Mohoi gjenocidin në Srebrenicë, Kuvendi i Malit të Zi shkarkon ministrin e Drejtësisë

Parlamenti i Malit të Zi shkarkoi nga detyra mbrëmjen e të enjtes, ministrin e Drejtësisë, të Drejtat e Njeriut dhe Pakicave Vladimir Leposavic pasi ai shprehu dyshime në lidhje me vendimet e gjykatës së Hagës që klasifikoi masakrën e Srebrenicës në vitin 1995 nga forcat serbe të Bosnjës si gjenocid.

Shkarkimi i tij u mbështet nga votat e 43 deputetëve të opozitës dhe deputetëve të koalicionit "E zeza mbi të bardhë". Dy blloqet e tjerë të shumicës qeverisëse, Për të Ardhmen e Malit të Zi dhe Paqja është kombi ynë, nuk e mbështetën shkarkimin e tij.

Leposavic i tha parlamentit se ishte i penduar nëse ndonjë nga vërejtjet e tij kishte lënduar dhe përçarë njerëzit.

“Unë u bëj thirrje të gjithë qytetarëve, veçanërisht të krishterëve dhe myslimanëve, që të bashkëpunojnë, flasin dhe respektojnë krimet e kryera kundër kombit të tyre. Në deklaratën e mëparshme, unë thashë se më vjen keq që përgjigjja ime e ngathët lëndoi njerëzit. Unë do të paguaj çmimin por qeveria do të mbijetojë,"tha Leposavic

Më 5 Prill, Kryeministri Zdravko Krivokapic propozoi shkarkimin e Leposavic, duke pretenduar se ai nuk kishte treguar respekt për vendimet e gjykatës ndërkombëtare dhe politikën e vetë qeverisë.

Politikani pro-serbe kishte argumentuar në 29 mars se gjykata e OKB-së për krimet e luftës në Hagë, e cila klasifikoi masakrat e vitit 1995 të boshnjakëve nga Srebrenica si gjenocid, nuk kishte asnjë legjitimitet.

Ai tha se kjo ishte për shkak se kishte shkatërruar prova në lidhje me trafikimin e pretenduar të organeve të civilëve serbë në Kosovë. Ministri më vonë këmbënguli se ai nuk po mohonte gjenocidin e Srebrenicës por duke shprehur qëndrimin e tij në gjykatën e Hagës në përgjithësi.

Gjatë seancës parlamentare, Krivokapic tha se Mali i Zi duhet të vendosë nëse do të jetë një vend evropian dhe demokratik apo të ndjejë vazhdimisht pasojat e konflikteve të viteve 1990, raporton BIRN.

Ndërkohë, Fronti Demokratik pro-Serb, paralajmëroi se shkarkimi i ministrit do të rrezikonte të ardhmen e qeverisë së koalicionit.

"Krvokapic nuk do të jetë më Kryeministër pasi Partia Demokratike e Socialistëve të opozitës, DPS, e ndihmoi atë të shkarkonte një ministër," i tha parlamentit një nga udhëheqësit e DF, Milan Knezevic.

Të enjten, parlamenti miratoi gjithashtu një rezolutë mbi njohjen e gjenocidit të Srebrenicës, të propozuar nga partitë e opozitës. Rezoluta e mbështetur nga 55 deputetë nga opozita dhe nga dy blloqe qeverisëse, Paqja është kombi ynë dhe "E zeza mbi të bardhë", ndalon mohimin publik të gjenocidit të Srebrenicës dhe u bën thirrje institucioneve shtetërore të hetojnë dhe ndjekin penalisht krimet e luftës.

Blloku më i madh në shumicën qeverisëse, Për Ardhmërinë e Malit të Zi, votoi kundër rezolutës, duke e quajtur atë një provokim kundër serbëve të vendit.

Një bllok tjetër në shumicën qeverisëse, Paqja është Kombi ynë, votoi për rezolutën pas miratimit të ndryshimeve të saj që kërkonin dënimin e të gjitha krimeve të luftës të kryera në ish Jugosllavi, por hodhi poshtë çdo përpjekje për t'ua dhënë më shumë përgjegjësi për krime të tilla serbëve, boshnjakëve ose Kroatët.

Në 2009, parlamenti malazes miratoi një deklaratë që pranon një rezolutë të Parlamentit Evropian mbi Srebrenica, e cila miratoi 11 korrikun si një ditë përkujtimi në Malin e Zi për viktimat e masakrave të vitit 1995.

Sidoqoftë, megjithëse deklarata dënoi krimet, si dhe krime të tjera të kryera gjatë konflikteve në ish-Jugosllavi, fjala gjenocid nuk u përmend.