Flash News

Mbytet pranë Shkëmbit të Kavajës turistja nga Sllovakia

U bë baba nga një 13-vjeçare, lirohet nga qelia i riu rom Dritson Kurti

Video/ Sulmohet 'live' televizioni shtetëror i Iranit

KPA lë në fuqi shkarkimin e prokurorit të Vlorës

Transportonte emigrantë të paligjshëm, arrestohet 24-vjeçari në Sarandë

E-TJERA

Lala: Nëse Gjykata e Lartë liron Veliajn, krijohet precedent

Politiko 16 Qershor 2025, 21:34

Lala: Nëse Gjykata e Lartë liron Veliajn, krijohet precedent
Ndaj vendimit për “arrest me burg” ndaj kryebashkiakut Erion Veliajt është bërë rekurs në Gjykatën e Lartë. Gazetarja Klodiana Lala tha në MCN se avokatët pretendojnë se Veliaj nuk përbën rrezik dhe duhet të hetohet në gjendje të lirë, pasi është ende në detyrë si kryetar bashkie.

Lala theksoi se ky është një rast i pazakontë, pasi të gjithë zyrtarët e tjerë janë hetuar jashtë funksionit. Gjykata e Lartë tani duhet të vendosë nëse do të prevalojë interesi i drejtësisë apo funksioni që Veliaj mban. Nëse lirohet, do të jetë rasti i parë me një vendim të tillë.

"Është dorëzuar një rekurs ndaj vendimit të Gjykatës së Apelit të Posaçëm, ku kundërshtohet masa e sigurisë "arrest me burg" ndaj zotit Erion Veliaj. Sipas materialeve të dorëzuara dhe argumenteve të mbrojtjes, thuhet se ai është i gatshëm të bashkëpunojë me organet e drejtësisë, duke mos përbërë rrezik për hetimet. 

Avokatët e tij pretendojnë se nuk ekzistojnë as kushtet dhe as kriteret ligjore për të mbajtur Veliajn në burg. Ata argumentojnë se ai nuk ka rrezik arratisjeje dhe nuk përbën kërcënim për hetimin, provat apo dëshmitarët. Një nga pikat kyçe të mbrojtjes është fakti që Veliaj është ende kryetar në detyrë i Bashkisë së Tiranës dhe, si i zgjedhur vendor, duhet të lejohet të ushtrojë funksionin e tij. 

Bazuar në ligj, pas paraqitjes së rekursit, caktohet një relator dhe një datë shqyrtimi. Besohet se brenda muajit korrik kjo çështje do të shqyrtohet në Gjykatën e Lartë. Aktualisht nuk ka ende një datë të saktë për seancën në Gjykatën e Lartë, pasi pritet përfundimi i shqyrtimit paraprak. Megjithatë, praktika me raste të ngjashme si ajo e zotit Beqaj, Berisha apo Meta, tregon se shqyrtimi mund të ndodhë brenda afateve të korrikut. Është e rëndësishme të theksohet se kjo është një çështje që, sipas procedurës, mund të shqyrtohet në Dhomë Këshillimi pa praninë e palëve. 

Vendimi për pranimin ose rrëzimin e rekursit mund të merret vetëm mbi bazën e dokumentacionit dhe pretendimeve të paraqitura nga të dyja palët – nga njëra anë mbrojtja e Veliajt, dhe nga ana tjetër, SPAK-u. Gjyqtarja relatore në këtë çështje është Albana Boksi, e cila është transferuar nga Gjykata e Apelit për Krime të Rënda në Gjykatën e Lartë, pas kalimit me sukses të procesit të vetingut. Ajo është një nga gjyqtaret e para që kaluan nga Apeli i Posaçëm në Gjykatën e Lartë përmes një procesi konkurrues. Gjykimi në këtë rast do të zhvillohet nga një trup gjykues me tre anëtarë. 

Aktualisht është e njohur vetëm relatorja, ndërsa pritet të mësohen edhe dy gjyqtarët e tjerë që do të marrin pjesë në shqyrtim. Ndërkohë, paralelisht me këtë proces në Gjykatën e Lartë, janë zhvilluar edhe dy seanca të tjera në Gjykatën e Apelit të Posaçëm për çështje që lidhen me informacionin dy mujor të ecurisë së hetimeve. 

Njëra prej tyre pritet të zhvillohet nesër. Avokatët do të njihen me provat e reja të paraqitura nga prokuroria dhe nëse nuk evidentohen prova të reja apo të forta, mund të kërkojnë zëvendësimin e masës së sigurisë. Veliaj ndodhet në masën "arrest me burg" prej katër muajsh. Seanca e nesërme pritet të jetë e rëndësishme për të ardhmen e tij ligjore. Në lidhje me pyetjen nëse Veliaj ka gjasa të lirohet, ekziston një dilemë e madhe përballë Gjykatës së Lartë: 

A do të prevalojë interesi i hetimit të SPAK-ut apo detyra që ushtron aktualisht Veliaj? Ky është një ndryshim thelbësor nga rastet e mëparshme të funksionarëve të lartë, të cilët në kohën e hetimeve nuk kanë qenë më në detyrë. Për momentin, praktika gjyqësore tregon se Gjykata e Lartë nuk ka pranuar lirimin për veprat penale që i atribuohen Veliajt, siç është korrupsioni. Nëse do të ndodhë ndryshe, kjo do të ishte hera e parë që një funksionar i nivelit të tij lirohet nga masa e arrestit në kushtet e një akuze për korrupsion, për shkak të detyrës që ende mban. 

Pra, e vetmja rrethanë dalluese në këtë rast është funksioni që Veliaj ushtron. Avokatët e tij mbështesin kërkesën për lirimin pikërisht mbi këtë bazë, duke u distancuar nga precedenti i rasteve të tjera. Megjithatë, mbetet për t’u parë nëse Gjykata e Lartë do të ndjekë praktikën e mëparshme apo do të vendosë një standard të ri", tha Lala. 

Të fundit