Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Mbledhja e përbashkët Kosovë-Shqipëri, ish-ambasadori: Raportet nuk janë të kënaqshme, mund të bëhet më shumë

Politiko 20 Dhjetor 2024, 10:01

Mbledhja e përbashkët Kosovë-Shqipëri, ish-ambasadori:

Kosova dhe Shqipëria do të mbajnë sot një mbledhje të përbashkët të dy kuvendeve në Prishtinë. Në total, do të marrin pjesë 130 deputetë, 70 ligjvënës do të jenë nga Kuvendi i Kosovës dhe 60 të tjerë nga Kuvendi i Shqipërisë.

Por, teksa bashkëpunimi ndërmjet Kosovës dhe Shqipërisë ka shënuar disa arritje, shumë prej marrëveshjeve të nënshkruara mes dy qeverive ende nuk kanë gjetur zbatimin e plotë.

Kjo ka ngritur pyetje për shkaqet e dështimeve në angazhimet e përbashkëta.

Ish-ambasadori i Kosovës në Shqipëri, Ramiz Lladrovci ka theksuar se bashkëpunimi mes Kosovës dhe Shqipërisë nuk është në nivelin e duhur dhe se raportet nuk mund të maten vetëm përmes këmbimit tregtar, arsimit apo kulturës.

Ai shprehu shqetësimin se marrëdhëniet mes dy shteteve janë ende të vakëta dhe të kufizuara, duke theksuar se Shqipëria dhe Kosova duhet të bashkëpunojnë në një nivel më të thellë.

“Nuk e shoh të kënaqshëm raportin Kosovë-Shqipëri, raporti nuk matet vetëm me këmbimin tregtar, bashkëpunimin në arsim e kulturë, apo ndonjë fushë të caktuar. Këtë bashkëpunim e shoh në dritën e asaj që na bashkon përtej relacioneve të dy shteteve, dy parlamenteve apo qeverive”, tha ai.

Lladrovci theksoi se bashkëpunimi duhet të jetë aq intensiv sa që “vetëm formalitetet administrative të jenë shenjë ndarëse”, duke përmendur heqjen e barrierave doganore dhe administrative si një hap thelbësor.

Sipas tij, bashkëpunimi duhet të përfshijë njohjen e ndërsjellë të dokumentacionit, lëvizjen e lirë të kapitalit dhe mallrave, duke i dhënë prioritet zhvillimit të sistemeve të mbrojtjes dhe diplomacisë në përputhje me interesat kombëtare.

“Mund të bëhet më shumë. Shqipëria është përtej konceptit të interesit pushtetar dhe raporteve tregtare. Heqja e Doganës dhe ngarkesave administrative, njohja e ndërsjellë e dokumentacionit të të gjitha natyrave, prania e kapitalit, mallrave dhe të mirave tjera, pa limite dhe pa asnjë pengesë, të çfarëdo natyre. Akademitë dhe institutet tona të kenë bazën e vlerave të përbashkëta, me aleanca të përbashkëta dhe brenda sistemit të njëjtë të mbrojtjes, diplomacisë dhe interesit nacional”, tha Lladrovci.

Lladrovci u shpreh se përtej bashkëpunimit ekonomik dhe politik, është koha që të dy shtetet të përballen me sfidat më të mëdha globale, siç janë energjia, siguria dhe migracioni.

“Inati e vret njeriun e le ma interesin nacional apo shtetin. Urtësia duhet të jetë thelbi i krerëve tanë për marrëdhëniet tona. Neglizhenca aktuale, siç e shoh unë, ka të bëj më shumë me egon, inferioritetin dhe ndjenjën e vlerës më të vogël. Energjinë, siguria dhe perspektiva për të frenuar migracionin, janë kapituj jetik që mendjet më të ndritura të kombit do të duhej ta kishin preokupim, natyrisht, edhe prioritete politike të qeverive tona”, shprehet ai.