Mbetjet toksike nga Durrësi, si u përdor Shqipëria për të kontrabanduar edhe naftë ruse drejt Evropës

Prokuroria e Durrësit zbarkoi të hënën pranë zyrave të kompanisë Kurum në Elbasan dhe sekuestroi dokumentacion që besohet ka lidhje me çështjen e qindra ton mbetjeve të dyshuara si të rrezikshme që janë eksportuar nga porti i Durrësit me destinacion Tajlandën.

BAN ngriti alarmin se një anije gjigande kontenjerësh prej 175 mijë tonësh e linjës ‘Maersk' u zhduk në fund të korrikut nga radarët afër Cape Town në Afrikën e Jugut, pas një sinjalizimi të bërë prej saj tek autoritetet vendase.

BAN, beson se anija ‘Maersk Campton' dhe një anije e dytë kontenjerësh e së njëjtës linjë, ‘Maersk Candor', kanë ngarkuar në portin e Durrësit në fillim të korrikut rreth 100 kontenjerë me mbetje të rrezikshme, e cila vjen nga hiri i oxhaqeve metalurgjike elektrike (EAFD) me destinacion Tajlandën.

Por, ky nuk është rasti i parë që vendi ynë merr vëmendje edhe përtej kufijve lidhur me skandale të kësaj natyre. 

Media "Bloomberg News" ka hedhur dritë mbi rastin e anijes "Queen Majeda" që erdhi nga Libia në shtator të 2022-shit dhe përmbante cisterna të mbushura me naftë. 

Kjo anije u bllokua në ujërat shqiptare gjatë operacionit "Ring", u arrestuan 4 shtetas libanezë, mes të cilëve edhe kapiteni i saj, Zuhair Alkwafit. 

Në një artikull të 6 shkurtit të këtij viti, nënvizohet se anija ishte mbushur me naftë, që në treg kapte një vlerë prej 2 milionë dollarësh. Në shkrim theksohet se anija ishte nisur nga porti i Bengazit në Libi drejt Porto Romanos në Shqipëri, një largësi kjo prej 600 milje detare. 

"Zuhair Alkuafi, kapiteni 55-vjeçar libian, e trajtoi udhëtimin si të zakonshëm që e kishte kryer edhe më parë: Ai kishte një certifikatë të nënshkruar që tregonte se karburanti e kishte origjinën në Libi nga Brega Petroleum Marketing Co., një degë kjo e kompanisë shtetërore të vendit National. Oil Corp", thuhet në shkrim. 

Pas kapjes së anijes në ujërat shqiptare, inspektorët shqiptarë zbuluan se edhe depozitat e ujit ishin mbushur plot me mijëra litra naftë dhe këtu lindën dyshime për kontrabandë dhe dokumente të falsifikuara. 

Ata gjithashtu dyshuan se dokumentet që tregojnë se karburanti e kishte origjinën në Libi ishin të falsifikuara. Marrësi i synuar, thanë prokurorët dhe anëtarët e ekuipazhit shqiptarë, ishte Kastrati Group SH.A. Kjo kompani konfirmoi në një email se kishte marrë dërgesa të gazit detar nga 'Queen Majeda' në korrik dhe gusht, të kontraktuara përmes një kompanie në Dubai. Por 'Kastrati' tha se nuk kishte një kontratë blerjeje për ngarkesën që anija 'Majeda' mbante në kohën e ndalimit të saj", thuhet në shkrim. 

Ndalimi i anijes ngriti më shumë pyetje në lidhje me kontrabandën e karburantit: Kush qëndronte pas saj? Pse mundi të ndodhte? Nga erdhi karburanti? Dhe ku po shkonin paratë?

Një hetim i "Bloomberg News", bazuar në të dhënat e transportit dhe intervistat me zyrtarë libianë, njerëz të njohur me biznesin e naftës në Libi dhe anëtarët e ekuipazhit, zbuloi se deri në 40% e karburantit në vend importohej nën një program subvencionimi qeveritar, ose rreth 5 miliardë dollarë në vit, por ky program rrjedh përmes tregtisë së paligjshme. Nga hetimet rezultoi se pjesa më e madhe e karburantit të importuar vjen nga Rusia.

Po ashtu theksohet se këto sasi me naftë ruse kishin për qëllim shmangien e sanksioneve të vëna nga vendet e Evropës, pas nisjes së luftës në Ukrainë.

Sipas "Bloomberg News", karburanti mori rrugën e tij nga Libia në vendet evropiane, pasi këto të fundit kanë ndaluar importet ruse të karburantit. 

Pra po përdoren skema dhe metoda të ndryshme që nafta me origjinë ruse të shitet në tregjet evropiane duke kaluar në "heshtje" nëpër ujërat shqiptare. 

“Mbyllja e tregjeve evropiane pas pushtimit rus të Ukrainës dhe sanksionet perëndimore që pasuan, shkaktuan një rritje të mprehtë të eksporteve për naftën e rafinuar ruse në Afrikën e Veriut", tha Charles Cater, drejtor i hetimeve në Sentry, një organizatë jofitimprurëse me bazë në Uashington, e cila kohët e fundit raportoi për një rritje të korrupsionit dhe aktiviteteve të paligjshme në Libi.