Mik i Kosovës, ndërron jetë ish-kandidati për president në SHBA, Bob Dole

Ish-senatori amerikan, Bob Dole ka ndërruar sot në moshën 98-vjeçare. Këtë lajm e ka dhënë etë familja e tij përmes një deklarate.

“Senatori Robert Joseph Dole vdiq në gjumë, mëngjesin e sotëm. Ai u ka shërbyer me besnikëri Shteteve të Bashkuara të Amerikës për 79 vjet,"- thuhej ndër të tjera në deklaratën e familjes së tij.

Kujtojmë se në muajin shkurt të këtij viti, Dole tregoi se ishte diagnostikuar me kancer në mushkëri.

“Kam disa vështirësi përpara, por gjithashtu e di se iu bashkohem miliona amerikanëve që përballen me sfida të konsiderueshme shëndetësore”- tha Dole kur njoftoi për sëmundjen.

 Ai ka kaluar një çerek shekulli në Senatin amerikan, ku, për disa vite, ka shërbyer si udhëheqës i shumicës. Në vitin 1996 ka qenë kandidat i Partisë Republikane për president të SHBA-së. Në vitin 1990, Dole ka udhëhequr një delegacion të SHBA-së në Kosovë, ndërsa në gusht të vitit 2020, për nder të angazhimit të tij për Kosovën, busti i tij është ​vendosur në Prishtinë.

Asokohe, përmes një video-mesazhi, Dole shprehu mirënjohje për inaugurimin e bustit:

“Më vjen keq që nuk mund të jem me ju në inaugurimin e bustit, më kujton kohën e para 30 vjetëve. Tridhjetë vjet kemi punuar për të krijuar një shtet të fortë dhe shpresoj se do të vazhdoni të punoni për t’u bërë edhe më të fortë."

Ndërkohë, në vitin 2020, më 30 gusht, përmes një postimi në Tëitter, Dole shkroi:

"Tridhjetë vjet më parë, unë dhe kolegët e mi kemi udhëtuar për herë të parë në Prishtinë. Askush nga ne nuk mund ta dinte se ky do të ishte fillimi i një rrugëtimi drejt pavarësisë për popullin e Kosovës."

Më 1 dhjetor, Dole bën postimin e fundit në Twitter për Kosovën, duke paralajmëruar një program të Institutit Dole për historinë e Kosovës:

“Zoti e bekoftë Amerikën dhe Zoti e bekoftë Kosovën."