Ndërtohet skena: Si ndodhi incidenti me rusët në Uzinën e Gramshit

Në gusht të këtij viti Uzina Ushtarake Çekin në Gramsh u sulmua nga dy shtetas rus dhe një ukrainas. Të tre tentuan të hyjnë në ambientet e uzinës duke lënë të plagosur dy ushtarët që ruanin objektin.

News 24 ka ndërtuar skemën që tregon se si ndodhi incidenti në uzinë, bazuar në pamjet filmike të kamerave dhe dëshmitë e banorëve të zonës.

Në orën 17:25 të 20 gushtit, dy shtetasit rusë Mikhail Zorin dhe Svetlana Timofeva ndodhen në pjesën e pasmë të uzinës, ndërsa ukrainasi Fedir Alpatov gjendet në rrugë me automjetin tip “Chevrolet”.

Timofeva dhe Zorin gjejnë një pjesë të hapur të rrethimit të uzinës në pjesën e pasme dhe futen brenda. 33-vjeçarja ndalon pak metra pasi ishte futur në territorin e uzinës, ndërsa Zorin vijon rrugën. Në at ëmoment ai pikaset nga njëri prej ushtarëve i cili e ndjek.

Dy oficerët e Forcave të Armatosura afrohen dhe urdhërojnë shtetasin rus të largohet nga territori i uzinës, por Zorin i kundërshton me forcë dhe largohet duke vrapuar.

“Roja ndiqte, ai ikte me vrap, u përplasën brenda territorit, ai ishte frikësuar nga automatiku që kishte në krah roja, u hodh nga muri dhe kaloi në disa ara private dhe doli në një rrugë kryesore mbi uzinë”, tha dëshmitari.

Ushtari tjetër merr automjetin dhe del në rrugën e sipërme të uzinës për të ndjekur Zorin i cili po largohej. Në atë moment ushtari i pret rrugën dhe shtetasi rus përplaset fizikisht me të dy ushtarët duke i sulmuar me spray paralizues në fytyrë.

Në ndihmë të ushtarëve vijnë banorë të zonës.

“Një nga këta rojet u tregua shumë djalë i shkathët se ai do kishte ikur, mori makinën dhe e ndoqi me makinë dhe i preu rrugën, se mos e kishte ndjekur me makinë nuk e kapte dot. Atje ku u kap ai kam shtëpinë e vëllezërve dhe më merr në telefon kunata dhe më thotë hajde se po vriten këtu para portës time”, u shpreh dëshmitari.

Gjatë kohës së konfrontimit, Alpatov priste me makinë Timofevan në rrugën poshtë uzinës, prej nga u larguan drejt Cërrikut. Aty u ndaluan nga forcat e policisë.

“Goca iku nga krahu kundërt, doli në rrugë kryesore dhe e mori makina. Fëmijët që e kishin fotografuar makinën i erdhën në ndihmë policisë dhe i thanë kjo është makina dhe i dhanë fotografinë policies”, pohon një tjetër dëshmitare.