NATO detyron të rritim investimet/ Nga infrastruktura te ristrukturimi, ç’do ndodhë me ushtrinë

Për herë të të parë Shqipëria akordoi këtë vit fonde buxhetore për mbrojtjen, në nivelin 2 % të Prodhimit të Brendshëm Bruto, duke plotësuar kërkesën e NATO-s. Por ky nivel, tashmë nuk do të jetë tavan për investimet, por dysheme. Kjo nënkupton se në vitet në vijim, investimet për mbrojtjen nuk do të bien poshtë nivelit 2 % por madje do t’I afrohen gradualisht nivelit 3 %.

Kjo evidentohet në Planin Afatgjatë të Zhvillimit të Forcave të Armatosura 2024-2033 (PAZHFA) që do të përbëje edhe një nga dokumentet kryesore në fushën e mbrojtjes.

Projeksionet janë që kjo rritje të jetë e përvitshme, ku brenda 10 vitesh synohet të arrihet niveli 2.8 % i Prodhimit të Brendshëm Bruto

Investimet janë në disa drejtime; në rinovimin e bazave ushtarake, ndërtimin e bazave të reja, investime në teknologji dhe sidomos investime të forca njerëzore.

Veç Bazës së re Ajrore të NATO-s që u inaugurua pak javë më parë, janë edhe një serë investimet të reja që do të realizohen.

Plani është që brenda pak vitesh Shqipëria të ketë një ushtri dhe sistem mbrojtje të ngjashëm me atë të NATO-s dhe që i përgjigjet çdo sfide që mund të paraqitet për sigurinë kombëtare të vendit tonë.

Plani Afatgjatë i Zhvillimit (PAZH) i Forcave të Armatosura jep detaje të mëtejshme të mënyrës sesi Shqipëria do të investojë për mbrojtjen.

Strategjia parashikon përfundimin e masterplaneve të garnizoneve kryesore dhe fillimi i investimeve për rijetësimin e tyre. Më konkretisht do të investohet në garnizonet Zall-Herr, Ferraj e Pezë Helmës.

Po ashtu, parashikohet ndërtimi i infrastrukturës stërvitore në Pajet, Bizë dhe në Mnelë.

Në listën e investimeve është edhe zhvillimi i infrastrukturës pritëse dhe akomoduese portuale dhe aereoportuale në Porto Romano dhe bazën detare Pashaliman. Synimi i qeverisë shqiptare është që Porto Romano të jetë Baze detare e NATO-s, kërkesë që është në proces shqyrtimi. Ndërkohë për bazën detare në Pashaliman kanë nisur procedurat e rinovimit me fondet e qeverisë shqiptare.

Po ashtu, investim i pritshëm është edhe në Sistemin e Integruar të Vëzhgimit të Hapësirës Detare si dhe blerja e 6 anijeve të mesme patrullues

Nga ana tjetër, investimet parashikojnë modernizimin e Bazës Ajrore Farkë, ku përveç rinovimit që ka nisur, do të kompletohet me helikopterë Blackhawk .

Investime parashikohen edhe për krijimin e Bazës Tokësore të Mbrojtjes Ajrore si dhe përmirësimi i Sistemit të Integruar të Vëzhgimit të Hapësirës Ajrore të vendit, ku veç një radari fiks, do të investohen edhe në 2 radarë të lëvizshëm.

Në listën e investimeve është edhe ndërtimi i rrjetit kompjuterik të klasifikuar “NATO Sekret” në Forcat e Armatosura dhe ndërtimi i Kampusit të ri Universitar.

Në total, parashikohet që Shqipëria të investojë 122 miliardë lekë për modernizimin dhe 61 miliardë lekë për infrastrukturën.

Ky plan që parashikon zhvillimin e kapaciteteve të reja luftarake, do të sjellin domosdoshmërinë për ndryshim strukture dhe rritje të numrit të personelit.

Në këtë kuadër, struktura e re e Forcave të Armatosura krijon një ndarje të qartë të strukturave luftarake, të mbështetjes së luftimit dhe të mbështetjes me shërbime të luftimit, duke i integruar ato nën komandat e tyre përkatëse, bazuar në natyrën e veçoritë e tyre, si dhe në lehtësinë për t’i përdorur me efikasitet në momentin e kërkuar.

Rritja e numrit të personelit për periudhën 2024 – 2033 do të jetë si vijon:

-në periudhën afatshkurtër do të ruhet numri i personelit aktiv prej 8500 plus 30% shtesë personel rezervist;

 

-në periudhën afatmesme do të arrihet 9000 personel aktiv dhe do të ruhet numri shtesë i personelit rezervist prej 30%.  Rritja e personelit aktiv në periudhën afatmesme vjen si rezultat i zbatimit të disa projekteve në teknologji dhe pajisje

 

-në periudhën afatgjatë plani ka tendencë të rritjes së numrit të personelit aktiv në 9500, i cili do të mbajë në konsideratë zhvillimin e një studimi të kategorive të personelit, ndërsa numri i personelit rezervist do të caktohet në varësi të vlerësimeve periodike.

 

Kjo periudhë do të karakterizohet nga kompletimi dhe vënia në eficiencë e pajisjeve dhe sistemeve moderne.

 

/SCAN