Në kërkim për kokainën në Fier, Hoxha: Policia shqiptare e ndaloi më parë kolumbianin, por e la të lirë

Për laboratorin e kokainës i zbuluar në Frakull të Fierit janë arrestuar deri tani 10 shqiptarë, 2 kolumbianë, ndërsa dy të tjerë kolumbianë janë shpallur në kërkim.

Gazetari investigativ Artan Hoxha tha në Abc Live se njëri nga dy kolumbianët e shpallur në kërkim është ndaluar në të kaluarën nga policia shqiptare, por është lënë i lirë, pasi ka dashur që ta ndjekë dhe të zbulojë dyshimet që kishte për bashkëpunimin e kolumbianëve me shqiptarët për drogën.

Hoxha tha se autoritete shqiptare kanë mbikëqyrur shtetasit kolumbianë që kanë ardhur gjatë kësaj kohe në Shqipëri dhe se i shpalluri në kërkim kishte hyrë në mënyrë të rregullt në Shqipëri.

Ngjarja  

Në fshatin Frakull të Madhe të Fierit u gjetën dje rreth 24 ton pleh kimik, ku fshihej 430 kg pleh kokainë me vlerë 40 mln euro.

Të arrestuarit janë Viktor Cervanaku, Zenel Cervanaku, Denilson Cervanaku, Enxhi Ferhati, Nikolin Gjolena, Klajdi Vrioni (Kodra), Julian Malaj, Redion Meshi, Bledar Matoshi, Marildo Rona.

Plehu kimik dhe kokaina u gjetën dje në shtëpinë e ish kryetarit të komunës Frakull në Fier, Viktor Çervenakut.  

Kokaina ka ardhur në Shqipëri nga Kolumbia, duke kaluar tranzit nëpër dy porte, të Greqisë dhe Malit të Zi. Vlera e saj, nëse do të dilte në treg, do të ishte rreth 40 milionë euro.

Hetimet janë realizuar mes autoriteteve shqiptare dhe malazeze, si dhe në bashkëpunim me agjenci të huaja ligjzbatuese, dhe kishin nisur në korrik të këtij viti.

Ky është rasti i dytë që zbulohet një laborator kokaine në Shqipëri.

Në vitin 2015 një i tillë u zbulua në Xibrakë të Elbasanit, ku u arrestuan edhe dy shtetas kolumbianë, kimistë që nxirrnin sasitë e kokainës së përzier në lëndë kimike të lëngshme, të importuara nga Kolumbia.