Kufizimi i lëvizjes, George Frendo letër Rakacollit: Vendim diskriminues, kishim marrë masa për mbajtjen e meshës

Kryetar i Konferencës Ipeshkvore të Shqipërisë, George Frendo i është drejtuar me një letër kryetares së Komitetit të Ekspertëve Mira Rakacolli, duke e quajtur të nxituar dhe diskriminues vendimin për kufizimin e orarit të lëvizjes së qytetarëve deri në orën 20:30, duke nisur nga data 24 dhjetor, pra natën e Krishtlindjes.

Ai thotë se kisha katolike kishte marrë të gjitha masat që të kremtonte meshët në orare të përshtatshme qysh prej datës 3 dhjetor 2020, në mënyrë që t’u lejonte njerëzve të kthehshin në shtëpitë e tyre para orës 22.00.

George Frendo thotë se pak para se të publikoheshin masat e reja, kisha katolike kishtë njoftuar të gjithë besimtarët se mesha e Krishtlindjes do të kremtohej te enjte në orën 20.00, ndërsa shton se një ftesë për konsultim do ishte mirëpritur nga ana e tij.

Letra e plotë:

Për dijeni: Znj. Ogerta Manastirlliu

Nunciaturës Apostolike në Shqipëri

Tiranë 21 dhjetor 2020
E Nderuar Zonja Rakacolli,

U njohëm me vendimin e ri të Komitetit të Ekspertëve të drejtuar prej jush, rreth kufizimit në kuadër të masave anti-COVID të marra nga qeveria shqiptare që ndalon qarkullimin e njerëzve pas orës 20.30, duke filluar nga data 24 dhjetor, pikërisht natën e Krishtlindjes.

Ne si Kishë Katolike kishim marrë të gjitha masat që të kremtonim meshët në orare të përshtatshme qysh prej datës 3 dhjetor 2020, sikurse do të shihni nga dokumenti bashkëngjitur. Në këtë dokument kemi vendosur që meshët të mbahen në orare që t’u lejojnë njerëzve të kthehen nëpër shtëpitë e tyre para orës 22.00.

Ky ndryshim i papritur që nis pikërisht Natën e Krishtlindjes, na duket i nxituar dhe diskriminues ndaj komunitetit katolik, që është e vetmja Kishë e Krishterë që kremton lindjen e Krishtit netën. Sapo kishim njoftuar të gjithë besimtarët tanë dje, ditën e Diel, se mesha e Krishtlindjes do të kremtohej te enjtem në orën 20.00.

Me kënaqësi do të kishim marrë pjesë në konsultim për një gjë të tillë.

Duke ju uruar punë të mbarë ju përshëndes,
me nderime George Frendo O.P.

Kryetar i Konferencës Ipeshkvore të Shqipërisë

Znj. Mira RAKACOLLI

Kryetare e komitetit të ekspertëve antiCOVID