‘Mallkimi’ i qeverisë Rama me ministrat e Brendshëm, skandalet që larguan Tahirin, Xhafajn dhe Lleshajn

Në dy mandate, qeveria e drejtuar nga kryeministrit Edi Rama është përballur me akuza të forta dhe është vënë shpesh nën trysni nga opozita për shkak të emrave që kanë përfaqësues PS-në, sidomos në rang ministrash.

Gjatë këtyre dy mandateve, Rama ka reflektuar shumë ndryshime në qeveri, ndërsa disa prej tyre kanë ardhur pas akuzave, apo edhe presioneve të ndërkombëtarëve, si kusht për hapjen e negociatave të Shqipërisë me BE-në.

Konkretisht, Rama, gjatë qëndrimit në pushtet, i është dashur të përballet me ndryshime më të shpeshta kryesisht në nivel ministrash në një prej dikastereve më të rëndësishme, Ministrinë e Brendshme.

Siç dihet, në tri vitet e fundit, kjo ministri ka ndërruar tre ministra, Saimir Tahirin, i cilësuar edhe si ‘ministri kampion’ i Ramës, pas tij, Fatmir Xhafajn dhe së fundmi Sandër Lleshajn.

Por, cilat janë akuzat me të cilat u përballën deri në largimin e tyre?

Saimir Tahiri

Në fillim të marsit 2017, Saimir Tahiri dha dorëheqjen nga detyra e tij si ministër i Brendshëm.

Ai u akuzua për pjesëmarrje në organizatë kriminale dhe trafik ndërkombëtar lëndësh narkotike.

Dorëheqja e Tahirit erdhi pas presionit të qeverisë dhe parlamentin gjerman ndaj Kryeministrit Rama, si kusht për hapjen e negociatave të Shqipërisë me BE-në.

Fillimisht, akuzat ndaj Tahirit si bashkëpunëtor me vëllezërit Habilaj u bënë nga Dritan Zagani, ish-punonjës i shërbimit anti-drogë në policinë e Fierit dhe më parë punonjës i policisë kufitare në Vlorë.

Në 2015-ën, Zagani akuzoi se Tahiri kishte vënë në dispozicion të tyre makinën e tij, tashmë të famshme, audi me targë AA003GB, me të cilën Habilajt kryenin trafikun e drogës drejt Greqisë, duke qenë se policët kufitarë nuk guxonin të kontrollonin makinën personale të ministrit të tyre.

Nga hetimet e prokurorisë së Katanias, u zbuluan prova për përfshirjen e ish-ministrit të Brendshëm Tahiri në organizatën kriminale të vëllezërve Habilaj.

Fatmir Xhafaj

Fatmir Xhafaj, Ministër i Brendshëm që nga marsi 2017 dha dorëheqjen pa dhënë shpjegime në 27 tetor 2018.
Xhafaj mori postin e ministrit të Brendshëm pas dorëheqjes së Saimir Tahirit, megjithatë mandati prej pak më shumë se një vit si Ministër i Brendshëm u shoqërua me akuza të shumta nga opozita.

Gjatë kësaj periudhe, Xhafaj ishte në qendër të akuzave të opozitës.

Fillimisht i rikujtoi se Xhafaj ka qenë hetues në Krujë në kohën e Komunizmit në vitet 1982-84 si dhe drejtues i organizatës së Rinisë së Partisë së Punës. Dy ish të dënuar deklaruan për Partinë Demokratike se ai kishte ushtruar dhunë ndaj tyre kur kishte qenë hetues. Xhafaj mohoi akuzat. “Kurrë nuk kam ushtruar dhunë ndaj dikujt”, tha ai.

Pak muaj më vonë, opozita nisi një sulm tjetër kundër tij, duke e akuzuar për lidhje me krimin e organizuar dhe trafikun e drogës, konkretisht e akuzonte për favorizim të vëllait të tij Agron (Geron) Xhafaj për t'i shpëtuar drejtësisë italiane, e cila e kishte dënuar me vendim të formës së prerë për trafik droge.

Në maj 2018, opozita publikoi një vendim të gjykatave italiane në bazë të së cilit, Agron Xhafaj, vëllai i ministrit, ishte i dënuar për trafik droge në Itali. Në zyrat e opozitës u publikua një përgjim që sugjeronte se Agron Xhafaj, i cili prezantohet edhe me emrin Geron, ishte ende aktiv në trafikun e lëndëve narkotike.

Qeveria e deklaroi përgjimin e publikuar nga opozita një montazh. Rama deklaroi se përgjimi ishte i pavërtetë. Por ndërkohë, Agron Xhafaj pranoi vullnetarisht të ikte në Itali për t’iu dorëzuar drejtësisë për të vuajtur dënimin e marrë për një episod trafiku të vitit 2002.

Sandër Lleshaj

Së fundmi, në 10 dhjetor 2020, Sandër Lleshaj ka dorëzuar dorëheqjen e tij nga posti i Ministrit të Brendshëm, pas ngjarjes së rëndë që ndodhi në të gdhirë 8 dhjetori ku mbeti i vrarë nga një efektiv policie i riu Klodian Rasha dhe 48 orë pas protestave të shoqëruara me dhunë dhe përplasje me policinë në Tiranë dhe në qytete të tjera të vendit.

Në karrierën e tij, Lleshaj deri në vitin 2013 ishte pjesë e Forcave të Armatosura me gradën madhore Gjeneral Brigade dhe Zëvendës-Shef i Shtabit të Përgjithshëm.

Në shtator të atij viti ai ishte angazhuar si këshilltar për sigurinë pranë kabinetit Rama, pozicion të cilin e mbajti për gjashtë vite deri në momentin kur u bë ministër.

Lleshaj e nisi detyrën duke propozuar emërimin në polici të ish-ushtarakëve të dalë në lirim, propozim që nuk gjeti mbështetje as nga socialistët. Ai e justifikoi propozimin me përpjekjen e tij për të reformuar policinë, reformim që më pas e kaloi vetëm përmes procesit të vetingut.

Përmes nismave të tij qeveria ndryshoi kodin penal, kodin rrugor dhe ligjin e policisë duke i dhënë kësaj të fundit kompetenca për përgjimin dhe vëzhgimin ambiental.

Opozita e ka kritikuar shpesh për udhëzimin e policisë, kryesisht në rastet e protestave, për të përdorur gaz lotsjellës dhe sidomos për ndërhyrjen e dhunshme me forca të armatosura në rastin e shembjes së Teatrit Kombëtar.