-deputetit Tom Doshi dhe çështje të trafikut të drogës.