Nga Klodian Rasha tek Ilvi Meta dhe Lear Kurti/ Rastet kur të rinjtë mbetën viktima të policisë

Vdekja e 32-vjeçarit Lear Kurti riktheu vëmendjen te vdekjet që kanë ndodhur shpesh në komisariate apo pas shoqërimit të të rinjve nga efektivët e policisë. 

Rasti nuk është i parë, por i përsëritur. Vdekja e Klodian Rashës i cili u qëlluame armë nga efektivi në detyrë asokohe Nevaldo Hajdaraj, u pasua me një sërë protestash të dhunshme në kryqytet. Qelitë e paraburgimit janë kthyer në frikë për të rinjtë e shoqëruar, pasi për disa nga ata fati ka qenë tragjik.

Vdekja e Enea Ftoit në Korçë 

Më 17 maj 2018, ndërroi jetë në Komisariatin e Korçës Ene Ftoi. 27-vjeçari u ndalua për ‘Vjedhje me dhunë’ dhe qëndroi në paraburgimin e Korçës për tre ditë.  

Ditën e ngjarjes 27-vjeçari do të dilte në gjyq për të marrë masën e sigurisë, por ndërsa familjarët prisnin, u njoftuan për vdekjen e Ftoit.  

Ata hodhën akuza se 27-vjeçari ishte dhunuar për vdekje nga efektivët, gjë që u mohua nga autoritetet. 
Prokuroria vendosi të pushojë çështjen e vdekjes së Ftoit me argumentin se “Pavarësisht pretendimit të familjarëve të viktimës, mbi Enea Ftoin policia nuk ka ushtruar dhunë. 27-vjeçari vdiq për shkaqe natyrore, si pasojë e ishemisë akute të miokardit. Enea Ftoi ishte përdorues i lëndëve narkotike dhe vuante nga problemet në mushkëri”. 

Vrasja e Klodian Rashës 

Klodiana Rasha, 25-vjeçari i cili u qëllua për vdekje nga efektivi Nevaldo Hajdaraj, ishte rasti që zgjoi të rinjtë për të kërkuar drejtësi për vrasjesn e Rashës. 

25-vjeçari u vra pak para mesnatës së 8 dhjetorit 2020 pranë banesës së tij në zonën e Laprakës. Efektivi Hajdaraj e ndoqi Rashën derisa e qëlloi për vdekje për shkak se viktima kishte shkelur rregullat e orës policore të Covid-19. 

Sipas dëshmive, efektivët i kanë bërë thirrje Rashës të ndalojë, por ky i fundit ka vrapuar i frikësuar për t’ju shpëtuar. Policia tha fillimisht se Rasha ishte i armatosur, pasi në vendngjarje u gjet një armë, dhe Hajdaraj e kishte qëlluar për vetëmbrojtje.

Deklarata u rrëzua nga ekspertët të cilët pohuan se arma e cila ishte gjetur pranë vendngjarjes nuk i përkiste Rashës. Nevaldo Hajdaraj u dënua me 10 vjet burg për “vrasje në tejkalim të mbrojtjes së nevojshme”. 

Vdekja e Ilvi Metës 

Ilvi Meta u gjet i vdekur mbrëmjen e 5 majit të këtij viti në Komisariatin e Kavajës. Policia raportoi se Meta u vetëvar në dhomën e paraburgimit ku po qëndronte pasi u arrestua me vendim gjykate pasi dyshohet se ka vjedhur një apartament në Kavajë më 2 prill. 

Familjarët deklaruan asokohe se në trupin e viktimës kishin gjetur shenja dhune, çka ngrinte dyshime se ishte keqtrajtuar nga policët.  

"Ne kemi parë trupin dhe kemi vërejtur shenja dhune në bërryla, brinjë dhe stomak, në qendër. Këto i lëmë të fotografuara, por do të presim hetimet të thonë fjalën e tyre. Më pas ne dhe avokatët do të vazhdojmë rrugën tonë”, tha një i afërm. 

Ndalimi i të riut ishte bërë pasi akuzohej për një vjedhje të ndodhur në datën 2 prill në një banesë në Kavajë, për një makinë qepëse dhe prerëse pllakash. 

Vdekja e Arben Micit  

Arben Mici ndërroi jetë mbrëmjen e 26 marsit në komisariatin nr.5 të Kamzës. 26-vjeçari u asfiksua nga tymi paspërfshirjes nga zjarri të ambienteve të brendshme të komisariatit dhe bashkë me të u dërguan në spital edhe një tjetër i paraburgosur dhe një punonjës policie.  

Mici ishte arrestuar për dhunë të ushtruar ndaj nënës së tij. 26-vjeçari i dha fund jetës duke përdorur çakmakun për t’i vënë flakën dyshekut prej sfungjeri. 

Nga hetimet rezultoi se efektivët nuk kishin përmbushur rregullat e sigurisë dhe kishin lejuar të arrestuarit të mbanin në dhoma mjete të ndaluara, siç ishte çakmaku. 

Ekspertët e kriminalistikës gjetën materiale batanijesh dhe sfungjeri, një paketë duhani me tetë filtra. Ndërrsa në trupin e Arben Micit iu gjetën në xhepa pesë cigare, një paketë ‘Slims’, si dhe një çakmak me ngjyrë bluku këmbëza e gazit mungonte.