Flash News

Krimi elektoral në Belsh, Prokuroria e Elbasanit 4 punonjës të IMT pas kallëzimit të PD

Incident në Giro d’Italia, qytetari përplaset nga çiklisti

PD kundër kërkesës së PS për shtyrjen e orarit të votimit në Vlorë: Abuzim me procesin zgjedhor

I kërkuar në Shqipëri për vrasje, arrestohet në Greqi Ardian Ahmetaj, shoku i Laert Haxhiut

Dita e dytë e “Giro d’Italia 2025”, rrugët që do bllokohen në Tiranë

E-TJERA

Laburistët duan të përdorin Shqipërinë si “paraburgim” për migrantët e padëshiruar

Politiko 19 Prill 2025, 19:23

Laburistët duan të përdorin Shqipërinë si

Plani i Partisë Laburiste në Britaninë e Madhe për të dëbuar azilkërkuesit e refuzuar drejt vendeve të Ballkanit, mes tyre edhe Shqipëria, ka marrë mbështetjen e Kombeve të Bashkuara.

Muajin e kaluar, Sekretarja e Brendshme britanike, Yvette Cooper, zhvilloi bisedime me kreun e Agjencisë së Kombeve të Bashkuara për Refugjatët (UNHCR), ku u diskutua dërgimi i migrantëve në “qendra kthimi” në Shqipëri, Serbi, Bosnjë dhe Maqedoninë e Veriut.

Sipas planit, qeveria britanike do të bashkëpunojë me këto shtete për të pranuar migrantët që janë refuzuar për azil në Mbretërinë e Bashkuar dhe që kanë shteruar të gjitha rrugët ligjore të apelimit. Vendet pritëse do të përfitojnë mbështetje financiare nga Londra për akomodimin e tyre në qendra të posaçme paraburgimi.

Ky propozim është pjesë e strategjisë së liderit laburist Sër Keir Starmer për të frenuar fluksin e emigrantëve që mbërrijnë ilegalisht në Britani përmes Kanalit të La Manshit me varka të vogla – një çështje e cila vazhdon të krijojë përplasje politike dhe tensione shoqërore.

Vetë UNHCR ka propozuar tashmë standarde për mënyrën se si duhet të funksionojnë këto qendra, duke e cilësuar një sistem efektiv kthimesh si të domosdoshëm. Dokumenti i agjencisë thekson se qendrat duhet të respektojnë të drejtat e njeriut dhe standardet ndërkombëtare, ndërsa ka garantuar monitorim të vazhdueshëm për të mbikëqyrur procesin.

Burime qeveritare britanike e kanë përshëndetur këtë mbështetje si “vendimtare”, duke pasur parasysh që e njëjta agjenci e OKB-së kundërshtoi planin e mëparshëm të qeverisë konservatore për dërgimin e emigrantëve në Ruandë – një skemë që u shpall e paligjshme nga Gjykata e Lartë britanike.

“Kjo mund të jetë një pikë kthese, sepse do të na japë mbrojtje ligjore në rast sfidash në gjykatë dhe do të ndihmojë gjithashtu me mbështetjen politike nga radhët e vetë Laburistëve,” tha një burim për “The Times”.

Ndërkohë, Shqipëria aktualisht ka dy qendra paraburgimi të dedikuara për migrantët, të cilat ndodhen bosh, pasi një marrëveshje e mëparshme me Italinë për t’i përdorur si qendra për shqyrtimin e azilit nuk u realizua.

Ndryshe nga plani për Ruandën, i cili parashikonte dërgimin e migrantëve në atë vend afrikan përpara shqyrtimit të kërkesave për azil, Laburistët synojnë që në këto qendra të dërgohen vetëm personat që kanë marrë përgjigje përfundimtare refuzuese.

Pavarësisht debatit, mbështetja e Kombeve të Bashkuara për këtë nismë po shihet si një zhvillim që mund të ndryshojë rrënjësisht qasjen britanike ndaj krizës së emigracionit ilegal.