Ndarja nga jeta e Mihal Kerci, Meta dhe Basha mesazhe ngushëllimi: Humbje e rëndë! Të merren urgjent masa, për të siguruar vaksinën

Presidenti Meta dhe kreu i Partisë Demokratike, Lulzim Basha, kanë reaguar pas ndarjes nga jeta të mjekut anestezist, Mihal Kerci.

Përmes një mesazhi ngushëllimi, Meta shprehet se humbja e rëndë kërkon reflektim të thellë dhe furnizimin e bollshëm të personelit mjekësor me masat mbrojtëse.

Meta bën thirrje për  marrjen e masave, pa kursyer asgjë, dhe sigurimin sa më parë të vaksinës për vaksinimin e personelin mjekësor.

“Ndarja nga jeta e Dr.Mihal Kërcit, personalitet i shquar i mjekësisë shqiptare, është një lajm shumë i hidhur për familjen, pacientët dhe të gjithë mjekët. Ngushëllimet më të ndjera, për këtë humbje të rëndë, që kërkon reflektim të thellë.
Humbja e jetëve, si pasojë e COVID-19, të shumë mjekëve të shkëlqyer si Drini Dobi, Bledi Nini dhe të tjerë, është e pazëvendësueshme dhe boshllëku i krijuar në ndihmën e kualifikuar ndaj të sëmurëve tashmë ka për të qenë shumë problematik.

Kjo situatë kërkon marrjen e masave të shpejta, pa kursyer asgjë.
Përsosja dhe furnizimi i bollshëm e pa kufizim me mjetet më të mira mbrojtëse për personelin mjekësor.
Dezinfektimi i vazhdueshëm dhe rigoroz i mjediseve mjekësore për arritjen e sigurisë maksimale të tyre.
Sigurimi sa më parë i vaksinës dhe vaksinimi me prioritet i personelit mjekësor.
Shpërblim financiar dinjitoz dhe të shtuar.

Janë këto disa nga masat më urgjente dhe efektive, që duhen marrë sa më parë.
Çdo investim në këtë drejtim, ështe investim jo vetëm për jetën dhe shëndetin e mjekëve por edhe për shendetin e qytetarëve, të cilët presin shumë nga puna dhe përkushtimi i mjekëve, veçanërisht në këto kohë të vështira pandemie”, shprehet Meta.

Ndërkohë Basha, në mesazhin e ngushëllimit drejtuar familjes së mjekut Kerci, shpreh “mirënjohje për të, edhe çdo mjek që ka humbur jetën në betejë për të shpëtuar jetë”.

“Të gjithë së bashku jemi përjetë mirënjohës për sakrificën sublime të mjekëve që humbën jetën në betejën për të shpëtuar jetë

Me hidhërim të madh mësova për ndarjen nga jeta të mjekut Mihal Kërci. Ngushëllimet e mia shkojnë sot për familjen, miqtë dhe kolegët e profesor Mihalit. Kjo është një tjetër humbje e rëndë për të gjithë ne dhe personelin shëndetësor, që janë në vijën e parë të betejës për të shëruar të sëmurët me COVID-19, ndërsa vënë në rrezik jetët e tyre.

Të gjjthë së bashku jemi përjetë mirënjohës për sakrificën sublime të mjekëve që humbën jetën në betejën për të shpëtuar jetë. Nderimi dhe respekti për sakrificën e tyre do të jetë bashkëshoqërues i përhershëm në kujtim të kësaj periudhe të vështirë që po kalojmë.

Mjekë, infermierë, ndihmës-mjekë, teknikë, administratorë, vullnetarë, shoferë, roje, e shumë të tjerë – të rinj në profesion apo në pension – kanë vënë në rrezik dhe kanë humbur jetën gjatë këtyre muajve pandemie.

Mirënjohje dhe falenderime për stafet tona mjekësore! Ata janë heronjtë tanë në vijën e parë të betejës me COVID!”, shkruan Basha.