Manjani: Tenja e PS-së kërkon të marrë kontrollin e GjK-së, duke i rrëmbyer mandatin Sonila Bejtja

Juristi Ylli Manjani ka akuzuar PS-në se po kërkon që të marrë kontrollin e Gjykatës Kushtetuese që të marrin vendimet që duan.

Duke folur në ‘A Show’ me Adi Krastën në SYRI TV, Manjani ka akuzuar edhe presidentin Bajram Begaj, se është futur në një lojë ku nuk e di se çfarë po ndodh, ndërsa u shpreh se, mandati i anëtares së Kushtetueses Sonila Bejtja është i plotë dhe këtë e thotë e zezë mbi të bardhë Kushtetuta e Shqipërisë.

‘Një herë të vetme ka hyrë në zyrën time si ministër, rrugaçja diplomatike Romana Vlahutin, dhe ka dalë me ulërima dhe nuk ka hyrë më kurrë. Për arsye princimi, parimesh.

Ajo u shfaq në zyrën e ministrit të shtetit dhe tha; mos e lexo reformën. Palaçoja. Doli nga zyra dhe nuk u pa më.

Kush është patriot, nacionalist, që kërkon të hyjë tek tezat e sovranizmit që i artikulojnë bukur për fushatë, duhet të mbajnë përgjegjësi.

Ka pasur deputetë që pyesnin se çfarë është ONM-ja. Ka pasur deputetë të PD-së, që thonin prit ta lexojmë njëherë këtë reformën. U morën në telefon dhe u shantazhuan. Ka qenë shumë e paktë kritika në atë kohë, për këtë reformë.

Dokumentet e mia janë me shkrim kundër shumë gjërave, por prap them se, edhe unë jam përgjegjës për atë që ka ndodhur.

Parlamenti i Shqipërisë, partitë politike duhet të ndalojnë dhe të marrin frymë thellë, se çfarë kemi bëre me vendin, me sistemin.

Ka një korpus juridik me juristë shumë të mirë dhe me përvojë, të cilët për fat të keq janë lënë totalisht jashtë vëmendjes, janë njerëz me përvojë të jashtëzakonshme në procese gjyqësore, avokati.

Ka dhe sigurisht një grup që unë e kam quajtur ‘tenja juridike’ që është i lidhur grupin e PS-së, që është tenja e përhershme që e gjen vendin bosh, që përhapet me marrë pushtet dhe ata nuk ndalen, kafshojnë dhe udhëheqësin e tyre.

E kjo po ndodh edhe në Gjykatën Kushtetuese. Tenja është ajo. Përhapet pa ndalim.

Tenja ka kohë që sulmon mandatin e mbajtur nga Sonila Bejtja. Ideja është të krijohet një destabilitet në Kushtetuese dhe e kanë krijuar. Gjykata Kushtetuese është me 8 anëtar, që do të thotë 4 me 4 janë shtuar dhe do të thotë se s’ka vendime. Ja pra ku u cenua funksioni i Kushtetueses. Kjo është Gjykata Kushtetuese me e dobëta.

Tani së treti është fjala që të ketë një shumicë permanente në atë gjykatë që të merren vendimet dhe kjo po ndodh.

Mandati i Sonila Bejtjes mesa duket ju duhet.

Tani çfarë kanë shpikur? Kanë gjetur një rrotë që e kanë çuar te presidenti. Presidenti është rrotë më vete. Është bërë një bashkësi rrotash hajvanllëk total, që vetëm Kushtetuta e Vendit nuk zbatohet.

Kanë shkruar në Kushtetutë fare thjeshtë; dy mandate quhet rotacioni dhe ka ndodhur rotacioni. Me mandatin e Olta Zaçaj dhe të Sandër Simonit që është në 2028.

Tenja thotë jo, se kemi harruar një gjë që se kemi shkruar në Kushtetutë. Kanë futur në valle dhe presidentin. Presidenti s’di shkrim e këmbim dhe të kërkoj interpretim. Lexo kushtetutën.

Kjo tenja ka 3 anëtarë në Kushtetuese, që punojnë për tenjën për fat të keq.

Sonila Bejtja është mbajtëse e një mandati të plotë në Kushtetuese, si pasuese e Besnik Muçit. Besnik Muçi është emëruar për një mandat të plotë, e mbajti disa muaj dhe më pas e mori Sonila Bejtja. Kështu thotë ligji, Kushtetuta, e zezë mbi të bardhë. Çfarë interpretimi do këtu tani’, tha Ylli Manjani.