Kreu i KMSH-së, Bujar Spahiu, uron besimtarët myslimanë për Fiter Bajramin: Të bëjmë pjesë të gëzimit të varfërit dhe të sëmurët!

Kreu i KMSH-së, Bujar Spahiu, u ka uruar besimtarëve myslimanë festën e Fiter Bajramit, duke theksuar rëndësinë e solidaritetit dhe kujdesit për ata që janë në nevojë. Në një mesazh në rrjetet sociale, ai uroi që kjo festë të sjellë harmoni dhe begati në familjet shqiptare, duke inkurajuar besimtarët të bëhen pjesë e gëzimit edhe për të varfërit, të sëmurët dhe të moshuarit.

Spahiu theksoi se agjërimi i muajit të Ramazanit ka qenë një "shkollë" e madhe për besimtarët, duke mësuar vlerat e modestisë, faljes dhe përkujdesit ndaj të tjerëve. Ai u bëri thirrje besimtarëve të ruajnë të mirat që kanë mësuar gjatë këtij muaji dhe të vazhdojnë të veprojnë me vetëdisiplinë dhe ndihmës për ata që kanë nevojë.

Urimi i plotë i kreut të KMSH-së:

Të dashur motra dhe vëllezër kudo që ndodheni

Sot, besimtarët myslimanë po përcjellin muajin e madhërishëm të Ramazanit.

Po i japim lamtumirën e fundit muajit të bekuar, që la pas falje e mëshirë për secilin.

Nesër është festë, është Fiter Bajrami!

“Hani e pini të gëzuar, ngase këtë e keni fituar në ditët e kaluara.” (El-Hakka, 24)

Ne, sot i lutemi Zotit të Madhëruar – Mëshiruesit e Bamirësit, që Ramazani i nderuar, i cili në këtë botë është, fund e kye, një mirësi e madhe për ne, në Ditën e Ringjalljes të ndërmjetësojë tek Zoti për ne, duke thënë: “O Zot! Unë i kam penguar këta gjatë ditës nga të ngrënët, të pirët dhe kënaqësitë e tjera të ndryshme; pranoje ndërmjetësimin tim në favor të tyre.”

Të nderuar motra dhe vëllezër!

Agjërimi ishte një “shkollë” një mujore për secilin prej nesh.

Gjatë këtij muaji njeriu mëson se modestia dhe jo mendjemadhësia është virtyt.

Mëson se falja është më me vlerë se hakmarrja.

Mëson se përkujdesi ndaj të varfërve dhe të pamundurve është cilësi më e lartë se indiferentizmi.

Mëson vetëdisiplinimin, vetëkontrollin dhe vetedukimin.

Sot nuk mund t’i përmend të gjitha ato të mira që i mësuam nga muaji Ramazan, por desha të theksoj një çështje me rëndësi, mbi të cilën duhet të përqendrohemi me seriozitet dhe sinqeritet: drejtimin që e morëm në Ramazan, suksesin e sjelljeve dhe jetën e përparuar fetare që e arritëm, duhet t’i vazhdojmë më tej.

Të nderuar vëllezër, ruajeni atë që e fituat në Ramazan!

Nesër ne festojmë me familjet, të afërmit dhe miqtë tanë.

Por nuk harrojmë të bëjmë pjesë të gëzimit edhe të varfërit, të sëmurët, të moshuarit, për të cilët përveç lutjeve drejtuar Zotit për sikletet e tyre, japim edhe mbështetjen tonë direkte sipas mundësisë.

Uroj që kjo festë të sjellë harmoni, solidaritet, begati dhe mirëqenie në familjen e çdo shqiptari!

Fitër Bajrami le të na shërbejë si moment i vetëdijesimit tonë që të respektojmë dinjitetin dhe vlerat e përgjithshme njerëzore!

Qoftë ky Bajram një burim mirësie, dashurie dhe uniteti për ju dhe të dashurit tuaj!