Më 20 Nëntor u anëtarësua në PD/ Kush është demokrati që sot u bë “shok” me Ramën; nga takimi me Bashën te party me Salianjin

Kryeministri Edi Rama ka zhvilluar sot një tjetër takim onlin me aplikantët në nismën “Gati Për Shqipërinë”.

Kreu i Qeverisë veçoi disa prej të rinjve, të cilëve iu tha që sa më parë të paraqiteshin për një intervistë. Mes tyre ishte dhe Hansi Kapllani që Rama tha se ai dikur protestonte kundër tij.

Hansi Kapllani: Unë kam mbaruar Bachelori për Administrim dhe Politika Sociale. Kontributi që mund të jap është konkretisht në fushën e arsimit të lartë. Mendoj që kam një eksperiencë të mjaftueshme si në atë empirike dhe teorike.

Rama: Ne jemi takuar bashkë. Unë të kam takuar ty se doli në protestë kundër meje fuqishëm dhe prandaj e takova, pastaj ramë dakord që të mos biem dakord, po të jemi shok

Hansi Kapllani: Kjo është e bukura e këtyre takimeve.

Por kush është Hansi Kapllani, i riu korçar cili vetëm pak muaj para zgjedhjeve parlamentare të 25 prillit vendosi t’i bashkohet Partisë Demokratike, ndërsa sot ka zgjedhur të bashkëpunojë me kryeministrin Rama, edhe pse duhet theksuar se punonjësit e administratës shtetërore nuk njohin ngjyrime politike, aty ku Hansi Kapllani synon të futet për të kontribuar për Shqipërinë.

Më 20 Nëntor të vitit të kaluar, kryetari i degës së PD-së në Korçë Andrea Mano, përmes një postimi në rrjetet sociale njoftonte se Hansi Kapllani ishte anëtari më i ri i Partisë Demokratike, teksa shpërndante disa foto krah tij.

“Të rinjtë bëhen pjesë e Partisë Demokratike në Korçë. Energjia e tyre i bashkohet energjisë së madhe për ndryshim më 25 prill,” shkruante Mano.

Gjatë fushatës elektorale për zgjedhjet e 25 prillit, Kapllani ka qenë pjesë aktive e PD-së, teksa gjatë vizitës së Bashës në Korçë, ka qenë pjesë e takimit që kryedemokrati organizoi me një grup të rinjsh.

Hansi Kapllani, siç mund ta shihni dhe në fotot e mëposhtme, ka marrë pjesë dhe në një party të organizuar në qytetin juglindor nga kandidati për deputet Ervin Salianji.

Para 25 prillit, Hansi Kapllani besonte në një fitore të Partisë Demokratike në zgjedhjet parlamentare, ndërsa pas humbjes ka vendosur të aplikojë në nismën “Gati Për Shqipërinë”, edhe pse kjo nismë është e Qeverisë “Rama”, të cilin ai e kishte kundërshtar politik rreth dy muaj më parë.