McGonigal pranon fajin në gjykatë, rrezikon 5 vite burg

Ish-agjenti i FBI-së, Charles McGonigal, ka pranuar fajësinë në një gjykatë në Nju Jork për çështjen e ngritur ndaj tij se ka punuar për një oligark rus, të sanksionuar nga SHBA. Bëhet fjalë për oligarkun rus, Oleg Deripaska, i njohur si mik i Vladimir Putinit.

Sipas CNN, ish-shefi i kundërzbulimit për Byronë Federale të Hetimeve në Nju Jork, u deklarua fajtor të martën për akuzën që e implikon atë në komplot në lidhje me një skemë në shërbim të oligarkut rus që ishte sanksionuar nga SHBA-të në vitin 2021.

Edhe pse ishte betuar për çrrënjosjen e përpjekjeve të huaja për të vjedhur sekretet jetike të sigurisë kombëtare dhe ekonomike në një nga qytetet më pjellore të botës për spiunazh, Charles McGonigal ka bërë të kundërtën.

Veterani i FBI-së, i cili doli në pension në vitin 2018, u deklarua fajtor në gjykatën federale, duke pranuar se ka shkelur Aktin Ndërkombëtar të Fuqive Ekonomike të Emergjencave (IEEPA)

Ai gjithashtu pranoi akuzat për pastrim parash, për shkak se më herët kishte negociuar dhe rënë dakord për një marrëveshjeje me prokurorët nga Zyra për Distriktin Jugor të Nju Jorkut, për pranimin e fajësisë.

Ish-zyrtari i rangut të larte në FBI u arrestua në Aeroportin Ndërkombëtar “John F. Kennedy” në janar pasi

Njëra prej tyre lidhej drejtpërdrejtë me shërbimet e tij private ndaj oligarkut rus Oleg Deripaska, të cilin duhet ta mbante në mbikqyrje, porn ë të vërtetë u pagua prej tij për të lobuar në SHBA që të tërhiqeshin sanksionet.

McGonigal po ashtu u akuzua për fshehjen e qindra mijëra dollarëve që kishte marrë nga një ish-punonjësi i agjencisë së inteligjencës shqiptare (Agron Neza), gjatë kohës që shërbente ende si zyrtar i lartë në byronë e hetimit.

Gjatë seancës gjyqësore, avokati i McGonigal, Seth DuCharme i tregoi gjykatësit federal në Uashington se ata mund të zgjidhin çështjen e lidhur me Shqipërinë deri në fund të muajit.

Në gjykatë të martën, McGonigal iu përgjigj një sërë pyetjesh në lidhje me skemën e paligjshme me Deripaskën dhe kompetencën e tij mendore përpara se gjyqtarja e qarkut Jennifer Rearden të binte dakord me deklaratën e tij për pranimin e fajësisë.

“Mendimet i kam të kthjellëta”, i tha ai gjyqtares, duke shtuar se ndihej “shkëlqyeshëm“. 55-vjeçari më tej shtoi se ndihej “thellësisht i penduar” për veprimet e tij.

“Unë paraqitem para jush në këtë gjykatë për të marrë përgjegjësinë e plotë pasi veprimet e mia nuk synonin kurrë të lëndonin Shtetet e Bashkuara, FBI-në, familjen dhe miqtë e mi”, tha McGonigal, duke u dukur herë pas here edhe emocional.

“Kam rënë dakord me një palë tjetër për të mbledhur informacion nënçmues me burim të hapur për një oligark rus të quajtur Vladimir Potanin, i cili ishte një konkurrent biznesi i Oleg Deripaska. E dija se Deripaska ishte vendosur në listën e sanksioneve nga qeveria amerikane. Unë e kuptoja se informacioni që mblodha në fund do të përdorej për ta futur Potanin në listën e sanksioneve të SHBA-së. E kuptova që puna që bëra do t’i jepte njëfarë përfitimi Deripaska-s dhe sipas ligjit të SHBA-së, nuk duhej t’i ofroja asnjë shërbim Deripaskës, qoftë edhe indirekt”, deklaroi ai.

McGonigal tani mund të përballet me një dënim maksimal prej pesë vjetësh në burg për akuzën të cilën ai pranoi sot, sipas gjyqtares Rearden.

Gjyqi i radhës ku ish-zyrtarit të FBI do ti komunikohet edhe dënimi është caktuar për në 14 dhjetor.

Ndërkohë, avokatët e tij treguan se do t’i kërkojnë gjykatësit të marrë në konsideratë një ofertë të klasifikuar informacioni në lidhje me punën e McGonigal për qeverinë amerikane përpara se të shqiptojnë dënimin e tij.