Nga Fjolla Morina te ditëlindja e ‘zhurmshme’ e Bes Kallakut, të famshmit që shkelën ligjin në vitin e pandemisë

Të famshëm ose jo, të gjithë janë të barabartë përpara ligjit.

Edhe këtë vit, ndonëse me disa muaj të izoluar prej pandemisë Covid-19, nuk munguan rastet kur të famshmit si këngëtarë, aktorë, modele shkelën ligjin dhe u përballën me ndëshkimin sipas ligjit.

Ja disa prej rasteve më të komentuara gjatë vitit që lamë pas ndër artistët shqiptarë:

Këngëtarja kosovare Fjolla Morina u arrestua në shtator nga Policia Kufitare në Morinë pasi gjatë kontrollit të ushtruar në automjetin ku udhëtonte, në çantën e saj të dorës u gjet dy pistoleta, njëra prej tyre false dhe disa fishekë.

Bashkë me këngëtaren u arrestuan edhe biznesmeni Fisnik Syla dhe shoferi i saj Fitim Muji. Pavarësisht se ishin në të njëjtin mjet me të, Morina i shpëtoi nga përgjegjësitë.

Fjolla u la në “arrest shtëpie”, pas telenovelës që shkaktoi ditën e seancës gjyqësore. Këngëtarja falsifikoi një eko, për të përfituar lehtësime në gjyq, duke shtuar se ishte dy muajshe shtatzënë, por mashtrimi u zbulua brenda pak orësh, në vizitën e dytë që bëri në spitalin e Kukësit.

Mjeku që i falsifikoi ekon, u shpall në kërkim dhe deri më tani, për të dihet, që u largua drejt Kosovës.

Gjobitja e Presidentit Ilir Meta, Monika Kryemadhit si edhe personazheve të tjerë të njohur për shkak se thyen masat anti-Covid te ditëlindja e Bes Kallakut ka bërë bujë në mediat greke.

Organizimi i ditëlindjes me 30 të ftuar nga aktori Bes Kallaku i ka kushtuar 1 milion lekë gjobë administratorit të lokalit, dhe pezullimin nga puna të 6 punonjësve të policisë.

Blutë ndëshkuan me gjobë dhe të gjithë personat që kanë qenë të pjesëmarrës në aktivitetin e zhvilluar të cilët kanë kryer shkelje të masave kufizuese anti-Covid 19.

Mes të pranishmëve ishin dhe Presidenti Ilir Meta dhe kryetarja e Lëvizjes Socialiste për Integrim Monika Kryemadhi, të cilët u ndëshkuan me gjobë nga 10 mijë lekë, pasi sipas policisë kanë marrë pjesë në grumbullim në më shumë se 10 persona.

Me gjobë prej 10 mijë lekësh u ndëshkua dhe kryebashkiaku i Kolonjës Erion Isai, i cili po ashtu ishte pjesë e festës.

 

Edhe moderatore Einxhel Shkira dhe Dojna Mema nuk iu bindën urdhrit të qeverisë që të mos dalë në rrugë në orën 22:00 dhe mbajtjes së maskës si pasojë janë ndëshkuar me gjobë nga policia.

Përplasja e policisë me protestuesit në 17 maj të këtij viti pas shembjes së godinës së Teatrit Kombëtar, u shoqërua me të arrestuar dhe të lënduar edhe ndër radhët e artistëve si aktori Neritan Liçaj, aktorja Juli Emiri dhe regjisori Robert Budina.

Këngëtari Aleksandër Gjoka duket se nuk e përjetoi mirë periudhën e karantinës. I përjashtuar nga çdo ndihmë ekonomike nga qeveria bashkë me shumë artistë të tjerë, shprehu revoltën e tij përmes një video e cila u bë virale teksa ofendonte kryeministrin Edi Rama.

Në shtator të këtij viti, u finalizua një hetim 5-vjeçar i udhëhequr nga Italia me shkatërrimin e kartelit të parë shqiptarë të kokainës dhe arrestimin e 20 pjesëtarëve.

Në këtë kartel droge i quajtur "Kompania Bello" 5 nga të arrestuarit janë kapur në Shqipëri, ndërsa pjesa tjetër në vende të tjera. Mes tyre, ra në pranga në Dubai edhe Eldi Dizdari. Ai është i martuar dhe ka një fëmijë me ish- misin shqiptar, Suada Sherifi.

Ish-banorja e Big Brother dhe modelja Françeska Jaçe mbeti e plagosur gjatë muajit nëntor, si pasojë e një aksidenti automobilistik. Ngjarja ndodhi në rreth-rrotullimin e Nartës në Vlorë. Ajo humbi kontrollin për shkak të lëvizjes me shpejtësi të lartë.

Më 29 maj, gjatë raportimit në Komisionin parlamentar për Sigurinë Kombëtare, Drejtori I Policisë Ardi Veliu përdori një video ku Zaida Çobo, e ëma e të miturit që më 14 maj u dhunua nga policia për shkelje të kufizimit të lëvizjes, shfaqej me pistoletë për ta denigruar atë si nënë dhe për të justifikuar veprimet e policisë ndaj të birit. Deklaratat e Veliut sollën reagime të shumta pasi videoja në fjalë ishte marrë në shesh-xhirimin e një filmi ku Çobo kishte aktruar.

Këngëtarja e njohur nga Kosova, Mihrije Brahaj ka rrëfyer për herë të parë se është dënuar vite më parë me 1 vit burg.

Ajo tha se tre dekada më parë artistët e kishin thuajse të pamundur të udhëtonin nga një vend në tjetrin për të dhënë koncerte dhe për këtë arsye ishte ndaluar nga policia.

Këngëtarja deklaroi se në vitin 1995 ka udhëtuar drejt Maqedonisë me bashkëshortin e saj dhe aty është dënuar me 1 vit burg.