“Metamorfoza”, Gjykata merr kohë për mënyrën e gjykimit të të pandehurve

Gjykata e Posaçme e shkallës së parë çeli të enjten më 17 prill shqyrtimin gjyqësor të çështjes penale në ngarkim të biznesmenit Pëllumb Gjoka, i akuzuar për vrasje dhe grup të strukturuar kriminal, si dhe ndaj të akuzuarve si bashkëpunëtorë të tij. Në sallën e gjyqit ishte i pranishëm vetëm i pandehuri Edmond Preka, ndërsa të pandehurit e tjerë, Pëllumb Gjoka, Behar Brajoviq, Astmer Bilali, ish-shefi i Drejtorisë së Forcës Operacionale, Oltian Bistri, zyrtari tjetër i policisë Ardit Hasanbegaj dhe prokurori Xhevahir Lita nuk ishin të pranishëm. Ata u përfaqësuan nga mbrojtësit e tyre ligjorë, të cilët paraqitën qëndrimet sa i përket gjykimit të shkurtuar.

Kryesuesja e trupit gjykues, Etleva Deda i pyeti avokatët e të pandehurve nëse i qëndronin kërkimit për gjykim të shkurtuar të paraqitur në seancën paraprake. Përfaqësuesit ligjorë të Gjokës, avokatët Gurali Brahimllari dhe Ylli Manjani kërkuan që të parashtronin kërkesa që i cilësuan si të veçanta, duke shpjeguar se kishin të bënin me papërdorshmëri dhe pavlefshmëri të akteve. Ata u shprehën se kishin kërkuar gjykim të shkurtuar në seancën paraprake, pasi kishin pasur pritshmëri se Gjykata Kushtetuese do të deklaronte të paligjshme dhe të papërdorshme përgjimet SKY ECC të kryera nga autoritetet franceze.

Ata thanë se në fillim donin të parashtronin kërkesat e veçanta, por trupi gjykues nënvizoi se në këtë moment procedurial, duhej të shprehnin vullnetin për gjykimin e shkurtuar. Avokatët u përgjigjën se në këto kushte, nuk mund të zhvillohej procesi me gjykim të shkurtuar. Edhe avokatja e të pandehurit Edmond Preka u shpreh se do të paraqesin kërkesa për pavlefshmëri dhe papërdorshmëri të akteve, si dhe se tërhiqen nga kërkimi për gjykim të shkurtuar.

Mbrojtësit e të pandehurve të tjerë u qëndruan kërkimeve për gjykim të shkurtuar, në gjendjen që janë aktetet, por disa prej tyre kërkuan ndarjen e çështjes.

Sipas mbrojtësit të Gjokës, avokatit Gurali Brahimllari, çështja nuk mund të ndahet pasi akuzat janë në bashkëpunim. Megjithëse i cilësoi akuzat të pabazuara në prova dhe të ngritura apriori, Brahimllari këmbënguli se në kushtet kur është përcaktuar bashkëpunimi dhe grupi i strukturuar, nuk mund të ketë ndarje.

Edhe prokurorët e çështjes, Arben Kraja dhe Bledar Maksuti vërejtën se çështja nuk duhet të ndahet, pasi dëmtohet gjykimi.

Në vijim, prokurori Kraja paraqiti në mënyrë të përmbledhur parashtrimet për çështjen, duke vërejtur se i qëndronin besnik kërkesës për gjykim.

Pasi u tërhoq, trupi gjykues vlerësoi të marrë kohë për t’u shprehur lidhur me kërkimet që kanë të bëjnë me mënyrën e vijimit të procesit dhe e shtyu seancën për më datë 23 prill, në orën 08:30.

Biznesmeni Pëllumb Gjoka, i shpallur nga qeveria ‘Rama’ si investitor strategjik, u arrestua në korrik të vitit 2023 si pjesë e një organizate kriminale, pasi sipas SPAK, komunikimet në aplikacionin Sky ECC që e lidhin me një sërë veprash penale të rënda, përfshirë vrasje.

Ndaj Gjokës dhe anëtarëve të tjerë të grupit ka nëntë lloj akuzash për vepra penale, mes të cilave vrasje, korrupsion e aktiv e pastrim parash, të kryera në kuadër të grupit të struktuar kriminal. Ndërsa zyrtarët e arrestuar si pjesë e organizatës akuzohen për korrupsion, zbulim të akteve apo të dhënave sekrete, si dhe për sigurimin e kushteve dhe mjeteve për të kryer vrasje.

Gjoka e ankimoi vendimin që e mban në burg në të tre shkallët e gjykimit, duke kundërshtuar si të paligjshëm ndalimin e tij në bazë të provave të marra nga Sky ECC, por pa rezultat.

Në vijim paraqiti kërkesë në Gjykatën Kushtetuese për shpalljen të papërdorshme të komunikimeve Sky ECC, por me një vendim unanim të datës 30 dhjetor, Gjykata Kushtetuese e rrëzoi kërkesën. Komunikimet e kapura nga autoritetet franceze në aplikacionin Sky ECC kanë shërbyer si bazë e një sërë hetimesh ndaj krimit të organizuar, politikanëve dhe zyrtarëve të lartë të drejtësisë. Reporter.al