Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Kuvendi i lë “detyrë” Avokatit të Popullit monitorimin e shërbimeve falas në spitalet rajonale

Politiko 18 Qershor 2021, 08:22

Kuvendi i lë “detyrë” Avokatit të Popullit

Kuvendi i ka lënë si detyrë Avokatit të Popullit që gjatë këtij viti të jetë aktiv duke monitoruar marrjen e shërbimit shëndetësor falas të qytetarëve në spitalet rajonale.

Në projektrezolutën që Kuvendi ka hartuar pas raportimit vjetor të këtij institucioni bie në sy pika e fundit e cila citon se Avokati duhet “të monitorojë ofrimin e shërbimit shëndetësor në spitalet rajonale me qëllim rritjen e cilësisë së shërbimit shëndetësor falas që u ofrohet qytetarëve si dhe adresimin e shkeljeve sistematike”.

Pavarësisht kësaj detyre ishte pikërisht Avokati i Popullit që në raportin e vitit 2020 ngriti shqetësimin për të drejtën e kujdesit shëndetësor gjatë vitit të pandemisë për qytetarët ku më shumë u godit pjesa e varfër e popullatës.

Raporti nënvizonte se në lidhje me të drejtën e kujdesit shëndetësor, pandemia e COVID-19, thelloi, duke risjellë edhe njëherë në vëmendje problematikat e hershme, si dhe evidentoi problematika të reja, me të cilat u ballafaqua shoqëria, në raport me të drejtën e saj për kujdes shëndetësor të garantuar nga shteti. Individët e varfër dhe të cenueshëm financiarisht u përballën me kosto të larta ekonomike shtesë sa i përket kujdesit shëndetësor shoqëruar kjo edhe me mungesën e ofrimit të shërbimeve bazë të kujdesit shëndetësor gjatë vitit 2020.

“Sasia e kufizuar e kursimeve, mbulimi i ulët me sigurime shoqërore dhe përdorimi relativisht i ulët i shërbimeve publike çoi në rëndim të efekteve negative afatgjata të përballje me krizën e pandemisë. Rezultoi se familjet në nevojë u prekën nga diskriminimi social si dhe u goditën më shumë nga masat kufizuese kundër COVID-19. Gjithashtu të moshuarit ishin relativisht më të predispozuar ndaj problemeve shëndetësore, më të rrezikuarit nga shpërthimi i pandemisë dhe më të shumtë në humbje jete gjatë pandemisë” thuhej në raport.

Përpos pjesës së shërbimit shëndetësor Kuvendi ka kërkuar nga Avokati i Popullit që të jetë vigjilent edhe për pesë pika të tjera të tilla si të merren masa proaktive, në lidhje me informimin e qytetarëve në forma më gjithëpërfshirëse apo të aksesueshme mbi njohuritë për të drejtat dhe liritë themelore të tyre dhe mekanizmat mbrojtës, duke u angazhuar konkretisht për realizimin e aktiviteteve të parashikuara në Planin e Veprimit 2018-2022, si krijimi i Blogut për të drejtat e njeriut – Histori suksesi, në mbrojtje të të drejtave të njeriut brenda faqes zyrtare të AP.

Po kështu është kërkuar të vijojë organizimin e sesioneve informuese në shkolla 9-vjeçare dhe të mesme në rang vendi, me qëllim përmirësimin e njohurive të nxënësve dhe stafit pedagogjik mbi të drejtat e tyre themelore dhe punën e AP në mbrojtjen e këtyre të drejtave.

Ndër të tjera është kërkuar edhe të merren masa konkrete për zbatimin e marrëveshjeve të nënshkruara gjatë vitit 2020, si “Memorandumi i Mirëkuptimit midis Avokatit të Popullit dhe Institutit të Statistikave, “Për bashkëpunimin në fuqizimin e mbledhjes së të dhënave, përhapjen dhe analizën në dritën e të drejtave të njeriut dhe Agjendës së Zhvillimit të Qëndrueshëm 2030” dhe marrëveshjes së nënshkruar me UNICEF “Marrëveshja e re e Bashkëpunimit për periudhën 1 Tetor 2020 – 30 Shtator 2021”, e cila i referohet Planit të Punës 2020-2021 mes UNICEF dhe Qeverisë Shqiptare. /Monitor