Media amerikane: Yuri Kim po zbaton axhendën e Sorosit dhe kërcënon mbështetësit e Berishës; si 'i përdori' kongresmenët kundër Metës

Media amerikane "CD Media" akuzon ambasadoren amerikane Yuri Kim se po zbaton axhendën e George Soros në Shqipëri. Gazetarja Christine Dolan shkruan se shpallja 'non grata' e ish-kryeministrit Sali Berisha ka ardhur sepse ky i fundit ka qenë një zë kundër ndikimit të Sorosit.

Në shkrimin e saj, gazetarja thekson se tashmë që Berisha po tenton të rimarrë PD-në, Kim po "kërcënon" mbështetësit e tij me sanksione. Referuar dhe mediave shqiptare, Dolan thotë se Kim po ndërhyn përtej normave të lejuara për një diplomate.

Gjithashtu shkruan se ambasadorja është "hakmarrë" ndaj presidentit Ilir Meta, pasi ky i fundit deklaroi se Kim është në anën e qeverisë. Këtë akuzë gazetarja amerikane e lidh me vizitën e tre kongresmenëve në Shqipëri, të cilët nuk u takuan me presidentin Meta.

Ajo e lidh këtë me arsyen se Meta mbështet Berishën dhe se Kim i ka "përdorur" ata në luftën kundër ish-liderit të PD. Sipas Dolan, kongresmenët nuk e dinë që vendimi i DASH për Berishën po vihet në dyshim nga republikanët në SHBA.

Gazetarja sjellë shembullin e kongresmeni Lee Zeldin, i cili kërkoi disa herë provat pse Berisha u shpall "non grata" në SHBA. Gazetarja bën me dije se "CD media" ka kontaktuar disa herë ambasadoren për të marrë një përgjigje për këto çështje, por nuk Kim nuk i është përgjigjur.

Shkrimi i plotë i Christine Dolan:

CD Media ka raportuar vazhdimisht për korrupsionin e Departamentit të Shtetit të SHBA në të gjithë Europën Lindore. Shqipëria është një nga rastet më të këqija të ndërhyrjes në politikën lokale, për të cilën ishte i famshëm ish-ambasadori i SHBA, Donald Lu.

Megjithatë, ambasadorja aktuale e SHBA-së, Yuri Kim e ka çuar këtë korrupsion në një nivel tjetër. Ka qenë e qartë për disa kohë që George Soros dhe organizata e tij qëndronin pas pjesës më të madhe të korrupsionit në DASH nga Ukraina në Ballkan.

Kryeministri shqiptar Edi Rama shkoi në dasmën e fundit të Soros. Alex Soros ka disa kohë që po zhvillon diplomaci negociatore për globalistët në Ballkan.

Yuri Kim po zbaton axhendën e Soros në Shqipëri. Soros qëndron pas procesit të ‘Reformës në Drejtësi’, i cili iu shërbeu gjyqtarëve që i kishin shërbyer regjimit.

Tani e kuptoni shtysën pas sanksioneve ndaj Sali Berishës, një armik prej shumë kohësh i Soros. Berisha ka deklaruar se dekada më parë ai besonte në axhendën e Soros, derisa zbuloi se Soros po rikthente komunistët e rrëzuar në pozita burokratike në të gjithë Europën Lindore.

Tani që Berisha po kërkon të rimarrë kreun e Partisë Demokratike në Shqipëri, Yuri Kim është hedhur në veprim, duke kërcënuar se do të anulojë vizitat në SHBA për ata që mbështesin Kuvendin e jashtëzakonshëm të partisë, e cila ka të ngjarë ta kthejë Berishën në krye të opozitës.

Kim po kërcënon gjithashtu deputetët shqiptarë me mosnjohjen e firmave të Kuvendit, si një përpjekje korruptive për të ndaluar procesin.

Prandaj në këtë kuptim dhe nga një këndvështrim pragmatik, ndërhyrja e ambasadores Kim është krejtësisht joefektive. Është një lëvizje e çoroditur që shkon përtej normave të lejuara për një diplomat pa arritur të krijojë efekt.

“I them drejtpërdrejt ambasadores amerikane të mos mbrojë Edi Ramën”, deklaroi Meta me forcë pas ‘shpërthimeve’ të Kim në media.

Ambasadorja Yuri Kim ftoi së fundmi tre kongresmenë amerikanë në Shqipëri për të kontrolluar risistemimin e refugjatëve afganë. Teksa ndodheshin aty, ata takuan kryeministrin Edi Rama dhe kreun e opozitës Lulzim Basha.

Ishte e çuditshme që ata nuk takuan presidentin Meta, i cili po mbështet Berishën.

Takimi me Bashën u servir në mediat vendase si kongresmenë republikanë që mbështesin Bashën. E vërteta mund të jetë krejt ndryshe. Gazetat shkruanin se Yuri Kim përdori kongresmenët edhe pa e ditur ata, takimi u përdor si mjet për të ndihmuar kundër luftës me Berishën për kontrollin e Partisë Demokratike. Ata nuk e dinë që republikanët po vënë në dyshim vendimin e Blinken për Berishën.

Kongresmeni Lee Zeldin ka qenë i zëshëm duke kërkuar provat pas përcaktimit të Berishës nga DASH si person non grata në SHBA. CD media kontaktoi ambasadoren Kim për të gjitha këto çështje çdo javë dhe ne nuk morëm asnjë përgjigje.