Nga “heroi i ditës” te realiteti i hidhur/ Balla 'bie në gropë": Të q*fsha ropt, je lango

Një postim në rrjetet sociale nga kreu i grupit parlamentar të PS, Taulant Balla, që synonte të nxirrte në pah një akt heroizmi, është kthyer në një bumerang kritikash ndaj qeverisë dhe kushteve skandaloze të shërbimeve emergjente në vend.

Balla publikoi foton e zjarrfikësit Marsel Troshku, duke e cilësuar si “Heroin e ditës”, ndërsa theksonte se ai kishte ndërhyrë në zjarr edhe pse ishte pushim:

“Sot Marseli e kishte pushim. Në momentin e zjarrit nuk ishte në detyrë. Sapo dëgjoi për zjarrin vrapoi për të ndihmuar shokët në luftë ???? ku thjeshtë mori një helmetë dhe iu fut punës”, shkruan ai.

Por, në vend të duartrokitjeve, rrjeti shpërtheu në kritika të ashpra. Komentuesit e kanë cilësuar zjarrfikësin si hero, por jo falë sistemit përkundrazi, pavarësisht tij.

“Ai është hero, kurse ti përpiqesh të marrësh kreditë duke e paraqitur si arritje të një sistemi mafioz”, shkruan një qytetar. Të tjerë theksojnë se zjarrfikësit shqiptarë punojnë në kushte të papranueshme, me paga të ulëta dhe pa pajisje bazike.

“Janë heronj, por me kushte skandaloze. Si nuk ju vjen turp që ende nuk kanë mjetet për të fikur zjarret?”, thuhet në një tjetër koment, ndërsa të tjerë ngrejnë shqetësimin për mungesën e standardeve në ndërtim: “Pse jepen leje ndërtimi pa parashikuar rrugë për zjarrfikëse dhe ambulanca?”

Reagimet shkojnë edhe më tej, duke e lidhur ngjarjen me korrupsionin dhe mungesën e kontrollit në sektorin e ndërtimit, ku sipas qytetarëve, ndërtesat ndërtohen pa shkallë emergjence dhe pa respektuar normat bazë të sigurisë.

Ndërkohë, një video që po qarkullon në rrjet tregon momentin kur shefi i zjarrfikësve futet mes flakëve pa pajisje të plota mbrojtëse për të ndihmuar në evakuimin e banorëve – një akt që për shumëkënd simbolizon jo vetëm guximin, por edhe dështimin e sistemit për t’i mbrojtur ata që rrezikojnë jetën çdo ditë.

Zjarri në kompleksin “Arlis”, pranë Farmacisë 10, la pas një bilanc të rëndë dëmesh materiale. Rreth 30 apartamente u prekën nga flakët, disa prej tyre të shkatërruara plotësisht. Dyshohet se zjarri nisi nga materiale të djegshme në katin e parë, ndërsa përhapja e shpejtë e flakëve ka ngritur pikëpyetje serioze mbi cilësinë e ndërtimit.

Në terren u angazhuan 8 makina zjarrfikëse, 4 autoambulanca dhe helikopterë.

Një video e publikuar nga vendngjarja tregon momentet dramatike të zjarrit të fuqishëm që përfshiu një pallat në kompleksin “Arlis”,.

Momenti më i rrezikshëm shihet kur pjesë të fasadës dhe elementë të ndërtesës shkëputen dhe bien në tokë, duke krijuar rrezik serioz për banorët dhe zjarrfikësit.  

Videoja sjell edhe pamje nga brenda një apartamenti të përfshirë nga zjarri. Ambienti është shkatërruar plotësisht: mobiliet, pajisjet dhe çdo send brenda banesës janë kthyer në hi. Muret janë nxirë nga tymi dhe temperaturat e larta, ndërsa nuk ka mbetur pothuajse asgjë e paprekur nga flakët.

Pamjet ilustrojnë qartë intensitetin e zjarrit dhe dëmet e mëdha materiale të shkaktuara, ndërsa autoritetet vijojnë punën për shuarjen e plotë të vatrave dhe për zbardhjen e shkaqeve të ngjarjes./ Politiko