Manjani: Rrenë është... të jesh Erion Veliaj, dhe rrena është neveri

Ish-ministri i Drejtësisë Ylli Manjani ka komentuar projektin politik të Belind Këlliçit, kandidati i koalicionit “Bashkë Fitojmë” për Bashkinë e Tiranës, i cili premtoi se do të ketë transport falas pa pagesë për qytetarët e Tiranës.

Në një postim në Facebook, Manjani shkruan se deklarata e Këlliçit nuk është diçka e shpikur nga ai, por një praktikë që ekziston edhe në vendet e tjera të botës. Sipas Manjanit, kjo gjetje nga ana e Këlliçit ka zënë ngushtë Erion Veliajn.

Këtë të fundit, Manjani e ka konsideruar një gënjeshtar që zor se mund t’i gjesh një të vërtetë që mund t’i ketë thënë publikut.

Postimi i plotë:

Rrena nuk ka kurrë ide.

Transporti publik falas nuk është një ide që e shpikur Belind Këlliçi. E kanë shpikur të tjerë dhe e praktikojnë disa qytete në Europë dhe Britaninë e Madhe.

Belindi thjesht e ka sjellë në vemendjen tonë, sigurisht si pjesë të programit të Tij politik.

Duhet të pranojmë se Erion Veliaj u kap gafil nga kjo ide. Dukshëm po ha veten me dhëmbë që nuk e kishte zbuluar i pari këtë ide. Po ta dinte,imagjinoni se çfarë do bënte propaganda sot në favor të saj...

Sidoqoftë, ideja që prezanton Belindi nuk është rrenë por propozim për ndryshim politikash. Është një ide që meriton debat padyshim, por nuk është rrenë. Është realitet që diku ndodh.

Ideja duhet debatuar si për përdoruesit e transportit publik, ashtu edhe nga mospëroruesit. Sepse propozimi është për të përdorë para publike për një shërbim publik. Edhe lënia e gjendjes kështu siç është kur presioni tregëtar për çmim më të lartë dhe pamamundësinë e përdoruesve për ta përballuar, nuk është zgjidhje.

Ja pra që tema ka debat, kërkon argument, kërkohen zgjidhje dhe kjo nuk është rrenë.

Rrenë është të thuash mbolla 1 milion pemë, kur e di si dreq që nuk janë mbjellë aq pemë.  Rrenë është të thuash nuk lejoj kulla kur kullat lulëzojnë. Rrenë është të thuash kam sjellë 24 orë ujë,kur nuk është hiç fare kështu. Rrenë është... të jesh Erion Veliaj dmth. Fjalë e rrenë e ka.

A gjen dikush një të vërtetë që Erion Veliaj ka thënë në publik?!

Një mo një të vetme.

Kështu që si fillim të dallojmë rrenën,aq më tepër kur është ashiqare, nga idetë që propozojnë ndryshim politikash. 

Idetë nuk janë të mbrojtura nga gabimi, por të paktën nuk janë rrena.

Rrena është neveri.

Ideja është alternativë.

A deshët alternativë?!