Flash News

Përplasje mes tre automjeteve në Lushnjë, katër të plagosur

Vrasja e Xhulio Prelës, Gjykata e Apelit i kërkon SPAK bisedat e Ervis e Brilant Martinajt

Dyshohet se dhunuan djalin e ish-deputetit të PD në Lundër, dy të proceduar

I riu denoncoi gjendjen skandaloze të rrugës, dy zyrtarët e PS e dhunojnë (VIDEO)

Ekzekutohet me armë zjarri roja i një objekti në Vlorë

E-TJERA

Mister në vdekjen e 29-vjeçarit të Rojes Bregdetare në Greqi, një shqiptar i dyshuar

Politiko 27 Prill 2025, 18:03

Mister në vdekjen e 29-vjeçarit të Rojes Bregdetare në

Autoritetet greke kanë nisur hetimet për vdekjen misterioze të 29-vjeçarit Nikos Karaklas, pjesëtar i Njësisë së Narkotikëve të Rojes Bregdetare, i cili u gjet i varur në kapelën e Panagia Faneromeni në Sigri, në ishullin e Lesvos.

Fillimisht ngjarja u trajtua si vetëvrasje, por dyshimet e ngritura nga familjarët për një skenar të inskenuar kanë çuar në hapjen e pistave të reja hetimore, përfshirë atë të vrasjes.

Disa orë para se Karaklas të gjendej i vdekur, një sasi e madhe droge – 8 kilogramë marijuanë dhe 1 kilogram kokainë – ishte sekuestruar në një kamion që kishte mbërritur nga porti i Pireut në Lesvos. Në lidhje me këtë rast, një 30-vjeçar grek është arrestuar, ndërsa një shqiptar është në kërkim. Policia po heton edhe mundësinë e përfshirjes së këtyre ngjarjeve me vdekjen e 29-vjeçarit.

Familjarët e tij kanë theksuar se i riu nuk kishte shfaqur kurrë shenja depresioni ose tendenca vetëvrasëse. Nëna e tij ka pohuar se ai kishte marrë kërcënime më herët dhe se “në vend të tij luhej për shumë para”, duke nënkuptuar lidhje të mundshme me veprimtari kriminale.

Detaje të reja kanë shtuar edhe më shumë dyshimet: Karaklas u gjet i varur në një pozicion ku këmbët e tij preknin tokën, fakt që shton pikëpyetjet për një inskenim. Ai ishte me pushim mjekësor, por burime të tjera sugjerojnë se mund të ketë qenë në shërbim për operacionin antidrogë në port. Po atë ditë, Karaklas po lëvizte me automjetin e tij zyrtar, pa qenushin e trajnuar K9 që zakonisht e shoqëronte.

Për më tepër, celulari dhe këpucët e tij janë gjetur rreth 87 kilometra larg vendit ku u zbulua trupi, duke shtuar më tej paqartësitë mbi atë çfarë ndodhi në orët e fundit të jetës së tij.

Familja e tij ka angazhuar një konsulent teknik mjeko-ligjor për një ekspertizë të pavarur dhe ka ngritur padi ndaj një punonjësi policie, i cili kishte komentuar më herët në rrjete sociale mbi lidhjet e mundshme të rojës bregdetare me rrjete trafiku droge.

Hetimet po përqendrohen në zbardhjen e kontakteve të fundit të Karaklas, me synimin për të kuptuar nëse ka patur përleshje me persona të tjerë – pasi ai u gjet me plagë në fytyrë dhe në pjesë të tjera të trupit – dhe për të sqaruar se si përfundoi në Sigri pas një udhëtimi një orë e gjysmë nga shtëpia e tij në Moria.

Përgjigjet pritet të vijnë nga analiza e celularit dhe dëshmitë që po mblidhen nga rrethi i tij i afërt.

Të fundit